ސްރީލަންކާގެ އެކްސްކްލޫސިވް އިކޮނޮމިކް ޒޯން (އީއީޒެޑް) ގައި ހާލުގައި ޖެހިފައި އޮތް އިރާނުގެ އިތުރު މަނަވަރަކަށް އެހީވުމުގެ މަސައްކަތް އެ ގައުމުގެ ސަރުކާރުން ފަށައިފި އެވެ.

އެ އުޅަނދު އޮތް ސަރަހައްދު ސަރުކާރަށާއި ޑިފެންސް މިނިސްޓްރީއަށް އެނގޭ ކަމަށާއި، އޭގައި ތިބި މީހުންގެ ސަލާމަތްތެރިކަން ކަށަވަރު ކުރުމަށްޓަކައި އަޅަންޖެހޭ ފިޔަވަޅުތައް އަޅަމުންދާ ކަމަށް ލަންކާގެ ސަރުކާރުގެ ވަޒީރު ނަލިންދަ ޖަޔަތިސަ ވަނީ މަޖިލީހުގައި މިއަދު ވިދާޅުވެފަ އެވެ.

ލަންކާގެ އަސްކަރިއްޔާއިން މިހާރު އެ މަސައްކަތް ފަށާފައިވާ ކަމަށާއި އެ މީހުން ސަލާމަތްކުރެވުމުން މަޖިލީހަށް ރިޕޯޓެއް ހުށަހަޅާނެ ކަމަށް ލަންކާގެ ސަރުކާރުން ވަނީ ބުނެފަ އެވެ.

އެ މަނަވަރުން 100 އަށްވުރެ ގިނަ މީހުން ދަތުރުކުރަމުން އަންނަ ކަމަށް އެ ގައުމުގެ މީޑިއާތަކުން ރިޕޯޓުކުރެ އެވެ.

އިއްޔެ އެމެރިކާއިން ވަނީ ލަންކާގެ އައްސޭރިފަށުން ފެށިގެން 19 ނޯޓިކަލް މޭލު ބޭރުން އިރާނުގެ މަނަވަރެއް ފައްތާލާފަ އެވެ.