އުރީދޫ ދިވެހި ޕްރިމިއާ ލީގުގައި މިރޭ ކްލަބް ގްރީން ސްޓްރީޓްސްއާ 1-1 އިން އެއްވަރުވެ، ލީގުގެ ތިން ވަނަ އަށް ޖެހިލަން ލިބުނު ފުރުސަތު ޔުނައިޓެޑް ވިކްޓްރީ (ޔޫވީ) އަށް ގެއްލިއްޖެ އެވެ.
ތިން ވަަނައިގައި އޮތް ކްލަބް ވެލެންސިއާ އަށް ނުވަ މެޗުން 13 ޕޮއިންޓް ލިބިފައިވާއިރު، މިރޭ ޔުނައިޓެޑް ވިކްޓްރީ މޮޅުވިނަމަ ވެލެންސިއާއާ ޕޮއިންޓުގެ ގޮތުން އެއްވަރުކޮށް، ލަނޑުގެ ތަފާތުން ކުރި ލިބޭނެ އެވެ. އެކަމަކު، ޔުނައިޓެޑް ވިކްޓްރީ އެއްވަރުވުމުން އޮތީ ހަ ވަނައިގަ އެވެ.
ލީގުގެ ހަތަރު ވަނައިގައި އޮތް ޓީސީ ސްޕޯޓްސް ކްލަބާއި ފަސް ވަނައިގައި އޮތް ސުޕަ ޔުނައިޓެޑް ސްޕޯޓްސް (ސަސް) އަދި ހަ ވަނައިގައި އޮތް ޔުނައިޓެޑް ވިކްޓްރީ އަށް ވަނީ 11 ޕޮއިންޓް ލިބިފަ އެވެ. ޓީސީ އެއް މެޗު މަދުވި ނަމަވެސް އެ ޓީމަށް ފައިދާ ގޯލުން ކުރި ލިބެ އެވެ. ސަސް އާއި ޔުނައިޓެޑް ވިކްޓްރީ އޮތީ ހުރިހާ ގޮތަކުން އެއްވަރުވެފަ އެވެ.
މިރޭގެ މެޗު ފަށައިގެން ދެ ޓީމުގެ ފަރާތުން އަވަސް ކުޅުމެއް ފެނިގެންދިޔައިރު، ޔުނައިޓެޑް ވިކްޓްރީން ވަނީ ތިން ވަނަ މިނިޓްގައި ފުރަތަމަ ހަމަލާ ފޮނުވާލައިފަ އެވެ. އެ ގޮތުން އެ ޓީމުގެ ބެލަރޫސް ފޯވާޑް، އިވާން ވެރާސް އޭރިއާތެެރެއިން ޖެހި ބޯޅަ ދިޔައީ އަރިމަތިން ބޭރުންނެވެ. މެޗުގެ 21 ވަނަ މިނިޓްގައި ޔުނައިޓެޑް ވިކްޓްރީގެ ކިރްގިސްތާން މިޑްފީލްޑަރު، އަަނަޓޯލީ ވްލަޝީޗޭފް (ޓޯނީ) ނެގި ހުރަހަކުން އޭރިއާތެރެއިން އެ ޓީމުގެ އަލީ ހައިޝަމް (ޗުމްޕު) ފޮނުވާލި ބޯޅަ ގްރީން ސްޓްރީޓްސްގެ ޕާކިސްތާން ގޯލްކީޕަރު ހަނީފް ސާގިބް ވަނީ މަތަކޮށްފަ އެވެ. އޭގެ ހަތަރު މިނިޓް ފަހުން ޗުމްޕު، ހުސްކޮށް ހުރެފައި ޖެހި ބޯޅަ ވެސް ހުއްޓުވީ ކީޕަރު ސާގިބު އެވެ.
ގްރީން ސްޓްރީޓްސްގެ އިވާން (ކ) ޔުނައިޓެޑް ވިކްޓްރީގެ ޝަންމު ކައިރިން ބޯޅަ ހިފައިގެންދާން މަސައްކަތްކުރަނީ.-- ފޮޓޯ: އަބްދުﷲ އިޔާން/ އަދަދު
ގްރީން ސްްޓްރީޓްސް އިން ފުރަތަމަ ހާފުގެ މެދަކާ ހަމައިން ރަނގަޅު އެޓޭކްތަކެއް ކުރަން ފެށި އެވެ. މެޗުގެ 36 ވަމަ މިނިޓްގައި ގްރީން ސްޓްރީޓްސް ކޮލަމްބިއާ ފޯވާޑް ހޯސޭ އަވީލާ، އޭރިއާބޭރުން ޖެހި ބޯޅަ ޔުނައިޓެޑް ވިކްޓްރީގެ އަހުމަދު އަނަފް ޒަރިޔަންދު ވަނީ މަތަކޮށްފަ އެވެ. އަވީލާ އެ ބޯޅަ ފޮނުވާލުމުގެ ބަދަލުގައި، އޭރިއާތެރެއަށް ހުސްކޮށް ވަން އެ ޓީމުގެ އަންސަރު އިބްރާހިމް (އަންކޮ) އަށް ދީގެން ގޯލަށް ޖަހަން ފުރުސަތު އޮތެވެ.
