ކްރިކެޓް ބޯޑް އޮފް މޯލްޑިވްސް (ސީބީއޭއެމް) އިން ކޮންމެ ރަމަޟާން މަހަކަށް ހާއްސަކޮށްގެން ކުރިއަށްގެންދާ ކްރިކެޓް ކާނިވަލުގެ ޓޭޕް ބޯލް މުބާރާތުގައި އޭއާރްސީ ތިން މޮޅު ހަމަކުރިއިރު، ދިވެހި ސިފައިންގެ ކްލަބުން ފުރަތަމަ މޮޅު ހޯދައިފި އެވެ.
ކުޅިވަރު އެކުވެނި އެއް ނަމްބަރު ދަނޑުގައި އިއްޔެ ހަވީރު ކުޅުނު ފުރަތަމަ މެޗުގައި އޭއާރްސީ އަށް ޓޮސް ދިމާވުމުން ނިންމީ ބެޓް ކުރާށެވެ. އޭއާރްސީ މޮޅުވީ ހަ ލަނޑުންނެވެ. އަށް އޯވަރުގެ ތެރޭގައި އޭއާރްސީން ވަނީ 128 ލަނޑު އެއްކޮށްފަ އެވެ. އެ ޓީމުން އެންމެ ރަނގަޅު ކުޅުމެއް ދެއްކީ 29 ލަނޑު ހެދި ޒަކަރިއްޔާ އަބްދުލް ލަތީފް (ޒަކިއްޓެ) އެވެ. މެރީ ކޯނާގެ އަހުމަދު އަރަފާތު މި އިނިންސްގައި ތިން ވިކެޓް ނެގި އެވެ.
ޖަވާބުގައި މެރީ ކޯނާ އިން ކުޅެންއަރައި އަށް އޯވަރު ހަމަވިއިރު ހެދުނީ 102 ލަނޑެވެ. މެރީ ކޯނާ ޓީމުގެ މުހަންމަދު ހައިކަލް ވަނީ 31 ލަނޑު ހަދައިފަ އެވެ. އެ ޓީމުގެ މުހަންމަދު އަޒްލީ ވަނީ 18 ލަނޑު. ހަދައިފަ އެވެ. އާކް ޓީމ،ުގެ ލީމް ސަފީގް ދެ ވިކެޓް ނެގި އެވެ.
މި ނަތީޖާއާ އެކު އޭއާރްސީން ގްރޫޕް އޭގެ އެއް ވަނައިގައި އޮތީ ތިން މެޗުން ވެސް މޮޅުވެ، ހަ ޕޮއިންޓާ އެކު އެވެ. ދެ ވަނައިގައި އޮތް އެވިއާ މޯލްޑިވްސް އާއި ތިން ވަނައިގައި އޮތް ޑީއެސްސީ އަދި ހަތަރެއްގައި އޮތް ގަލޮޅު ކަންމައްޗަށް ވަނީ ދެ ޕޮއިންޓް ލިބިފަ އެވެ. ކުޅުނު ތިން މެޗުން ވެސް ބަލިވެ، މެރީ ކޯނާ އޮތީ މި ގްރޫޕްގެ ފުލުގަ އެވެ.
އިއްޔެ ކުޅުނު ދެ ވަނަ މެޗުގައި ގަލޮޅު ކަންމަތި ބަނަފްސާއާ ބައްދަލުކޮށް 32 ލަނޑުން މޮޅުވެ ސިފައިން ފުރަތަމަ މޮޅު ހޯދި އެވެ. ޓޮސް ދިމާވުމުން ކުޅެންއަރައި އަށް އޯވަރު ތެރޭގައި ސިފައިންގެ ޓީމުން 135 ލަނޑު ހެދިއިރު، އެ ޓީމުގެ އަލީ ނާޝިދު 35 ލަނޑު ހެދިއިރު، އެ ޓީމުގެ އަހުމަދު ހަސަން 31 ލަނޑު އަދި އަހުމަދު އަމްޖަދު 28 ލަނޑު ހެދި އެވެ.
ޖަވާބުގައި ކުޅެން އަރައި، ގަލޮޅު ކަންމަތި ބަނަފްސާ ޓީމަށް އަށް އޯވަރު ހަމަވިއިރު ހެދުނީ 103 ލަނޑެވެ. އެ ޓީމުން އެންމެ ރަނގަޅަށް ކުޅުނީ 33 ލަނޑު ހެދި އިސްމާއިލް އަނިލް އާއި 23 ލަނޑު އެއްކުރި އަލީ ސަރީފް އެވެ.
މިއަދު ކުޅޭނީ ގްރޫޕް ބީގެ ދެ މެޗެެވެ. އެ ގޮތުން 16:00 ގައި ފަށާ ފުރަތަމަ މެޗައި އައިބީއެސް ކުޅޭނީ ސުގަ ކޯންއާ އެވެ. ދެ ވަނަ މެޗުގައި ގްރޫޕް ބީގެ އެއް ވަނައިގައި އޮތް ސަންކުއިކް ލިލީ ކުޅޭނީ ދެ ވަނައިގައި އޮތް މީޓިއޯސްއާ އެވެ.
