ޑްރަގު މައްސަލައެއްގައި ތައިލެންޑުގައި ހައްޔަރުކޮށްފައި ހުރި ދިވެހި ޒުވާނަކު މަރުވެއްޖެ އެވެ.

ފުލުހުން ބުނި ގޮތުގައި ތައިލެންޑުގެ ފުލުހުންގެ ބެލުމުގެ ދަށުގައި ހުއްޓާ މަރުވީ، ތ. ގުރައިދޫ، ފަނާރު، އިބްރާހިމް ނަބީހް ނަސީމް އެވެ. ނަބީހު މިދިޔަ މަހުގެ 22 ގައި، ހައްޔަރުކުރީ ތައިލެންޑުގެ ޑޮންމުއެންގް އެއާޕޯޓުންނެވެ.

ނަބީހު މަރުވީ ތައިލެންޑު ފުލުހުންގެ ބެލުމުގެ ދަށުގައި ހުއްޓާ ކަން ފުލުހުން ޔަގީންކޮށްދިން ނަމަވެސް، އޭނާ މަރުވީ ކިހިނެއް ކަމެއް ދިވެހި ފުލުހުން ނުބުނެ އެވެ.

ތައިލެންޑުގައި އާންމުކޮށް ޝައްކު އުފެދޭ މަރުތަކުގައި އަދި ވަކިން ހާއްސަކޮށް ފުލުހުންގެ ބަންދުގައި ހުއްޓާ މަރުވެއްޖެނަމަ އޮޓޮޕްސީ ހަދަން ގާނޫނުން ލާޒިމުކުރެ އެވެ. މިހެންކަމުން ނަބީހުގެ އޮޓޮޕްސީ ވެސް ހަދާނެ އެވެ.

ދިވެހި ފުލުހުން ބުނީ މި ހާދިސާއާ ގުޅިގެން ބަލަންޖެހޭ ކަންކަން ކަމާ ގުޅުންހުރި އިދާރާތަކާ ގުޅިގެން ބަލަމުންދާ ކަމަށެވެ.

ތައިލެންޑަކީ ގިނަ އަދަދެއްގެ ދިވެހިން ޗުއްޓީ ހޭދަކުރުމަށް ދަތުރުކުރާ ގައުމެކެވެ. އެ ގައުމުގައި މަސްތުވާތަކެތީގެ މައްސަލަތަކުގައި މީގެ ކުރިން ވެސް ދިވެހިން ހައްޔަރުކޮށްފައިވެ އެވެ.

ތައިލެންޑަކީ އިރުމަތީ އޭޝިއާގެ "ގޯލްޑަން ޓްރެއިންގަލް" ގައި އުފައްދާ ޑްރަގު ދުނިޔޭގެ އެކި ކަންކޮޅުތަކަށް ފޮނުވަން ޓްރެފިކަރުން ބޭނުންކުރާ ގައުމެވެ.