މާދަމާ ހަވީރު ފަށާ ދެ ވަނަ ޑިވިޝަން ފުޓްބޯޅަ މުބާރާތަށް، ސްރީ ލަންކާގެ ތިން ކުޅުންތެރިންނާ އެކު ޓެންޓް ސްޕޯޓްސް ކްލަބުން ތައްޔާރުވެއްޖެ އެވެ.
ޓެންޓް ސްޕޯޓްސް ކްލަބުން ދެ ވަނަ ޑިވިޝަނުގައި ނުކުންނާނީ މާޒިޔާ ސްޕޯޓްސް އެންޑް ރެކްރިއޭޝަންގެ އެސިސްޓަންޓް ކޯޗު، އަހުމަދު ސުޒޭރު (ކޮއްކޮ)ގެ ކޯޗުކަމުގަ އެވެ.
ޓެންޓުން ދެ ވަނަ ޑިވިޝަނަށް ޓީމު އެކުލަވާލިއިރު، ގެނައި ލަންކާ ކުޅުންތެރިންގެ ތެރޭގައި ލަންކާ ގައުމީ ޓީމަށް ކުޅެފައިވާ ކުޅުންތެރިން ހިމެނެ އެވެ. އޭގެ ތެރޭގައި ލަންކާ ސީނިއާ ގައުމީ ޓީމުގެ މިޑްފީލްޑަރު، މުހައްމަދު ފަސަލް އާއި ލަންކާގެ ދެ ވަނަ ކީޕަރު، ކަވީޝް ލަކްޕްރިޔާ އެވެ. ދެން ޓެންޓުން ގެނައީ ލަންކާގެ ޔޫތު ގައުމީ ޓީމުގެ ކުޅުންތެރިޔާ، ރުސްކާން އެެވެ.
ޓެންޓްގެ ކޯޗުކަމާ ހަވާލުވި ސުޒޭރު (ވ) އަށް އެ ޓީމުގެ ޖޯޒީ ހަވާލުކޮށްދެނީ: ސުޒޭރު ވަނީ ދެ ވަަނަ ޑިވިޝަނުގައި އެންމެ ފަހުން ކޯޗުކޮށްދިން ސުޕަ ޔުނައިޓެޑް ސްޕޯޓްސް (ސަސް) ފުރަތަމަ ޑިވިޝަނަށް ޕްރޮމޯޓްކޮށްދީފައި.
ދެ ވަަނަ ޑިވިޝަނުގައި ކުޅެން، ޓެންޓުން ދެން ސޮއި ހޯދި ދިވެހި ކުޅުންތެރިންގެ ތެރޭގައި ކުރިން ފުރަތަމަ ޑިވިޝަނުގައި ކުޅެފައިވާ ކުޅުންތެރިން ހިމެނެ އެވެ.
ފާހަގަކޮށްލެވޭ ކުޅުންތެރިންނަށް ބަލާއިރު، ކުރިން މާޒިޔާ، ޓީސީ އަދި ވެލެންސިއާ އަށް ކުޅުނު އަލީ އިމްރާން (އިންމަ)، ނިއު ރޭޑިއަންޓް، ޓީސީ، ވިކްޓަރީ އަދި ވީބީ އަށް ވެސް ކުޅުނު ޝަފްރާޒް އިބްރާހިމް (ޝަފްލޭ)، ވީބީ، ޓީސީ އަދި ފޯކައިދޫ އަށް ކުޅުނު އަހުމަދު އަމްޖަދުގެ އިތުރުން އޯލްޔޫތުލިންކްއޭޖް (އޭވައިއެލް) އާއި ނިއު އަށް ކުރިން ކުޅުނު އިބްރާހިމް އުސާމަތު ހިމެނެ އެވެ.
ޖުމްލަ 16 ޓީމު ވާދަކުރާ މި ފަހަރުގެ ދެ ވަަނަ ޑިވިޝަން ކުރިއަށްދާނީ ދެ ގްރޫޕަށް ބަހާލައިގެން ކޮންމެ ގްރޫޕެއްގައި އަށް ޓީމު ކުޅޭ ގޮތަށެވެ.
