ދޯހާ، ގަތަރު (ނޮވެމްބަރު 5) - ގަތަރުގެ ކްލަބް އަލް ސާދުން ރިލީސް ދޭން ނިންމުމާ އެކު ބާސެލޯނާގެ އާ ކޯޗުގެ މަގާމާ ހަވާލުވާން އެ ޓީމުގެ ކުރީގެ ކެޕްޓަން ޒަވީ ހެނާންޑޭޒް ތައްޔާރުވެއްޖެ އެވެ.
ދާދި ފަހުން ބާސެލޯނާގެ ކޯޗުކަމުން ރޮނާލްޑް ކޫމަން ވަކިކޮށް ބާސެލޯނާގެ ބޯޑް މެމްބަރުންގެ މެޖޯރިޓީން ތާއީދުކުރީ ދެން ކޯޗަކަށް ގެންނަން ޖެހޭނީ އުމުރުން 41 އަހަރުގެ ޒަވީ ކަމަށެވެ. އެކަމަކު، އެ ވަގުތު އޮތް ހުރަހަކީ ޒަވީ ހުރީ އަލް ސާދުގެ ކޮންޓްރެކްޓެއް ކަމަށް ވުމެވެ.
އަލް ސާދުގައި ރަނގަޅު ޕްރޮޖެކްޓެއް ހިންގަން ވިސްނައިގެން ހުރި ޒަވީ އެ ވަގުތު ވެސް ނިންމީ އޭނާ ބާސެލޯނާއާ ހަވާލުވާން ދާނީ އަލް ސާދުގެ ރުހުމާ އެކު ކަމަށެވެ. ފާއިތުވި 72 ވަރަކަށް ގަޑިއިރު ތެރޭގައި ބާސެލޯނާގެ ބޯޑު މެމްބަރުންގެ ޓީމެއް އަލް ސާދުގެ އޮފިޝަލުންނާ އެކު ބޭއްވި އެކި ބައްދަލުވުންތަކަށް ފަހު އަލް ސާދުން މިއަދު ނިންމީ ޒަވީ އަށް ރިލީސް ދިނުމަށެވެ.
ޒަވީ، ބާސެލޯނާ ދޫކޮށް އަލް ސާދަށް ބަދަލުވީ 2015 ވަނަ އަހަރެވެ. ކުޅުންތެރިއެއްގެ ގޮތުގައި އަލް ސާދާ އެކު ހަތަރު ޓްރޮފީ ހޯދައި، 2019 ވަނަ އަހަރު ކޯޗެއްގެ ގޮތުގައި އެ ޓީމުގައި ޒަވީ މަސައްކަތް ފެށި އެވެ.
ކޯޗިންގައި އަލް ސާދާ އެކު ހަތް ޓްރޮފީ އުފުލާލައި ގިނަ ރެކޯޑްތަކެއް ގާއިމްކުރި ޒަވީ ވަނީ ދާދި ފަހުން އަންނަ އަހަރުގެ ވޯލްޑް ކަޕްގެ ނިޔަލަށް އެ ކްލަބްގެ ކޮންޓްރެކްޓް އާ ކޮށްފަ އެވެ. އެ ކޮންޓްރެކްޓް އުވާލަން ދައްކަން ޖެހޭ ފީ ބާސެލޯނާ އިން ދޭނެ ކަމަށް އަލް ސާދުން މިއަދު ވަނީ ބުނެފަ އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން ކުރިއަށް އޮތް ދެތިން ދުވަހެއްގެ ތެރޭގައި ޒަވީ ބާސެލޯނާއާ އެކު ރަސްމީކޮށް ކޮންޓްރެކްޓްގައި ސޮއިކުރާނެ އެވެ. މީގެ ކުރިން ޒަވީ އަށް ދެ ފަހަރެއްގެ މަތިން ބާސެލޯނާގެ ކޯޗުކަމާ ހަވާލުވާން ލިބުނު ހުށަހެޅުން އޭނާ ގަބޫލެއް ނުުކުރި އެވެ. އެއީ އަމިއްލަ ސަަބަބުތަކަށްޓަކަ އެވެ.
އެކަމަކު، މިހާރު ބާސެލޯނާގެ ރައީސަކަށް ހުރި ޖޮއާން ލަޕޯޓާއާ ގާތްގުޅުމެއް އޮންނަ ޒަވީ ވަނީ މި ފަހަރު ބާސެލޯނާގެ ހުށަހެޅުން ލިބުމާ އެކު ފުރުސަތުގެ ބޭނުން ހިފަން ބޭނުންވާ ކަމަށް މީޑިއާގައި ބުނެފަ އެވެ.
ޒަވީ ވަނީ ބާސެލޯނާގެ ޔޫތު ޓީމުން ފުޓްބޯޅަ ކެރިއަރު ފަށައި އެ ކްލަބްގެ ސީނިއާ ޓީމަށް 779 މެޗު ކުޅެ، އެ ޓީމާއެކު 25 ތަށި ހޯދައިފަ އެވެ.