މެޗުގެ 44 ވަނަ މިނިޓްގައި ގްރީން ސްޓްރީޓްސްގެ ކީޕަރު ސާގިބް އަތުގައި ޖެހިފައި އައި ރީބައުންސް ބޯޅައަކުން ޔުނައިޓެޑް ވިކްޓްރީގެ މުހައްމަދު ރީހާން ވަނީ ގޯލެއް ޖަހައިފަ އެވެ. އެކަމަކު، ލައިންސްމަން ވަނީ އޮފްސައިޑަށް ދިދަ ނަގައިފަ އެވެ.
ފުރަތަމަ ހާފުގެ އިތުރު ވަގުތުގައި ގްރީން ސްޓްރީޓްސް އަށް ލީޑުނަގައިދިނީ އަވީލާ އެެވެ. ގްރީން ސްޓްރީޓްސްގެ ސްޕެއިން މިޑްފީލްޑަރު، އެންހެލް މުނޯޒް ހިލޭ ޖެހުމަކުން ނެގި ބޯޅަ ޔުނައިޓެޑް ވިކްޓްރީގެ ކީޕަރު އަނަފް އަތުގައި ޖެހިފައި ނުކުތް ވަގުތު އަވީލާ ވަނީ ވެއްޓިގެންފައި ގޯލުގެ ތެރެއަށް ބޯޅަ ފޮނުވާލައިފަ އެވެ.
ދެ ވަނަ ހާފްގެ ކުޅުން ފެށިގެން 35 ސިކުންތު ތެރޭގައި ޔުނައިޓެޑް ވިކްޓްރީން ގޯލެއް ޖަހަން ފުރުސަތެއް ތަނަވަސްކުރި އެވެ. ޔުނައިޓެޑް ވިކްޓްރީގެ ފުލްބެކް، މޫސާ އަޒީމް ހަަސަން ނެގި ހުރަހަކުން އިވާން ޖެހި ބޯޅަ ރަނގަޅަށް ފައިގައި ލައްވައިނުލުމުން ދިޔައީ އަރިމަތިން ބޭރުންނެވެ. އޭގެ ދެ މިނިޓް ފަހުން، ޗުމްޕު އަށް ހުސްކޮށް ލިބުނު ބޯޅަ ބޮލުން ފޮނުވާލި ނަމަވެސް ދިޔައީ ދަނޑިކައިިރިން ބޭރުންނެވެ.
ފުލުފުލުގައި ޔުނައިޓެޑް ވިކްޓްރީން އެޓޭކްތައް ކުރަމުންދިޔައިރު، މެޗުގެ 60 ވަަނަ މިނިޓްގައި އޭރިއާބޭރުން ޖަޕާންގެ މިޑްފީލްޑަރު އެެއިސޫކޭ މޯރީ ޖެހި ބޯޅަ ކީޕަރު ސާގިބް ވަނީ މަތަކޮށްފަ އެވެ. އޭގެ ތިން މިނިޓް ފަހުން އޭރިއާބޭރުން ޓޯނީ ޖެހި ބޯޅަ ވެސް ކީޕަރު ސާގިބް ވަނީ ހުއްޓުވައިފަ އެވެ.
ޔުނައިޓެޑް ވިކްޓްރީ އެއްވަރުކުރީ މެޗުގެ 85 ވަނަ މިނިޓްގައި ޓޯނީ ޖެހި ހިލޭ ޖެހުމުންނެވެ. މިއީ ގްރީން ސްޓްރީޓްސްގެ ކުޅުންތެރިއަކު އަތުގައި ބޯޅައިން ޖެހުމުން ރެފްރީ ދިން ހިލޭޖެހުމެކެވެ. ޓޯނީ ފޮނުވާލި ހިލޭޖެހުން ގޯލުގެ މަތީ ކަނަށް ވަންއިރު، ކީޕަރު ސާގިބަށް އެ ބޯޅަ ހުއްޓުވަން މާ ބޮޑު ކަމެއް ނުކުރެވުނެވެ.
ޔުނައިޓެޑް ވިކްޓްރީން އެއްވަރުކުރިތާ މިނިޓެއް ފަހުން ކައުންޓަ އެޓޭކެއްގައި ގްރީން ސްޓްރީޓްސްގެ ޗޯޓު އޭރިއާތެރެއިން ވަދެ، ދެ ކުޅުންތެރިން ކައިރިން ދެމިގަތުމަށް ފަހު ފޮނުވާލި ބޯޅަ ދިޔައީ ހުރަސްދަނޑިމަތިންނެވެ. މެޗުގެ 88 ވަނަ މިނިޓްގައި ގްރީން ސްްޓްރީޓްސް އޭރިއާ ރޮނގުކައިރިން ޔުނައިޓެޑް ވިކްޓްރީ އަށް ލިބުނު ހިލޭޖެހުމަކުން އިވާން ޖެހި ބޯޅަ ދިޔައީ ދަނޑިކައިރިން ބޭރަށެވެ.
ލީގުގައި މާދަމާރޭ ކުޅޭ މެޗުގައި ލީގުގެ ދެ ވަނައިގައި އޮތް ކްލަބް އީގަލްސް ކުޅޭނީ ޓީސީއާ އެވެ. މެޗު ފަށާނީ 22:00 ގަ އެވެ.
