ލީޑްސް (ޖުލައި 13) - ލީޑްސް ޔުނައިޓެޑަށް ކުޅެމުން އަންނަ ބްރެޒިލްގެ ވިންގް، ރަފީނިއާގެ ސޮއި ހޯދުމުގެ ރޭހުގައި ބާސެލޯނާ އިން ކުރިހޯދާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ސްޕެއިންގެ ނޫސްތަކުން ރިޕޯޓްކުރާގޮތުގައި ލީޑްސް އިން ވަނީ ރަފީނިއާ ގަންނަން ބާސެލޯނާ އިން ކުރި ބިޑް ބަލައިގެންފަ އެވެ. އެ ގޮތުން ބާސެލޯނާ އިން ފުރަތަމަ ދައްކާނީ 58 މިލިއަން ޑޮލަރެވެ. އިތުރު 10 މިލިއަން ޑޮލަރު ދައްކާނީ ރަފީނިއާ ބާސެލޯނާގައި ދައްކާ ކުޅުމަށް ބަލައިފަ އެވެ.
ރަފީނިއާ، 25، ލީޑްސް ދޫކޮށްލާނެ ކަަމަށް ބަލައި، އެ ޓީމުން މިދިޔަ މަހު ވަނީ ފެޔަނޫޑްގެ ލުއިސް ސިނިސްޓޭރާގެ ސޮއި ހޯދައިފަ އެވެ. އަދި ލީޑްސް އިން ޕްރީ ސީޒަނުގައި އޮސްްޓްރޭލިއާ ޓުއާ އަށް ފުރިއިރު ރަފީނިއާ ޓީމާ އެކު ނުގެންދެ އެވެ.
އާސެނަލުން ގިނަ ހަފްތާތަކެއް ވަންދެން ރަފީނިއާއާ މަޝްވަރާ ކުރަނިކޮށް މިދިޔަ މަހު ފަހުކޮޅު ޗެލްސީން އެ ޑީލް ހައިޖެކްކުރީ ލީޑްސް އިން ބޭނުންވާ އަގުގަ އެވެ. އެ ގޮތުން ރަފީނިއާ ގަންނަން ޗެލްސީން ފުރަތަމަ 65 މިލިއަން ޑޮލަރު ދައްކަން އެއްބަސްވި އެވެ. އަދި ޗެލްސީގައި ރަފީނިއާ ދައްކާ ކުޅުމަށް ބަލާފައި އިތުރު 15-20 މިލިއަން ޑޮލަރު ދޭން ވެސް އެއްބަސްވުމުގައި ހިމަނަން ނިންމި ނަމަވެސް ފަހު ވަގުތު ރަފީނިއާ ނިންމީ ޗެލްސީ އަށް ނުދާށެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން ރަފީނިއާ މަޑުކުރީ ބާސެލޯނާއާ ގުޅުމަށެވެ. ކުރިން ޕޯޗުގަލްގެ ސްޕޯޓިން ލިޒްބަން އާއި ފްރާންސްގެ ރެނެސް އަށް ކުޅުނު ރަފީނިއާގެ އޭޖެންޓަކީ ޕޯޗުގަލް ގައުމީ ޓީމަށް ކުރިން ކުޅުނު ޑެކޯ އެވެ. ޑެކޯ އަކީ ކްލަބް ކެރިއަރުގައި ބާސެލޯނާ އާއި ޗެލްސީ އަށް ކުޅެފައިވާ ކުޅުންތެރިއެކެވެ.
ބާސެލޯނާ އިން މި ފަހަރުގެ ޓްރާންސްފާ މާކެޓްގައި ފީއެއް ދައްކާފައ ސޮއިހޯދާނެ ފުރަތަމަ ކުޅުންތެރިއަކީ ރަފީނިއާ އެވެ. މީގެ ކުރިން ޗެލްސީގެ އަންދްރެއަސް ކްރިސްޓެންސަން އާއި އޭސީ މިލާންގެ ފްރޭންކް ކެސިއޭ ގެންދިޔައީ ހިލޭ ޓްރާންސްފާއެއްގަ އެެވެ. ބާސެލޯނާ އިން އަންނަނީ ބަޔާން މިއުނިކްގެ ރޮބަޓް ލެވަންޑޯސްކީ ގެންނަން ވެސް މަޝްވަރާ ކުރަމުންނެވެ.
ރިޕޯޓްތައް ބުނާގޮތުން ބާސެލޯނާގެ ވިންގް، އޮސްމާން ޑެމްބެލޭ ވަނީ އެ ކްލަބް ދޫކޮށްލަން ގެންގުޅުނު ވިސްނުން ދޫކޮށްލައި އާ ކޮންޓްރެކްޓެއްގައި ސޮއިކުރަން ނިންމައިފަ އެވެ.