ގްރޫޕް އޭގައި ޓެންޓްގެ އިތުރުން ދެން ހިމެނެނީ، ކްލަބް ޕީކޭ، ދިވެހި ސިފައިންގެ ކްލަބް، ކުޑަހެންވޭރު ޔުނައިޓެޑް، ބިސް ބުރު ސްޕޯޓްސް ކްލަބް، ޖޭޖޭ ސްޕޯޓްސް، ބުރު ސްޕޯޓްސް އަދި ކެޕިޓަލް ސިޓީ އެވެ.
އަނެއް ގްރޫޕްގައި ހިމެނެނީ ނިއު ރޭޑިއަންޓާއި ވިކްޓަރީ ސްޕޯޓްސް ކްލަބްގެ އިތުރުން، ބީޖީ ސްޕޯޓްސް ކްލަބް، މަހިބަދޫ ސްޕޯޓްސް ކްލަބް، ކްލަބް އޯވަންއޯ، އެލްޓީ ސްޕޯޓްސް، ކްލަބް ޓީނޭޖް އަދި ލޮރެންޒޯ ސްޕޯޓްސް ކްލަބް އެވެ. ނިއު އާއި ވިކްޓަރީ ވާދަކުރަނީ ސަސްޕެންޝަނުން ސަލާމަތްވެވެގެންނެވެ.
ޓެންޓަށް ސޮއިކުރުމަށް ފަހު އިންމަ (ކ) އެ ޓީމުގެ ޖޯޒީ ދައްކާލަނީ
ގަލޮޅު ދަނޑާއި ޓާފް އެއް ނަމްބަރު ދަނޑުގެ އިތުރުން ވިލިމާލޭ ޓާފްގައި މި ފަހަރުގެ ދެ ވަނަ ޑިވިޝަންގެ މެޗުތައް ކުރިއަށްދާއިރު، މާދަމާ ހަވީރު ފުރަތަމަ މެޗުގައި ޓެންޓް ކުޅޭނީ ކްލަބް ޕީކޭއާ އެވެ. މި ގްރޫޕްގެ އަނެއް މެޗުގައި މާދަމާރޭ ދިވެހި ސިފައިންގެ ކްލަބް ކުޅޭނީ ކެޕިޓަލް ސިޓީ ސްޕޯޓްސް ކްލަބާ ދެކޮޅަށެވެ.
ދެ ވަނަ ޑިވިޝަން ފުޓްބޯޅަ މުބާރާތުގެ ފޯމެޓް ރޭވިފައި އޮތީ ކޮންމެ ގްރޫޕެއްގެ ގަދަ ދެ ޓީމެއް ސެމީ ފައިނަލަށް ދާ ގޮތަށެވެ. ސެމީ ފައިނަލަށް ފަހު ފައިނަލުން ފުރުސަތު ލިބޭ ދެ ޓީމެއް ޕްރިމިއާ ލީގުގެ ކޮލިފިކޭޝަނަށް ހޮވޭނެ އެވެ.
ޕްރިމިއާ ލީގުގެ ކޮލިފިކޭޝަން ބުރުގައި ކުޅޭނީ މިހާރު ކުރިއަށްދާ ޕްރިމިއާ ލީގުގެ ފުލަށް ދާ ދެ ޓީމާއި ދެ ވަނަ ޑިވިޝަންގެ ޗެމްޕިއަން އަދި ރަނަރަޕް އެވެ. އެ ހަތަރު ޓީމުގެ މެދުގައި ލީގު ބުރެއް ކުޅުމަށް ފަހު އެންމެ ނަތީޖާ ރަނގަޅު ދެ ޓީމެއް އަންނަ ސީޒަނުގެ ޕްރިމިއާ ލީގުން ފުރުސަތު ލިބޭނެ އެވެ.
