އެމްޓީސީސީ ސާފް ލީގުގެ ދެ ވަނަ މުބާރާތުގައި ރާއްޖޭގެ އެއް ވަނަ ރާޅާ އެޅުންތެރިޔާ އިސްމާއީލް ރަޝީދު (ސްމައިލީ) ކަޓައިފި އެވެ.
"މުލީކޮޅު ރާޅުގަނޑު" ނަމުގައި ބާއްވާމުން އަންނަ މުބާރާތަކީ އެމްޓީސީސީ ސާފް ލީގުގެ ދެ ވަނަ މުބާރާތެވެ. މ. މުލީގައި ކުރިއަށްދާ މުބާރާތުގެ ފިރިހެން އޯޕަން ބައިގައި 32 ރާޅާ އެޅުންތެރިން ވާދަކުރާއިރު، ޖޫނިއާ ބައިގައި 16 ރާޅާ އެޅުންތެރިން ވާދަކުރެ އެވެ.
ރާއްޖޭގެ އެއް ވަނަ ރާޅާ އެޅުންތެރިޔާ ސްމައިލީ މުބާރާތާއި އަލްވަދާއު ކިޔަން ޖެހުނީ ފަސް ވަނަ ބުރުގެ ކޮލިފައިން ހީޓުގަ އެވެ. އޭނާ ކޮލިފައިން ހީޓުގައި ވާދަކުރަން ޖެހުނީ ތިން ވަނަ ބުރުގައި އޭނާ ވާދަކުރި ހީޓުން އެއް ވަނަ ނުލިބުމުންނެވެ.
ސްމައިލީ ކަޓުވާލައި ފަސްވަނަ ބުރުން ޖާގަ ހޯދީ ރާއްޖޭގެ ޖޫނިއާ ރޭންކިންގެ ދެ ވަނައިގައި އުޅޭ އައިހަމް އަދުނާނެވެ. އައިހަމް ސްމައިލީ ބަލިކުރީ 9.33 ގެ ސްކޯ އަކުންނެވެ. ސްމައިލީ އަށް ލިބުނީ 7.93 ގެ ސްކޯ އެކެވެ.
ރާއްޖޭގެ ސީނިއާ އެއް ވަނަ ސްމައިލީ މުބާރާތުން ކެޓިއިރު، ޖޫނިއާ އެއް ވަނަ ޝަރޫފް ޝާއިރު ވެސް ވަނީ ފަސް ވަނަ ބުރުގެ ކޮލިފައިން ހީޓުގައި ވާދަކޮށް ކަޓައިފަ އެވެ.
އެމްޓީސީސީ ސާފް ލީގުގެ ފުރަތަމަ މުބާރާތް ކަމަށްވާ ކަޅެގަލެކޮޑާ 2022 ގެ ޖޫނިއާ ޗެމްޕިއަންކަން ހޯދި ކ. ގުރައިދޫގެ ޝަރޫފު ކެޓީ ޝައިހާން ހުސެއިން ސޮލާހާ ވާދަކޮށް އެއް ޕޮއިންޓުގެ ތަފާތުންނެވެ.
ފަސް ވަނަ ބުރުގެ ފުރަތަމަ ހީޓުގައި ވާދަކުރާނީ ރާއްޖޭގެ އެއް ވަނަ ސްމައިލީ ކަޓުވާލި ދެ ރާޅާ އެޅުންތެރިން ކަމަށްވާ އަލީ ރީހާން މުހައްމަދު އާއި އައިހަމް އަދި ތަޖުރިބާކާރު ރާޅާ އެޅުންތެރިޔާ އިސްމާއިލް މިގްލާލް (ކުޑަ އިއްސެ) އެވެ.
ދެ ވަނަ ހީޓުގައި އެންމެ ފަހުގެ ގައުމީ ޗެމްޕިއަން ހޫދު އަހުމަދު ނުކުންނާނީ ޖައިލަމް ނިޒާރު އާއި އަލީ ރިޒާއާ ދެކޮޅަށެވެ. ތިން ވަނަ ހީޓުގައި ގައުމީ ޓީމުގެ ޒުވާން ރާޅާ އެޅުންތެރިޔާ ނަޖާހު މުހައްމަދު (ކަނބޯ) އާއި މުހައްމަދު އަތޫފް އަދި ހަސަން ނާސިހު ވާދަކުރާނެ އެވެ.
މުހައްމަދު ފަޔާޒު (ޕެލޭ) އާއި އާދަމް މުއީން އިބްރާހިމް އަދި މުހައްމަދު އިބްރާހިމް ވާދަކުރާނީ ހަތަރު ވަނަ ހީޓުގަ އެވެ. ގައުމީ ޓީމްގެ އަހުމަދު އާގިލް (އައްމަޑޭ) އާއި ޖިނާން އަހުމަދު އަދި ޝައިހާން ހުސައިން ސޮލާހު ވާދަކުރާނީ ފަސް ވަނަ ހީޓުގަ އެވެ. ފަހު ހީޓުގައި ވާދަކުރާނީ އަހުމަދު އަރްޒާން އާއި ޝާނިފް ޝަފީގު އަދި ޖުމާން މުހައްމަދެވެ.
މުބާރާތުގައި މާދަމާ ކުރިއަށްދާނީ ފަސް ވަނަ ބުރުގެ ހީޓުތަކެވެ. ކޮންމެ ހީޓެއްގައި ތިން ރާޅާ އެޅުންތެރިން ވާދަކުރާއިރު އެއް ވަނަ އާއި ދެ ވަނަ ކޮލިފައިވާނީ ހަ ވަނަ ބުރަށެވެ. ހަ ވަނަ ބުރުން ކުއާޓާ ފައިނަލަށް ކޮލިފައިވާނީ ހަ ރާޅާ އެޅުންތެރިންނެވެ.
އެމްއެސްއޭގެ ގައުމީ ސާފް ލީގު މި އަހަރު ރާއްޖޭގެ ފަސް ސަރަހައްދެއްގައި ބާއްވާން ނިންމާފައިވާއިރު ފުރަތަމަ މުބާރާތް ގދ. ގައްދޫގައި ބާއްވާފައިވަނީ މިދިޔަ ފެބްރުއަރީ މަހުގަ އެވެ. ދެ ވަނަ މުބާރާތް މ.މުލީގަ ކުރިއަށްދާއިރު، ތިންވަނަ މުބާރާތް ރ.ކިނޮޅަހުގައި އޮންނާނީ ޖުލައި މަހުގެ 5-9 އަށެވެ. ހަތަރު ވަނަ މުބާރާތް ހިންމަފުށީގައި އޮންނާނީ އޮކްޓޯބަރު 4-8 އަށެވެ. އަދި ފަހު މުބާރާތް ކަމަށްވާ "ރަންނަމާރި ޗެލެންޖް" މާލޭގައި އޮންނާނީ ނޮވެމްބަރު މަހުގެ 18-25 އަށެވެ.
