މިއަހަރު ރާއްޖެއިން ބޭރަށް ކިޔަވަންދާ ދަރިވަރުންނަށް ޚާއްސަކޮށްގެން، ޒެޑެކްސްއިން "މެގާ ސްޓޫޑަންޓް ގިވްއަވޭ 2026" ގެ ނަމުގައި ކުރިއަށްގެންދިޔަ ގިވްއަވޭގެ ނަސީބުވެރިން ހޮވައިފި އެވެ.

ހޮޓެލް ޖެންގައި މިދިޔަ އަންގާރަ ދުވަހު ބޭއްވި ރޯދަ ވީއްލުމެއްގައި ގިވްއަވޭގެ ނަސީބުވެރިންނާ އިނާމު ހަވާލުކޮށްދެއްވީ ޒެޑެކްސްގެ ސީއީއޯ އަހްމަދު ޒައިން ނާޒިމް އެވެ.

މަތީ ތައުލީމު ހާސިލުކުރަން ބޭނުންވާ ދަރިވަރުންނަށް ހިތްވަރު ދިނުމަށާއި، އެކުދިންގެ މުސްތަގުބަލު އުޖާލާކުރުމަށް އެހީތެރިވެދިނުމުގެ ގޮތުން މި ޕްރޮމޯޝަން ކުރިއަށްގެންދިޔައީ އެޕްލިކޭޝަން ހުށަހަޅާ ދަރިވަރުންނާއި އެންރޯލްވާ ދަރިވަރުންގެ މެދުގަ އެވެ.

މިގޮތުން މާފުށީގައި ހަތަރު މީހަކަށް ލިބޭ ދެ ރޭގެ ޗުއްޓީ ލިބުނު ނަސީބުވެރިޔާ، ޖޭބީއެލް ސްޕީކަރު ލިބޭ ނަސީބުވެރިޔާ، ހަތަރު މީހަކަށް ހޮޓެލް ޖެންގެ އިފްތާރު ލިބޭ ނަސީބުވެރިޔާ އަދި އިތުރު އިނާމުތައް ލިބޭ ނަސީބުވެރިން ވެސް ވަނީ ހޮވާފަ އެވެ.

މީގެ އިތުރުން، ޒެޑެކްސް މެދުވެރިކޮށް ކިޔަވަންދާން އެންރޯލްވާ ދަރިވަރުންނަށް ޚާއްސަ 'ގްރޭންޑް ޕްރައިޒް' ތަކެއްވެސް ވަނީ ކަނޑައަޅާފަ އެވެ.

އޭގެ ތެރޭގައި ދެ ކުއްޖަކަށް ހުރިހާ ހަރަދަކާއެކު ލިބޭ އުމްރާ ދަތުރަކާއި، ތިން ރޭގެ ކްރޫޒް ދަތުރެއްގެ އިތުރުން މެލޭޝިއާގައި ބާއްވާ ބައިނަލްއަގުވާމީ ފަންނާނުންގެ ކޮންސެޓް ޓިކެޓް ހިމެނެ އެވެ. އެ އިނާމުތައް ލިބޭ ނަސީބުވެރިން އަދި ހޮވާފައެއް ނުވެ އެވެ.

ޒެޑެކްސްއިން ބުނީ މިއީ ކިޔަވަންދާ ދަރިވަރުންނަށް ލިބޭނެ އެންމެ ރަނގަޅު އެހީތެރިކަން ކަމަށާއި، ކިޔެވުމުގެ ދަތުރު ފެށުމުގެ ކުރިން މިއީ ދަރިވަރުންނަށް ލިބޭނެ ވަރަށް ބޮޑު އުފަލަކަށް ވާނެ ކަމަށެވެ.