އެމެރިކާ އާއި އިޒްރޭލުން އިރާނަށް ބޮން އަޅައި ފެށި ހަނގުރާމަ އަވަހަށް ނިމުނުކަމުގައިވީ ނަމަވެސް ތެލުގެ އަގަށް އައި ބަދަލާއި، ލޮޖިސްޓިކްސް އަދި ޝިޕިންއަށް ދިމާވެފައިވާ ގޮންޖެހުންތަކުގެ ސަބަބުން އެތައް މަހެއް ވަންދެން ތަކެތީގެ އަގުތައް އުފުލުމުގެ ފުރުސަތު އޮތްކަމަށް ކަމާބެހޭ މާހިރުންނާ ހަވާލާދީ ރޮއިޓާސްއިން ބުނެފި އެވެ.

މިހާރު މާކެޓުތަކަށް އޮތް އެންމެ ބޮޑު ގޮންޖެހުމަކީ ތެޔޮ ސާފުކުރާ ކާރުހަނާތައް ހުއްޓި ސަޕްލައި ރޫޓުތަކަށް ބޮޑެތި ގެއްލުންތަކެއް ވެފައިވުން ކަމަށް ޖޭޕީ މޯގަންގެ އެނަލިސްޓުން ވަނީ އިއްޔެ ބުނެފަ އެވެ.

އީރާނާއި ގަލްފުގެ ގައުމުތަކާ ދެމެދު އޮންނަ މުހިންމު ހޮރުމޫޒު ކަނޑުއޮޅިން ދަތުރުކުރާ އުޅަނދުތަކަށް އަމާޒުކޮށް ދެމުންދާ ހަމަލާތަކާއި ތެޔޮ ނަގާ ކާރުހާނާތަކަށް ދެމުން އަންނަ ހަމަލާތަކުގެ ސަބަބުން ސާފުނުކުރާ ތެލާއި ގޭސް ސަޕްލައިގެ ފަސްބައިކުޅަ އެއްބައި މިހާރު ވަނީ ހުއްޓިފަ އެވެ.

ދުނިޔޭގެ ބާޒާރުގައި ތެލުގެ އަގު މި ހަފުތާގައި 24 ޕަސެންޓު އުފުލި، ތެޔޮ ފީފާއެއްގެ އަގު 90 ޑޮލަރަށް ވުރެ މައްޗަށް ވަނީ ގޮސްފަ އެވެ. މިއީ ކޮވިޑު ޕެންޑެމިކަށް ފަހު ހަފުތާއެއްގެ ތެރޭގައި އެންމެ ބޮޑަށް ތެލުގެ އަގު އުފުލުނު ފަހަރެވެ.

ހޮރުމޫޒުކަނޑުއޮޅި ގާތްގަނޑަކަށް އެއްކޮށް ބަންދުވުމުގެ މާނައަކީ، ސަރަހައްދުގެ ބޮޑެތި ތެޔޮ އުފައްދާ ގައުމުތައް ކަމަށްވާ ސައުދީ އަރަބިއްޔާ، ޔޫއޭއީ، އިރާގު އަދި ކުވެއިތުން ދުނިޔޭގެ ރިފައިނަރީތަކަށް ފޮނުވާ 140 މިލިއަން ފީފާގެ ތެޔޮ (ދުނިޔޭގެ 1.4 ދުވަހުގެ ޑިމާންޑާ އެއްވަރުގެ މިންވަރެއް) ފޮނުވުން މެދުކަނޑާލުމެވެ.

ނަތީޖާއެއްގެ ގޮތުން، ގަލްފު ސަރަހައްދުގައި ހުރި ތެލާއި ގޭސް ރައްކާކުރާ ތަންތަން އަންނަނީ ހަލުވިކަމާއެކު ފުރެމުންނެވެ. އިރާގުގެ ތެޔޮ ނަގާ ކާރުހަނާތަކުން އުފައްދާ މިންވަރު މަދުކުރަން މަޖުބޫރުވެފައިވާއިރު، ކުވެއިތާއި ޔޫއޭއީ އަކީ ދެން އެންމެ އަވަހަށް މިފަދަ ފިޔަވަޅެއް އަޅާނެ ގައުމުތައް ކަމަށް އެނަލިސްޓުންނާއި ވިޔަފާރިވެރިން ބުނެ އެވެ.

ޝިޕިންއަށް ހުރަސްއެޅުމުގެ ސަބަބުން މެދުއިރުމަތީގައި ބަންދުކުރަން ޖެހުނު ތެޔޮ ވަޅުތައް އާންމު ހާލަތަށް ރުޖޫއަވުމަށް ދުވަސްކޮޅެއް ނަގާފާނެ ކަމަށް ރައިސްޓެޑް އެނާޖީގެ އަމީރު ޒަމާން ރޮއިޓާސްއަށް ބުންޏެވެ.

"ހަނގުރާމަ ނިމިދާނެ، ނަމަވެސް ކުރިން ހުރި މިންވަރަށް އުފެއްދުންތައް ގެންދިއުމަށް، ވަޅުތަކުގެ ބާވަތާއި، ވަޅުގެ އުމުރާއި، ބަންދުކުރަން ޖެހުނު ގޮތުގެ މައްޗަށް ބިނާކޮށް ދުވަސްތަކެއް ނުވަތަ ހަފުތާތަކެއް ނުވަތަ މަސްތަކެއް ނަގައިފާނެ،" އޭނާ ބުންޏެވެ.

އީރާނުގެ ސިފައިން މިހާރު ދަނީ ސަރަހައްދީ ހަކަތައިގެ އިންފްރާސްޓްރަކްޗަރަށް (ރެފިނަރީތަކާއި ޓާމިނަލްތައް ހިމެނޭހެން) އަމާޒުކުރަމުންނެވެ. މީގެ ސަބަބުން އެ ތަންތަން ބަންދުކުރަން މަޖުބޫރުވެފައިވާއިރު، ބައެއް ތަންތަނަށް ބޮޑެތި ގެއްލުންތަކެއް ލިބި މަރާމާތުކުރަން ވަނީ ޖެހިފަ އެވެ.

ހަނގުރާމަ އަވަހަށް ނިމުމަކީ ބާޒާރަށް ލިބޭނެ ލުޔެކެވެ. ނަމަވެސް ކުރިން ހުރި އަގުތަކާއި ސަޕްލައިއަށް ރުޖޫއަވުމަށް، އިންފްރާސްޓްރަކްޗަރާއި ޝިޕިންއަށް ލިބުނު ގެއްލުމުގެ މިންވަރަށް ބަލައި ހަފުތާތަކެއް ނުވަތަ މަސްތަކެއް ނަގާފާނެ އެވެ.

ހަކަތައިގެ ސަޕްލައިއަށް އޮތް އެންމެ ބޮޑު ސުވާލަކީ ހޯރްމޫޒް ކަނޑުއޮޅި އަލުން އުޅަނދުތަކަށް ރައްކާތެރިވާނީ ކިހިނެއް އަދި ކޮން އިރަކުތޯ އެވެ.