ގައުމީ ސާފިން ލީގުގެ ތިން ވަނަ މުބާރާތް ކަމަށްވާ "ހުރާކޮޅު ރާޅުގަނޑު" ވެސް ކާމިޔާބުކޮށް، ކ. ތުލުސްދޫ އަށް އުފަން ކުޅަދާނަ، ސާފަރު، އަހުމަދު އާގިލް (އައްމަޑޭ) ރާއްޖޭގެ އެއް ވަނަ އަށް ޖެހިލައިފި އެވެ.
މިދިޔަ ނޮވެމްބަރު މަހު މާލޭގައި ބޭއްވި ގައުމީ ސާފިން މުބާރާތުން އައްމަޑޭ ދިޔައީ ދެ ވަނަ އެވެ. އޭގެ ފަހުން ފެބްރުއަރީ މަހު ގދ. ގައްދޫގައި ބޭއްވި ގައުމީ ސާފް ލީގު ފުރަތަމަ މުބާރާތް ކަމަށްވާ "ކަޅެގަލެކޮޑާ 2022" ގައި އެހާ ބޮޑަށް އައްމަޑޭގެ ވާހަކަ ނުދެކެވުނު ނަމަވެސް އެ މުބާރާތަށް ފަހު އޭނާގެ އެނބުރި އައުން މި ފެންނަނީ ވަރަށް ވަރުގަދަ ކޮށެވެ.
މިދިޔަ މެއި މަހު މ. މުލީގައި ބޭއްވި "މުލީކޮޅު ރާޅުގަނޑު"ގެ ޗެމްޕިއަންކަން ހޯދައި، އައްމަޑޭ ފިޔަވަޅެއް ކުރިއަށް އެޅި އެވެ. ސާފް ލީގުގެ ދެވަނަ މުބާރާތުގެ ޗެމްޕިއަންކަން ހޯދި އައްމަޑޭ، ދެން ކުރިއަށް ވިސްނައި، ލީގުގައި ކުރިއަށްދާން ކުރާ މަސައްކަތަށް އިތުރު ފުރިހަމަކަމެއް ގެނެސްދިނީ މިއަދު ރ. ކިނޮޅަހުގައި ނިމުނު، "ހުރާކޮޅު ރާޅުގަނޑު" ގެ ޗެމްޕިއަންކަން ވެސް ހޯދައި، ރޭންކިން ކުރިއަށް ޖެހިލުމުންނެވެ.
"ހުރާކޮޅު ރާޅުގަނޑު"ގެ ފައިނަލްގައި އައްމަޑޭ ވާދަކުރީ ޖޫނިއާ ޗެމްޕިއަން ޝާނިފް ޝަފީގްއާ އެވެ. ޖޫނިއާ ކުޅުންތެރިއަކާ އޯޕަން ބައިގައި ވާދަކުރަން ޖެހުނަސް އައްމަޑޭ އަށް މި ފައިނަލް ހީޓް ވީ ފަސޭހަ ޗެލެންޖަކަށް ނޫނެވެ. ގިނަ ބަޔެއްގެ ކުރިމަތީގައި ކުރިއަށްދިޔަ ފައިނަލް ހީޓުގެ ފޯރި ވެސް ފެނުނީ ގަދަ ކޮށެވެ.
އައްމަޑޭ ފައިނަލުގައި 10 ރާޅާ އެޅިއިރު، ޖުމްލަ ސްކޯ އަކީ 12.93 ޕޮއިންޓެވެ. އައްމަޑޭ އަށް ވުރެ އެއް ރާޅު މަދުން އެޅި ޝާނިފް ވެސް ޖުމްލަކޮށް ބަލާއިރު، ޖޫނިއާ ލެވަލްގެ ސާފަރަކާ ބަލާއިރު ފެނުނީ ހިތްވަރު ގަދަކޮށެވެ.
ރާޅާ އެޅުންތެރިން އުފެދެމުން އަންނަ ރަށެއް ކަމަށްވާ، މ. މުއްޔަށް ނިސްބަތްވާ ޝާނިފްގެ ޖުމްލަ ސްކޯ އަކީ 9.03 ޕޮއިންޓެވެ. ޝާނިފް އަކީ އެންމެ ފަހުން ބޭއްވި މުބާރާތުގެ ވެސް ޖޫނިއާ ޗެމްޕިއަން އެވެ. މި ފަހަރު އޭނާ ޖޫނިއާ ބައިގެ ޝަރަފްވެރި އެއް ވަނަ ހޯދީ ފައިނަލް ހީޓުގައި ޔޫސުފް ކަޔާން ހަމްދާން ޒަކީގެ މައްޗަށް ކުރިހޯދައިގެންނެވެ.
މުޅިން ރާއްޖެ އަށް ފުޅާކޮށްގެން މޯލްޑިވްސް ސާފިން އެސޯސިއޭޝަނުން، ދިވެހި ސާފް ލީގު ކުރިއަށްގެންދާއިރު، ދެން ބާކީ އޮތީ ދެ މުބާރާތެވެ. އެ ގޮތުން ދެން ކުރިއަށް އޮތީ އަންނަ އޮކްޓޫބަރު މަހު ކ. ހިންމަފުށީގައި ބާއްވާ މުބާރާތެވެ. ފަހު މުބާރާތް ކަމަށްވާ "ރަންނަމާރި ޗެލެންޖް" މާލޭގައި އޮންނާނީ ނޮވެމްބަރު މަހުގެ ތެރޭގައި ކަމަށް ސާފިން އެސޯސިއޭޝަނުން ބުނެފައިވެ އެވެ.
