އިއްޔެ ނިމިގެންދިޔަ އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖް 2022ގެ ޖޫނިއާ ބޮޑީބޯޑަރުންގެ ހުނަރަށް ބަލާއިރު، އެ ބޮޑީބޯޑަރުންނާ މެދު އުންމީދު ބޮޑު ކަމަށް ރާއްޖޭގެ އެއް ވަނަ ބޮޑީބޯޑަރު އަލީ ޚުޝްރުވާން އަހުމަދު (ކުޑަ އައްޔަ) ބުނެފި އެވެ.
މުޅިން އަލަށް މި އަހަރު ފެށި ގައުމީ ބޮޑީބޯޑިން ލީގުގެ ފުރަތަމަ މުބާރާތް ކަމަށްވާ އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖް 2022 ގެ އޯޕަން ބައި ކާމިޔާބުކޮށްފައިވަނީ ކުޑަ އައްޔަ އެވެ. އޭނާ އަކީ މި މުބާރާތް މީގެ ކުރިން ބޭއްވި ތިން ފަހަރު ވެސް ޗެމްޕިއަނެވެ.
ހަތް އަހަރަށް ފަހު ބޭއްވި މުބާރާތުގައި މި އަހަރު ޖޫނިއާ ބޮޑީބޯޑަރުންގެ ވިދުން ވެސް ފެނުނީ ވަރުގަދަ ކޮށެވެ. ރަށްރަށުން އައިސް ޖޫނިއާ ކެޓަގަރީގައި ރާޅާއެޅި ބޮޑީބޯޑަރުންގެ ހުނަރުވެރިކަން ވަރަށް ބޮޑަށް ފާހަގަކުރެވުނެވެ. މުބާރާތުގައި ކުރިއަށްދިޔަ ތިން ކެޓަގަރީ އެއްކޮށް އެއް ރާޅަކުން ދެ ވަނަ އަށް އެންމެ މަތީ ސްކޯއެއް ހޯދީ ޖޫނިއާ ބޮޑީބޯޑަރެކެވެ. މުބާރާތުގެ ޖޫނިއާ ކެޓަގަރީގެ ޗެމްޕިއަންކަން ހޯދީ އަބްދުﷲ ޝިމާލް ޝަމީމް ވަނީ ފައިނަލް ހީޓުގައި އޭނާ އެޅި ދެވަނަ ރާޅުން 8.33 ގެ ސްކޯ އެއް ހޯދައިފަ އެވެ.
ފައިނަލް ހީޓު ނިންމުމަށް ފަހު ކުޑަ އައްޔަ ފޮޓޯ އަކަށް ހުއްޓިގެން.-- ފޮޓޯ: އަބްދުﷲ އިޔާން/ އަދަދު
އޯޕަން ބައިގެ ފައިނަލް ހީޓުގައި އިއްޔެ 9.17 ޕޮއިންޓް ހޯދައި، އެއް ރާޅުން ހޯދި އެންމެ މަތީ ސްކޯ ގެނައީ ކުޑަ އައްޔަ އެވެ. ކުޑަ އައްޔަ ބުނީ ޖޫނިއާ ބޯޑަރުންގެ ލެވެލް، ސީނިއާ ކުޅުންތެރިންގެ ލެވެލް އެކޭ އެއްވަރު ކަމަށާއި، ރާޅުތަކުގައި ދައްކާ ހުނަރަށް ބަލާއިރު ވެސް މާ ބޮޑު ތަފާތެއް ނުފެންނަ ކަމަށެވެ. އަދި މި ޒުވާން ބޮޑީބޯޑަރުންނަށް ރަނގަޅަށް އިރުޝާދު ދެވި ހިތްވަރު ދެވިއްޖެނަމަ، ކުރިއަށް އޮތްތާނގައި ވަރަށް ތަފާތު ޗެލެންޖިން ކުދިންތަކެއް ފެންނާނެ ކަމަށް ގަބޫލުކުރާކަމަށް ވެސް ކުޑަ އައްޔަ ވަނީ ބުނެފަ އެވެ.
