ދަ ޑިމޮކްރެޓްސް އަކީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްވެ ހުންނަވާ އުފެއްދެވި ސިޔާސީ ޕާޓީ އެކެވެ. އެގޮތުން އެމްޑީޕގެ ތެރޭގައި ނަޝީދު އުފެއްދެވި 'ފިކުރެއްގެ ދިރުން' ގޮފީގެ 13 މަޖިލިސް މެންބަރަކު އެ ޕާޓީން ވަކިވެ އާ ޕާޓީ އުފެއްދުމުގެ މަސައްކަތް ރަސްމީކޮށް ފަށާ އެކަން އިއުލާންކުރީ މެއި 17, ގަ އެވެ. އެ ޕާޓީ އުފެއްދުމުގައި މުއައްސިސަކަށް އަދި މިހާރު ވަގުތީ ޗެއާޕާސަނުގެ މަގާމުގައި ހުންނެވީ ހެންވޭރު ހުޅަނގު ދާއިރާގެ މެންބަރު ހަސަން ލަތީފެެވެ. އެ ޕާޓީ އުފެއްދުމުގެ ހުއްދަ އީސީއިން ދިނީ ޖުލައި މަހުގެ ދެވަނަ ދުވަހު އެވެ. ޕާޓީ އުފެދުނު އިރުވެސް ނަޝީދު ހުންނެވީ އެމްޑީޕީގެ ރައީސްގެ މަގާމުގަ އެވެ. ނަމަވެސް, ޕާޓީއަށް ހުއްދަ ލިބުމާ އެކު އެމްޑީޕީ ދޫކުރައްވައި ނަޝީދު ޑިމޮކްރެޓްސްއާ ގުޅިވަޑައިގަތީ ޖުލައި 13، ގަ އެވެ. ރައްޔިތުންގެ މަޖިލީހުގެ މައިނޯރިޓީ ޕާޓީގެ ރޯލު މިހާރު ފުރަމުން ދަނީ ޑިމޮކްރެޓްސް އިންނެވެ. އަދި, މަޖިލީހުގެ ރައީސް އާއި ނައިބު ރައީސް ވެސް ނިސްބަތްވަނީ އެ ޕާޓީއަށެވެ.