މެޑްރިޑް (އޭޕްރީލް 11) - ސްޕެނިޝް ލީގުގެ ރެލިގޭޝަން ޒޯނުގައި އޮތް ލެވަންޓޭ އަތުން ފަހު ވަގުތު ގޯލު ޖަހައި 3-2 އިން މޮޅުވެ، ބާސެލޯނާ އަލުން ލީގުގެ ދެ ވަނަ އަށް ރޭ ޖެހިލައިފި އެވެ.
ބާސެލޯނާ އިން ރޭގެ މެޗަށް ނުކުތްއިރު، ހުކުރު ދުވަހުގެރޭ ގްރަނާޑާ އަތުން ހޯދި މޮޅާ އެކު ސެވިއްޔާ އޮތީ ދެ ވަނައިގަ އެވެ. ބާސެލޯނާ އިން ދެ ވަނަ އަށް އެރީ ފަހަތުން އަރައި މޮޅުވެގެންނެވެ. އެއް ވަނައިގައި އޮތް ރެއާލް މެޑްރިޑަށް 31 މެޗުން 72 ޕޮއިންޓް ލިބިފައިވާއިރު، ދެ ވަނައިގައި ބާސެލޯނާ އޮތީ 30 މެޗުން 60 ޕޮއިންޓް ހޯދައިގެންނެވެ. ތިން ވަނައިގައި އޮތް ސެވިއްޔާ އަށް ވެސް ވަނީ 31 މެޗުން 60 ޕޮއިންޓް ލިބިފަ އެވެ. އެތުލެޓިކޯ މެޑްރިޑް ހަތަރެއްގައި އޮތީ 31 މެޗުން 57 ޕޮއިންޓް ހޯދައިގެންނެވެ.
އަމިއްލަ ދަނޑުގައި ކުޅުނު ލެވަންޓޭ އިން ރޭގެ މެޗުގެ ފުރަތަމަ ހާފުގައި ލީޑުނެގޭތޯ ރަނގަޅު ހަަމަލާތަކެއް ފޮނުވާލި އެވެ. އެ ގޮތުން ލެވަންޓޭގެ ކެޕްޓަން، ހޯސޭ ލުއިސް މޮރާލޭސް ބާސެލޯނާގެ ޑިފެންސް ތެރެއިން ދެމިގަނެ ގޯލަށް ޖަހަން ފޮނުވާލި ބޯޅަ ރޮނގުމަތިން ސަލާމަތްކުރީ ބާސެލޯނާގެ ޑިފެންޑަރު އެރިކް ގާސިއާ އެވެ.
ދެ ވަނަ ހާފްގައި ކުޅުން ފަށައިގެން ހަތް ވަނަ މިނިޓްގައި ލެވަންޓޭ އިން ލީޑުނެގީ މޮރާލޭސް ވައްދާލި ޕެނަލްޓީންނެވެ. މިއީ ބާސެލޯނާގެ ޑެނީ އަލްވޭސް ކުރި ފައުލަކަށް ދިން ޕެނަލްޓީ އެކެވެ. އޭގެ އިރުކޮޅެއް ފަހުން އެރިކް ގާސިއާ އަތުގައި ބޯޅަ ޖެހުމުން، ލެވަންޓޭ އަށް ދެ ވަނަ ޕެނަލްޓީއެއް ދިނެވެ. އެކަމަކު، ލީގުގެ 19 ވަނައިގައި އޮތް ލެވަންޓޭ އަށް ލީޑުފުޅާކޮށްދޭން ރޮޖާ ފޮނުވާލި ޕެނަލްޓީ ބާސެލޯނާ ކީޕަރު ޓާ ސްޓެގެން މަތަކުރި އެވެ.
ބާސެލޯނާ އިން ވަނީ ޕެޑްރޯ އާއި ގަވީ ކުޅެން އަރުވައި، ގާތްގާތުގައި ދެ ގޯލު ޖަހައި ނަތީޖާ އަނބުރާލައިފަ އެވެ.
މެޗުގެ 58 ވަނަ މިނިޓްގައި އޮސްމާން ޑެމްބެލޭ ނެގި ހުރަހަކުން ބާސެލޯނާ އަށް އެއްވަރުކޮށްދިން ގޯލު ޖެހީ ޕިއޭ އެމެރިކް އޮބާމަޔަން ބޮލުންނެވެ. މިއީ ޖެނުއަރީ މަހު ބާސެލޯނާއާ ގުޅުނު ފަހުން އޭނާ ލީގުގައި ޖެހި އަށް ވަނަ ގޯލެވެ. އޭގެ ފަސް މިނިޓް ފަހުން ގަވީ ދިން ބޯޅައަކުން އޭރިއާތެެރެއިން ޕެޑްރީ ވަނީ މޮޅު ގޯލެއް ޖަަހައި ބާސެލޯނާ އަށް ލީޑުނަަގައިދީފަ އެވެ.
މެޗުގެ 83 ވަނަ މިނިޓްގައި ލެވަންޓޭ އަށް މެޗުގައި ތިން ވަނަ ޕެނަލްޓީއެއް ލިބުނެވެ. ބާސެލޯނާގެ ކްލެމެންްޓް ލޯންގްލޭ، ކުޅެން އެރިތާ މާގިނައިރެއްނުވެ، އޭރިއާތެރެއިން ލެވަންޓޭގެ ޑެނިއަލް ގޯމޭޒަށް ކުރި ފައުލަކަށް ޕެނަލްޓީ އެއް ދިނެވެ. އެ ޕެނަލްޓީ ކާމިޔާބުކޮށް، ގޮންޒާލޯ މެލޭރޯ ވަނީ ލެވަންޓޭ އަށް އެއްވަރުކޮށްދީފަ އެވެ. މެލޭރޯ ކުޅެން އެރީ ދެ ވަނަ ހާފުގައި ބަދަލަކަށެވެ.
މެޗު އެއްވަރުވާނެ ކަމަށް ބެލެވިފައިވަނިކޮށް، ބާސެލޯނާ އިން މޮޅުވާން ކުރި މަސައްކަތް ކާމިޔާބުވީ އިތުރު ވަގުތުގަ އެވެ. އިތުުރު ވަގުތުގެ ދެ ވަނަ މިނިޓްގައި ޖޯޑީ އަލްބާ ނެގި ހުރަހަކުން މި ގޯލު ޖެހީ ލޫކް ޑި ޔޯން ބޮލުންނެވެ.
