ހަތް އަހަރުގެ މެދުކެނޑުމަކަށް ފަހު ރާއްޖޭގެ ބޮޑީބޯޑިންގެ ހާއްސަ މުބާރާތް، އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖް 2022ގެ ފިރިހެން އޯޕަން ބައިގެ ޗެމްޕިއަންކަން އަލީ ޚުޝްރުވާން އަހުމަދު (ކުޑަ އައްޔަ) ހޯދިއިރު، ޖޫނިއާ ބައިގެ ޗެމްޕިއަންކަން އަބްދުﷲ ޝިމާލް ޝަމީމް ހޯދައިފި އެވެ.
މުޅިން އަލަށް މި އަހަރު ފެށި ގައުމީ ބޮޑީބޯޑިން ލީގުގެ ފުރަތަމަ މުބާރާތް ކަމަށްވާ އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖް 2022ގެ އޯޕަން ބައި ކުޑަ އައްޔަ ކާމިޔާބުކުރިއިރު، އޭނާ އަކީ މި މުބާރާތް މީގެ ކުރިން ބޭއްވި ތިން ފަހަރު ވެސް ޗެމްޕިއަނެވެ. އަހަރުގެ ފުރަތަމަ މުބާރާތުގެ ގޮތުގައި ބާއްވަމުން އައި ބުރުނު ޝިކާރުގެ ފުރަތަމަ މުބާރާތް ބޭއްވީ 2013 ގަ އެވެ.
އޭގެ ފަހުން 2014 އާއި 2015 ގައި ވެސް މި މުބާރާތް ބޭއްވި އެވެ. ތިން ފަހަރުވެސް އޯޕަން ބައި ކާމިޔާބުކުރީ ދާދި ފަހުން މޯލްޑިވްސް ސްޕޯޓްސް އެވޯޑްސްގައި އެއް ވަނަ ބޮޑީބޯޑަރުގެ ޝަރަފް ހޯދި ކުޑަ އައްޔަ އެވެ.
އެމްޓީސީސީ ބުރުނު ޝިކާރު ޗެލެންޖްގެ ތިން ޑިވިޝަނުގެ ގަދަ ތިނެއްގައި ހިމެނުނު ބޮޑީބޯޑަރުން ފޮޓޯ އަކަށް ހުއްޓިލައިގެން.-- ފޮޓޯ: އަބްދުﷲ އިޔާން/އަދަދު
ޖުމްލަ 33 ބޮޑީ ބޯޑަރުން ވާދަކުރި އޯޕަން ބައިގެ ފައިނަލްގައި ކުޑަ އައްޔަ ނުކުތީ އަލީ ޖާވިދު (ޖާއްޓެ)އާ ދެކޮޅަށެވެ. ފައިނަލް ހީޓު އައްޔަ ކާމިޔާބުކުރީ މުޅި މުބާރާތުގެ އެންމެ މަތީ ސްކޯ ކަމަށްވާ 15.00ގެ ޕޮއިންޓުގެ ސްކޯ އަކުންނެވެ. މި ހީޓުގައި އޭނާ ވަނީ އެއް ރާޅުގައި 9.17 ގެ ސްކޯ އެއްވެސް ހޯދައިފަ އެވެ. މިއީ މި މުބާރާތުގައި ހުރިހާ ހީޓެއް އެއްކޮށް އެއް ރާޅެއްގައި ބޯޑީބޯޑަރަކު ސްކޯކުރި އެންމެ މަތީ ޕޮއިންޓް ސްކޯ އެވެ. ފައިނަލުގައި ޖާއްޓެ އަށް ސްކޯ ކުރެވުނީ 10.20 ޕޮއިންޓެވެ.
ފިރިހެން އޯޕަން ބައިގެ ތިން ވަނަ ހޯދީ މީގެ ކުރިން ގައުމީ ބޮޑީބޯޑިން ޓީމުގައި ފާހަގަކޮށްލެވޭ ކާމިޔާބީތަކެއް ހޯދާފައިވާ އަލީ ޝާމް ރާފިއު އެވެ. ޝާމް ސެމީ ފައިނަލްގައި ބަލިވީ ޗެމްޕިއަން ކުޑަ އައްޔަ އާ ވާދަކޮށެވެ. ސެމީ ފައިނަލްގައި ކުޑަ އައްޔަ 13.94 ޕޮއިންޓް ސްކޯ ކުރިއިރު، ޝާމް އަށް ސްކޯ ކުރެވުނީ 9.27 ޕޮއިންޓެވެ. ފައިނަލާއި ސެމީ ފައިނަލްގައި ޗެމްޕިއަން ކުޑަ އައްޔަ ފެނުނީ އެހެން ބޮޑީބޯޑަރުންނަށް ވުރެ ތަފާތު މޮޅު ހުނަރުތައް ދައްކާލައި ޑޮމިނޭޓްކޮށްލި ތަނެވެ.
