ރޯދަ މަހު ކުރިއަށްދާ ކްރިކެޓް ކާނިވަލްގެ އޯޕަން މުބާރާތުގެ ޗެމްޕިއަންކަން ފިނޮޅުން ހޯދައިފި އެވެ.
ކުޅިވަރު އެކުވެނި ކްރިކެޓް ދަނޑުގައި އިއްޔެ ހަވީރު ކުޅުނު ފައިނަލް މެޗުގައި ފިނޮޅުން މިޓިއޯސް އަތުން ހަތަރު ވިކެޓުން މޮޅުވެފަ އެވެ.
ފައިނަލް މެޗުގައި ޓޮސް ދިމާވުމުން ފިނޮޅުން ނިންމީ ހޮވާށެވެ. އެންމެ ފުރަތަމަ ކުޅެން އަރައި މިޓިއޯސް އިން 8 އޯވަރުގެ ތެރޭގައި ތިން ކުޅުންތެރިން ނުބައިގެން 116 ލަނޑު ހެދި އެވެ. އެންމެ ރަނގަޅު ކުޅުމެއް ދެއްކީ، 11 ބޯޅައިން 32 ލަނޑު ހެދި އިބްރާހިމް އަލީ އާއި 16 ބޯޅައިން 32 ލަނޑު ހެދި ޝަފްރާޒް ޖަލީލް އެވެ.
ޖަވާބުގައި ކުޅެން އަރައި ފިނޮޅުން މެޗު ކާމިޔާބުކުރީ 7.3 އޯވަރުގެ ތެރޭގައި، ހަތަރު ކުޅުންތެރިން ނުބައިިވިއިރު، 118 ލަނޑު ހަދައިގެންނެވެ. ފިނޮޅު ޓީމަށް އެންމެ ގިނަ ލަނޑު ހަދައިދިނީ 13 ބޯޅައިން 31 ލަނޑު ހަދައިދިން މުހައްމަދު ސައީދު އެވެ. އެ ޓީމުގެ ހުސެއިން ރިމާޒް ވަނީ 11 ބޯޅައިން 24 ލަނޑު ހަދައިފަ އެވެ.
މުބާރާތުގެ އިންޑިވިޖުއަލް ވަނަތަކަށް ބަލާއިރު، އެންމެ ގިނަ ބޯޅަ ހިފި ކުޅުންތެރިން (މޯސްޓް ކެޗަސް) އަށް ތިން ކުޅުންތެރިއަކު ހޮވުނެވެ. އެއީ، ޝަފްރާޒް ޖަލީލް، އިޝާގް އަހުމަދު އަދި ހުސެއިން ރިމާޒް އެވެ.
އެންމެ ގިނަ ލަނޑު ހެދީ މިޓިއޯސްގެ އިބްރާހިމް އަލީ އެވެ. އެއީ، 134 ލަނޑެވެ. އަދި، އެންމެ ގިނަ ވިކެޓް ނެގީ މުހައްމަދު ސައީދު އެވެ.
ކްރިކެޓް ކާނިވަލުގައި މިއަދު ފަށާނީ ހަ ޓީމު ވާދަކުރާ އޮފީސް މުބާާރާތެވެ. އެ މުބާާރާތް އޮތީ މި މަހު 4-9 އަށެވެ. އަދި، އެ އަށް ފަހު، ކޮމްޕެނީ މުބާރާތް ފަށާނީ ނުވަ ވަނަ ދުވަހު އެވެ. ޖުމްލަ އެކު، 12 ޓީމެއް މި މުބާާރާތުގައި ކުޅޭނެ އެވެ. އަދި، ފައިނަލް މެޗު އޮތީ މާޗް 16 ވަނަ ދުވަހު އެވެ.
