މުމްބާއި، އިންޑިއާ (މާޗް 6) - ފޯރިގަދަކޮށް ނިމިގެން ދިޔަ ސެމީ ފައިނަލް މެޗުން ހަތް ލަނޑުން އިންގްލެންޑް ބަލިކޮށް އިންޑިއާ އިން ޓީ20 ވޯލްޑް ކަޕްގެ ފައިނަލުން ޖާގަ ހޯދައިފި އެވެ.

އާދިއްތަ ދުވަހު ކުޅޭ ފައިނަލުގައި އެންމެ ފަހުގެ ޗެމްޕިއަން، އިންޑިއާ އިން ކުޅޭނީ ނިއު ޒީލެންޑާ ދެކޮޅަށެވެ.

މަޝްހޫރު ވަންކެޑޭ ސްޓޭޑިއަމްގައި ރޭ ކުޅުނު ސެމީ ފައިނަލުގައި ޓޮސް ދިމާވުމުން އިންގްލެންޑުން ނިންމީ ހޮވާށެވެ. އިންޑިއާ އިން ކުޅެން އަރައި، 20 އޯވަރުގެ ތެރޭގައި ހަތް ކުޅުންތެރިން ނުބައިވެގެން 253 ލަނޑު ހެދި އެވެ. ސުޕަ 8ގެ ފަހު މެޗުގައި ރަނގަޅު ފޯމެއްގައި ކުޅެލި، އިންޑިއާގެ ސަންޖޫ ސެމްސަން މި މެޗުގައި ވެސް ތަފާތު ދެއްކި އެވެ. އޭނާ ނުބައިވީ، 42 ބޯޅަ އަށް 89 ލަނޑު ހަދާފައި ވަނިކޮށެވެ. ދެން، އެންމެ ރަނގަޅު ކުޅުމެއް ދެއްކީ، 25 ބޯޅައިން 43 ލަނޑު ހެދި ޝިވަމް ދޫބޭ އެވެ.

މި އިނިންގްސްގައި، އިންގްލެންޑްގެ ވިލް ޖެކްސް އާއި އާދިލް ރާޝިދު، ކޮންމެ ކުޅުންތެރިއަކު ދެ ވިކެޓް ނެގި އެވެ.

ޖަވާބުގައި ކުޅެން އަރައި އިންގްލެންޑުން 20 އޯވަރުގެ ތެރޭގައި ހަތް ކުޅުންތެރިއަކު ނުބައިވިއިރު، ހެދުނީ 246 ލަނޑެވެ. އެންމެ ރަނގަޅު ކުޅުމެއް ދެއްކީ، 48 ބޯޅައިން 105 ލަނޑު ހެދި ޖޭކަބް ބެތެލް އެވެ. އޭނާ އަކީ، އެންމެ ހަގު އުމުރުގައި ތިން ފޯމެޓްގައި، އިންގްލެންޑަށް ސައްތައެއް ފުރިހަަމަ ކުރި ފުރަތަމަ ކުޅުންތެރިޔާ އެވެ.

މި އިނިންގްސްގައި، އިންޑިއާގެ ހާޑިކް ޕާންޑްޔާ ދެ ވިކެޓް ނެގިއިރު، އަކްސާ ޕަޓޭލް އާއި ޖަސްޕްރީތު ބުމްރާ ވެސް ވަނީ ރަނގަޅު ކުޅުމެއް ދައްކައިފަ އެވެ.

މިއީ، ޓީ20 ކްރިކެޓް ވޯލްޑް ކަޕް ދެ ފަހަރު ކާމިޔާބުކުރި އިންޑިއާ އިން ފައިނަލުގައި ކުޅޭ ހަތަރު ވަނަ ފަހަރެވެ. މީގެ ކުރިން، އިންޑިއާ މި ފޯމެޓްގައި ފައިނަލަކުން ބަލިވީ، 2014 ވަނަ އަހަރު ސްރީ ލަންކާ އަތުންނެވެ. ނިއު ޒީލެންޑުން މިހާތަނަށް ކުޅުނު ހަމައެކަނި ފައިނަލުން ވަނީ 2021 ވަނަ އަހަރު އޮސްޓްރޭލިއާ އަތުން ބަލިވެފަ އެވެ.