ފައިނަލް ހީޓުގައި ކުޑަ އައްޔަ ރާޅާ އަޅަނީ: ފައިނަލުގައި ކުޑަ އައްޔަގެ ފަރާތުން ފެނުނީ ތަޖުރިބާ އާއި ހުނަރުގެ ތަފާތު.-- ފޮޓޯ: އަބްދުﷲ އިޔާން/ އަދަދު
މުބާރާތުގެ ޖޫނިއާ ކެޓަގަރީގެ ޗެމްޕިއަންކަން ހޯދީ އަބްދުﷲ ޝިމާލް ޝަމީމެވެ. ފުވައްމުލަކުގެ ޝިމާލް އާ ދެކޮޅަށް ފައިނަލްގައި ނުކުތީ އެ ރަށުގެ މުހައްމަދު ޖަރީޝް ޖިހާދު އެވެ. ފައިނަލް މެޗު ޝިމާލް ކާމިޔާބުކުރީ ޖޫނިއާ ޑިވިޝަންގެ އެންމެ މަތީ ސްކޯ ކަމަށްވާ 13.66 ގެ ސްކޯ އަކުންނެވެ. ޖަރީޝް އަށް ސްކޯ ކުރެވުނީ 11.50 ޕޮއިންޓެވެ.
ތޭރަ ބޮޑީބޯޑަރުން ވާދަކުރި ޖޫނިއާ ޑިވިޝަންގެ ތިން ވަނަ ހޯދީ އާމިން އުމަރު މޫސާ އެވެ. ސެމީ ފައިނަލުން ކެޓި ދެ ބޯޑަރުންގެ ސްކޯއަށް ބަލާއިރު އާމިން އަށް ކުރި ލިބުނީ 2.34ގެ ތަފާތަކުންނެވެ. އާމިން ސެމީ ފައިނަލްގައި 10.00 ޕޮއިންޓުގެ ސްކޯއެއް ހޯދި އެވެ. ދެ ވަނަ ސެމީ ފައިނަލުން ބަލިވި އާމިންގެ ކޮއްކޮ އިޔާން އަހުމަދަށް ލިބުނީ 7.66 ގެ ސްކޯ އެކެވެ.
ފައިނަލް ހީޓުތަކަށް ފަހު އޮތް ނިންމުމުގެ ރަސްމިއްޔާތު ޝަރަފްވެރިކޮށްދެއްވީ ކުޅިވަރާ ބެހޭ ވަޒީރު އަހުމަދު މަހުލޫފް އެވެ. މީގެ އިތުރުން ޖެންޑަ މިނިސްޓްރީގެ ސްޓޭޓް މިނިސްޓަރު ޒިފްލީނާ ޙަސަން އާއި ބުރުނު ޝިކާރު ޗެލެންޖްގެ މެއިން ސްޕޮންސަރުން ކަމަށްވާ އެމްޓީސީސީގެ އިސް ބައެއް ވެރިން ހިމެނެ އެވެ.
ޖޫނިއާ ޗެމްޕިއަންކަން ހޯދި ޝިމާލް (ކ)އާ ޓްރޮފީ ހަވާލުކުރަނީ.-- ފޮޓޯ: އަބްދުﷲ އިޔާން/ އަދަދު
މި އަހަރުގެ ކަލަންޑަރުގައި ބޮޑީބޯޑިން ލީގެއްގެ ގޮތުގައި ޖުމްލަ ހަ އިވެންޓެއް ވަނީ ހިމަނައިފަ އެވެ. އެއީ މި ނިމުނު ބުރުނު ޝިކާރު ބޮޑީބޯޑިން ޗެލެންޖާއި، މެއި 26 އިން ޖޫން 4 އަށް އޮތް ލަބޭރާ ބޮޑީބޯޑިން ޗެލެންޖް، ޖުލައި 14-23 އަށް ބާއްވާ ގައުމީ ބަނޑުފިލާ ޗެލެންޖް، ސެޕްޓެމްބަރު 10 ގައި އޮންނަ ސުލްޓާން އޮފް ތަނބުރުދޫ، އޮކްޓޫބަރު 6-15 އަށް ބާއްވާ އަދަހުކުރު ގޮންޖެހުން އަދި އޮކްޓޫބަރު 6-15 އަށް ބާއްވާ މުލަ ބޮޑީބޯޑިން ޗެލެންޖް އެވެ.
މި އިވެންޓްތައް ރޭވިފައިވާ ގޮތަށް ބަލާއިރު، ފަސް މުބާރާތް އޮންނާނީ މާލޭ ރާޅުގަނޑު ސަރަހައްދުގަ އެވެ. އަދި އެއް އިވެންޓް، ކ.ތަނބުރުދޫގައި ކުރިއަށްދާނެ އެވެ. ފުރަތަމަ ދެ މުބާރާތް ނިމުމުން ޖޫން މަހު ގައުމީ ބޮޑީ ބޯޑިން ޓީމާއި ޖޫނިއާ ސްކޮޑެއް އެކުލަވާލާނެ އެވެ. އެމްބީބީއޭގެ އޮންލައިން މީޑިއާ ޕާޓްނަރަކީ "އަދަދު" އެވެ.
