އަންނަ ޖުލައި މަހު ރާއްޖޭގައި ބާއްވަން މަސައްކަތް ކުރަމުން އަންނަ އައިބީސީ ވޯލްޑް ޓުއާގެ މޯލްޑިވްސް ޕްރޯގެ ކަންތައްތަކާއި ގުޅޭގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާ އެކު މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން މަޝްވަރާކޮށްފި އެވެ.
މި އަހަރު ޖުލައި 29 އިން އޮގަސްޓް 7 ވަނަ ދުވަހަށް ޝެޑިއުލްކޮށްފައިވާ އައިބީސީ މޯލްޑިވްސް ބޮޑީބޯޑް ޕްރޯ ބާއްވަން ރާއްޖެ އަށް ފުރުސަތު ލިބިފައިވާކަން އިއުލާންކޮށްފައިވަނީ މިދިޔަ މަހު ނިމުނު އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖް 2022 ވަނަ އަހަރުގެ މުބާރާތް ނިމުމުގެ ރަސްމިއްޔާތުގެ ތެރެއިންނެވެ.
މި މުބާރާތް ރާއްޖޭގައި ބޭއްވުމާއި ގުޅޭގޮތުން އެމްބީބީއޭއިން ވަނީ ދާދިފަހުން ރައީސް ސޯލިހު އާ މަޝްވަރާކޮށްފަ އެވެ. އެ ގޮތުން މި މުބާރާތުގެ ތަފްސީލްތަކާއި ރާއްްޖެއިން މުބާރާތް ހޮސްޓްކުރަން ހުރި ދަތިތައް ވެސް އެ އެސޯސިއޭޝަނުންވަނީ ރައީސްއާ ހިއްސާކޮށްފަ އެވެ.
މި ބައްދަލުވުމުގައި ރައީސް ސޯލިހު ވަނީ ވޯލްޑް ޓުއާގެ ރާއްޖޭގައި ބާއްވާ މުބާރާތުގެ އެކި އެކި ކަންކަމަށް ސަރުކާރުން ފުރިހަމަ އެއްބާރުލުމާއި އެހިތެރިކަން ދެއްވާނެކަމަށް ވިދާޅުވެފަ އެވެ.
އެމްބީބީއޭގެ ޖެނެރަލް ސެކެޓްރީ ހަސަން ރަޝީދު (ރަޝް) ވިދާޅުވީ މި މުބާރާތް ބާއްވަން ފައިނަލް ވުމުގެ ކުރިން ނިންމަން ޖެހޭ ގިނަ ކަންތަކެއް އެބަހުރި ކަމަށެވެ. މި ދުވަސްވަރު ކުރިއަށްދަނީ މި ކަންކަން ހަމަޖެއްސުމުގެ މަސައްކަތްތައް ކަމަށް ވިދާޅުވި އެވެ. އަދި ރައީސް ސޯލިހުއާ އެކު ބޭއްވުނު ބައްދަލުވުމަކީ ސަރުކާރުގެ ފަރާތުން ހަމަޖައްސަން ހުރި ކަންކަމާއި ގުޅޭގޮތުން މަޝްވަރާ ކުރަން ކުރިއަށްދިޔަ ބައްދަލުވުމެއް ކަމަށް ރަޝް ފާހަގަކުރެއްވި އެވެ.
އެންމެ ފަހުން ރާއްޖޭގައި ބޭއްވި ބައިނަލްއަގުވާމީ ބޮޑީބޯޑިން މުބާރާތަކީ 2015 ވަނަ އަހަރު ބޭއްވި މޯލްޑިވްސް އޯޕަން އެވެ. އައިބީސީ ޕްރޯ މުބާރާތް ރާއްޖޭގައި ބޭއްވިއްޖެނަމަ އެ ވެގެންދާނީ މިހާތަނަށް ރާއްޖޭގައި ހޯސްޓްކުރެވޭ އެންމެ މަތީ ފެންވަރުގެ ބޮޑީބޯޑިން އިވެންޓަށެވެ.
އައިބީސީ ވެބްސައިޓްގައިވާ ގޮތުން ފިރިހެން ކެޓަގަރީން 2500 ޕޮއިންޓް، އަންހެން ކެޓަގަރީން 1500 ޕޮއިންޓް، ޖޫނިއާ މެން 2000 ޕޮއިންޓް އަދި ޑްރޮޕްނީ ކެޓަގަރީން 2000 ޕޮއިންޓް މި މުބާރާތަށް ވަނީ ލިސްޓްކުރެވިފަ އެވެ. ރާއްޖޭގައި ހޯސްޓްކުރާ މި މުބާރާތަކީ އައިބީސީ ވޯލްޑް ޓުއާގެ ބައެކެވެ.
