ބާސެލޯނާ (މެއި 2) - ސްޕެނިޝް ލީގުގައި ރޭ ރެއާލް މަޔޯކާ އަތުން 2-1 އިން މޮޅުވެ، ބާސެލޯނާ އަށް ލީގުގެ ދެ ވަނަ އަށް އެރުމުން މި ވަގުތަށް ހަމަޖެހުމެއް ލިބިފައިވާ ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.
ބާސެލޯނާ ރޭގެ މެޗަށް ނުކުތްއިރު މި ހަފްތާގައި ކުޅުނު މެޗުން މޮޅުވެގެން، ރެއާލް މެޑްރިޑް ވަނީ 35 ވަނަ ފަހަރަށް ސްޕެނިޝް ލީގު ކާމިޔާބުކޮށްފަ އެވެ. އަދި ހުކުރު ދުވަހުގެރޭ ސެވިއްޔާ އިން ހޯދި ޕޮއިންޓާ އެކު އެ ޓީމު އޮތީ ދެ ވަނައިގަ އެވެ. ރޭ ބާސެލޯނާ އިން ހޯދި މޮޅާ އެކު ދެ ވަނަ އަށް ވަނީ އަލުން އަރައިފަ އެވެ. އެއް ވަަނައިގައި އޮތް ރެއާލަށް 34 މެޗުން 81 ޕޮއިންޓް ލިބިފައިވާއިރު، ބާސެލޯނާ ދެ ވަނައިގައި އޮތީ 34 މެޗުން 66 ޕޮއިންޓާ އެކު އެވެ. ސެވިއްޔާ ތިން ވަަނައިގައި އޮތީ 34 މެޗުން 64 ޕޮއިންޓް ހޯދައިގެންނެވެ. ހަތަރު ވަނައިގައި އޮތް އެތުލެޓިކޯ މެޑްރިޑަށް ވަނީ 34 މެޗުން 61 ޕޮއިންޓް ލިބިފަ އެވެ.
ޒަވީ ބުނީ ރެއާލަށް ޗެމްޕިއަންކަން ހައްގުވާ ކަމަށާއި މިހާރު ބާސެލޯނާ އިން ވިސްނަންވީ ދެ ވަަނަ ހޯދުމަށް ކަމަށެވެ. އަދި އެ މަސައްކަތުގައި މަޔޯކާ އަތުން ލިބުނު މޮޅާ އެކު އަމިއްލަ އަތުގައި ކޮންޓްރޯލް ދެމެހެއްޓިފައިވާތީ ހަމަޖެހިލެވޭނެ ކަމަށް ޒަވީ ބުންޏެވެ.
"ދެ ވަނައިގައި ނިންމަން ބޭނުން. އަނެއްކޮޅުން އަންނަ ސީޒަނުގެ ޗެމްޕިއަންސް ލީގުގައި ކުޅެން ބޭނުންނަމަ މިއީ މި ވަގުތަށް ޕްރެޝަރު ކަނޑުވާލަން އަހަރެމެންނަށް ވަރަށް މުހިންމު މޮޅެއް، މީގެ ބޭނުން ހިފޭނެެ، މި ނަތީޖާ އިން މި ވަގުތަށް ހަމަޖެހިލެވޭނެ،" ޒަވީ ބުންޏެވެ.
މަޔޯކާގެ އަރައިއޯ (ކ) ކައިރިން ބާސެލޯނާގެ އަންސޫ ފާޓީ (ވ) ބޯޅަ ހިފައިގެންދަނީ: މިއީ އަނިޔާއިން ރަނގަޅުވެގެން އެނބުރި އައިސް ފާޓީ މި ފަހުން ކުޅުނު ފުރަތަމަ މެޗު.
ބާސެލޯނާ ދަނޑުގައި ރޭ އެ ޓީމަށް 25 ވަނަ މިނިޓްގައި ލީޑުނަގައިދިނީ ޖޯޑީ އަލްބާ ދިން ބޯޅައަކުން މެމްފިސް ޑިޕާއި އެވެ. މިއީ މި ފަހަރު ލީގުގައި ޑިޕާއި ޖެހި 11 ވަނަ ގޯލެވެ.
ލީޑުފުޅާކުރަން ބާސެލޯނާ އިން ކުރި މަސައްކަތް ކާމިޔާބުވީ މެޗުގެ ދެ ވަނަ ހާފްގަ އެވެ. މެޗުގެ 54 ވަނަ މިނިޓްގައި ބާސެލޯނާގެ ކެޕްޓަން ސާޖީ ބުސްކެޓްސް އޭރިއާރޮނގުކައިރިން ޖެހި ބޯޅަ އަމާޒުވީ ގޯލުގެ ތިރީ ކަަަނަށެވެ. ބާސެލޯނާގެ ފޯވާޑް ފެރާން ޓޮރޭޒް ޖެހި ގޯލެއް ވަނީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި، ބަލައިނުގަންނަން ނިންމައިފަ އެވެ.
މި މެޗުގައި މަޔޯކާގެ ގޯލު ޖެހީ އެ ޓީމުގެ ކެޕްޓަން އެންޓޯނިއޯ ރައީއޯ އެވެ. މެޗުގެ 79 ވަނަ މިނިޓްގައި އޭނާ މި ގޯލު ޖެހީ ހިލޭ ޖެހުމަކުން އޭރިއާތެރެއަށް ހުރަސްވި ބޯޅައަކުންނެވެ. ފަހުން އިތުރު ގޯލެއް ޖަހަައި ނަތީޖާ ހަމަހަމަކުރަން، މަޔޯކާ އިން ކުރި މަސައްކަތް ކާމިޔާބެއްނުވި އެެވެ.