"ޖޫނިއާ ކުދިން އައްޔަ މެންނެކޭ އެއްވަރު ހަމަ. އައްޔަމެން ހަދާ މެނޫވާސް އެބަ ހަދާ. އަދި ހަމަކުޑަކޮށް ޕުޝްކޮށްލައިފިއްޔާ އައްޔަ މެންނަށް ވުރެ ވެސް ކުރިއަށް އެ ކުދިން ދާނެ. ކުރިއަށް އޮތް ތާނގައި ވަރަށް ތަފާތުވާނެ އަދި ހަމަ ޗެލެންޖިން ވެސް ވާނެ ކަމަށް ގަބޫލު ކުރަން." ދާދި ފަހުން މޯލްޑިވްސް ސްޕޯޓްސް އެވޯޑްސްގައި އެއް ވަނަ ބޮޑީބޯޑަރުގެ ޝަރަފް ހޯދި ކުޑަ އައްޔަ ބުންޏެވެ.
ކުޑަ އައްޔަ ބުނީ ބޮޑީބޯޑިން އަށް އައި ކުރިއެރުން އެންމެ ބޮޑަށް ފެންނަ އެއް ކަމަކީ ޒުވާން ގިނަ ބޮޑީބޯޑަރުން މިހާރު ފެނުމުގެ އިތުރުން އަންހެން ކުދިންވެސް މިހާރު މިކަން ކުރުމެެވެ. މިފަހަރު އަލަށް ފެށި އަންހެން ޑިވިޝަނާ އެކު މި ކުޅިވަރަށް އިތުރު ސަމާލުކަމަކާއި ދިރުމެއް އަންނާނެކަމަށް އޭނާ ގަބޫލުކުރެ އެވެ.
ބުރުނު ޝިކާރު ބޮޑީބޯޑިން ޗެލެންޖްގައި ވާދަކުރި ބޮޑީބޯޑަރުން މިނިސްޓަރު މަހުލޫފާ އެކުގައި ފޮޓޯ އަކަށް ހުއްޓިލައިގެން.-- ފޮޓޯ: އަބްދުﷲ އިޔާން/ އަދަދު
"ކުރިއާ އަޅާ ކިޔާއިރު، މިހާރު ވަރަށް ބޮޑަށް ޔަންގް ޖެނަރޭޝަން މީގެ ތެރެއަށް ވަދެއްޖެ. އަނެއްކާ އަންހެން ކުދިންވެސް މީގެ ތެރެއަށް ވަދެއްޖެ. ވަރަށް އުފާވޭ އާ ބޮޑީބޯޑަރުން ފެނުނީމަ. ކުރިއާ ބަލާއިރު ވަރަށް ޕެޝަން ވަރުގަދަ ވެއްޖެ."
ރާއްޖޭގައި މިވަގުތު ޒުވާން ބޮޑީބޯޑަރުންގެ ވިދުން ގަދަ އެވެ. މިދިޔަ އަހަރުގެ އެންމެ މޮޅު ތިން ބޮޑީބޯޑަރުންގެ ތެރޭގައި އުއްމީދީ ބޮޑީބޯޑަރު މުހައްމަދު ރީޝާން ހިމެނޭއިރު، ދާދި ފަހުން ނިމުނު ބުރުނު ޝިކާރުގެ އޯޕަން ބައިގެ ކުއާޓާ ފައިނަލުގައިވެސް އުއްމީދީ ހަތަރު ބޮޑީބޯޑަރަކު އެޅި އެވެ.
މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ)ގެ އަމާޒަކީ އަތޮޅުތަކުގައި މި ކުޅިވަރު ކުރި އަރުވައި އިތުރު އާ ކުދިންތަކެއް މިގޭ ތެރެއަށް ނެރުމެވެ. މިއަހަރު އަލަށް ފެށި ގައުމީ ބޮޑީބޯޑިން ލީގުގައި 6 އިވެންޓެއް ހިމެނެ އެވެ. ހަ މުބާރާތުގެ ތެރެއިން އެއް މުބާރާތް ކ.ތަނބުރުދޫގައި ބާއްވަން ނިންމާފައިވާއިރު، ކުރިއަށް އޮތް ތާނގައި ސަޕޯޓް ލިބޭ މިންވަރަށް ބަލައި ރާއްޖޭގެ އެހެން ރަށްތަކުގައިވެސް މުބާރާތްތައް ބޭއްވުމަށް ވަނީ ނިންމާފަ އެވެ.
