ލަންޑަން (ޖުލައި 7) - އާސެނަލްގައި ވަކި ގައުމުތަކުގެ ކުޅުންތެރިން ގިނަވި ކަމުގައި ވިޔަސް އެ ކްލަބްގައި ގައުމުތަކަށް ނިސްބަތްވާ ގްރޫޕްތަކެއް ނޯންނާނެ ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.
މި ފަހަރުގެ ޓްރާންސްފާގައި އާސެނަލުން ވަނީ މިހާތަނަށް ހަތަރު ކުޅުންތެރިން ގެނެސްފަ އެެވެ. އެއީ މެންޗެސްޓާ ސިޓީގެ ބްރެޒިލް ފޯވާޑް، ގަބްރިއެލް ޖީސޫސް އާއި ސައޮ ޕައޮލޯ އިން ގެނައި ބްރެޒިލްގެ ވިންގް، މާކުއީނިއޯސް، އެމެރިކާގެ ލީގު (އެމްއެލްއެސް) އިން ގެނައި ގޯލްކީޕަރު މެޓް ޓާނާ އާއި ޕޯޓޯ އިން ގަތް، ހުނަރުވެރި މިޑްފީލްޑަރު ފަބިއޯ ވިއޭރާ އެވެ.
އާސެނަލްގެ ސީނިއާ ޓީމުގައި މި ވަގުތު އިނގިރޭސި ބަހުން ވާހަކަ ދައްކާ ކުޅުންތެރިންނަށް ވުރެ، ޕޯޗުގީސް ބަހަށް ފަރިތަ ބްރެޒިލްގެ ކުޅުންތެރިންނާއި ޕޯޗުގަލްގެ ކުޅުންތެރިން އަންނަނީ ގިނަވަމުންނެވެ.
އާސެނަލްގެ ޕްރެކްޓިހުގެ ތެރެއިން ގަބްރިއެލް ޖީސޫސް (ކ)، ގަބްރިއެލް މާޓީނޭލީ (މ)، އަދި ގަބްރިއެލް މަގާޅައެސް (ވ): މި ތިން ކުޅުންތެރިންގެ އިތުރުން މި ފަހަރު އާސެނަލުން ވަނީ ބްރެޒިލްގެ ވިންގް، މާކުއީނިއޯސް ވެސް ގެނެސްފައި.
އާސެނަލްގެ ކޯޗު އާޓެޓާ ބުނީ ވަކި ގައުމުތަަކަކަށް ނިސްބަތްވާ ކުޅުންތެރިން ގިނަވުމަކީ އޭނާ މާ ބޮޑަށް ވިސްނާ ކަމެއް ނޫން ކަމަށެވެ.
"އަހަންނެއް ބޭނުމެއް ނޫން ބްރެޒިލް ކުޅުންތެރިންގެ ގްރޫޕެއް ނޫނީ ޕޯޗުގީސް ކުޅުންތެރިންގެ ގްރޫޕެއް، މި ގޮތަށް އާސެނަލްގެ ތެރޭގައި އޮންނަން. އަހަންނަށް އެންމެ މުހިންމީ މުޅި ޓީމު އެކަތިގަނޑެއްގެ ގޮތުގައި އެއްބައިވަންތަކޮށް އޮތުން،" އާޓެޓާ ބުންޏެވެ.
"އަހަރެން ބޭނުމީ އެއް ކުޅުންތެރިއަކު އަނެއް ކުޅުންތެރިއަކަށް ފުރިހަމަ އަށް އިތުބާރުކުރާ ވަރުގެ ވަރުގަދަ ސްކޮޑެއް އެކުލަވާލަން،"
އާޓެޓާ ބުނީ އޭނާގެ ފުޓްބޯޅަ ފިލޯސަފީ އަކީ ހަމަހަމަކޮށް ޓީމުގެ މަސްލަހަތަށް ވިސްނައި، ކުޅުންތެރިންނަށް ފުރުސަތު ދިނުން ކަމަށެވެ. އެ ގޮތަށް ބަލާއިރު، އޭނާ މަސައްކަތް ކުރަން ބޭނުންވާ ފޯކަސް މުޅި ޓީމުގައި އޮންނާނީ އެންމެން އެއް މިސްރާބަކަށް ގޮސްގެން ކަން އާޓެޓާގެ ވާހަކައިގައި ވަނީ ފާހަގަކޮށްފަ އެވެ.
އާސެނަލުން އަންނަނީ ޓްރާންސްފާ މާކެޓްގައި އިތުރު ޑިފެންޑަރެއް ހޯދަން މަސައްކަތް ކުރަމުންނެވެ. އެ ގޮތުން އާސެނަލުން މަސައްކަތް ކުރަނީ އަޔަކްސް އަށް ކުޅެމުން އަންނަ އާޖެންޓީނާގެ ޑިފެންޑަރު ލިސަންދްރޯ މާޓިނޭޒް ގަންނާށެވެ. މާޓީނޭޒްގެ ސޮއި ހޯދަން އާސެނަލުން، ޖުމްލަ އެކު، 65 މިލިއަން ޑޮލަރު ހަރަދުކުރަން ތައްޔާރަށް އޮތް ކަމަށް މީޑިއާ ރިޕޯޓްތައް ބުނެ އެވެ.
