އިރާނުން އަވައްޓެރި ގައުމުތަކަށް ދެމުންދާ ހަމަލާތައް ހުއްޓާލަން ނިންމާފައިވާ އެ ގައުމުގެ ރައީސް މަސްއޫދު ޕެޒެޝްކިއަން ދާދި ދެންމެއަކު އިއުލާންކުރައްވައިފި އެވެ.

ޕެޒެޝްކިއަންއާ ހަވާލާދީ އިރާނާއި ބައިނަލްއަގުވާމީ މީޑިއާތަކުން ރިޕޯޓުކުރަމުން އަންނަ ގޮތުގައި އެ ގައުމުގެ އިންޓަރިމް ލީޑާޝިޕް ކައުންސިލުން ވަނީ އަވައްޓެރި ގައުމުތަކަށް ދޭ ހަމަލާތައް ހުއްޓާލަން އިއްޔެ ފާސްކޮށްފަ އެވެ. ޕެޒެޝްކިއަން ވަނީ އަރަބި ގައުމުތަކަށް އެ ގައުމުން ދިން ހަމަލާތަކަށް މައާފަށް ވެސް އެދިވަޑައިގެންފަ އެވެ.

ހަމަލާ ދޭން ގަސްތު ނުކުރާ ކަން އިއުލާން ކުރި ނަމަވެސް ކުރިއަށް އޮތް ތަނުގައި ވެސް އިރާނަށް މިސައިލެއް ފޮނުވަން އަރަބި ގައުމެއް ބޭނުންކޮށްފި ނަމަ، އެ ގައުމަކަށް ހަމަލާ ދޭނެ ކަމަށް ވިދާޅުވެ ޕެޒެޝްކިއަން ވަނީ އިންޒާރު ދެއްވާފަ އެވެ.

މިއީ އެމެރިކާ އާއި އިޒްރޭލުން އިސްވެ އިރާނަށް ދޭން ފެށި ހަމަލާތަކާ ގުޅިގެން، ނުރައްކަލުގެ ތެރެއަށް ވެއްޓިފައިވާ ގަލްފުގެ ގައުމުތަކަށް އުފާވެރި ހަބަރެކެވެ.

މި ހަމަލާތަކާ ގުޅިގެން މި ސަރަހައްދުގެ ގައުމުތަކުގެ ވައިގެ ސަރަހައްދު ބަންދުކޮށް، ތެލާއި ގޭސް އުފެއްދުން މަދުކުރަން މަޖުބޫރުވެފަ އެވެ. މިއާ ގުޅިގެން އެ ގައުމުތަކަށް ލިބުނު އިގުތިސޯދީ ގެއްލުމުގެ މިންވަރު ގުނަމުން އަންނަނީ ބިލިއަން ޑޮލަރުންނެވެ.

އިރާނުން ހަމަލާ ދިނުން ހުއްޓާލާފައިވާ ކަން އިއުލާންކުރި ފަހުން ވެސް ގަތަރުން ވަނީ ޑްރޯން ހަމަލާއެއް ނާކާމިޔާބުކޮށްލާފައިވާ ކަމަށް ބުނެފަ އެވެ.