އޭޕްރީލް 4 ގައި ބާއްވާ ލޯކަލް ކައުންސިލް އިންތިހާބަށް ބޭނުންވާ 650 ޕްރިންޓަރު ހޯދުމަށް އިލެކްޝަންސް ކޮމިޝަން (އީސީ) އިން އިއުލާނުކުރި ބީލަމުގެ ޝަރުތުތައް ހުރި ގޮތުން، އެއީ ވަކި ބަޔަކަށް ނާޖާއިޒު ފައިދާ ހޯދައިދިނުމަށް ރާވައިގެން ކޮށްފައިވާ ކަމެއްގެ ކަމަށް ތުހުމަތު ކުރެވިއްޖެ އެވެ.

ލޯކަލް ކައުންސިލް އިންތިހާބު ބާއްވާނެ ތާރީހު އީސީން އިއުލާނުކުރީ މީގެ ތިން މަސް ކުރިން، ޑިސެންބަރު 4، 2025 ގަ އެވެ. ނަމަވެސް، ގިނަ އަދަދެއްގެ ޕްރިންޓަރު ހޯދުމަށް ބީލަން ހުޅުވާލީ އިންތިހާބަށް ތާރީހު ކަނޑައެޅިތާ އެތައް ދުވަހެއް ފަހުން، މިދިޔަ ފެބްރުއަރީ 24 ގަ އެވެ. ބީލަން ހުށަހެޅުމުގެ މުއްދަތު މާޗު 3 އަށް ހަމަވެފައިވާއިރު، މި ބީލަމުގެ އެންމެ ބޮޑު ޝަރުތަކީ ހޮވޭ ފަރާތަކުން 7 ދުވަހުގެ ތެރޭގައި ހުރިހާ ތަކެއްޗެއް ސަޕްލައިކޮށް ނިންމުމެވެ.

މިކަމާ ގުޅޭގޮތުން އަދަދު ނޫހާ ވާހަކަ ދެއްކި ބައެއް މަސްދަރުތަކުން ބުނީ 650 ޕްރިންޓަރު ފަދަ ބޮޑު ޝިޕްމަންޓެއް އެންމެ 7 ދުވަހުގެ ތެރޭގައި ރާއްޖެއަށް އެތެރެކުރުމަކީ ކުރިން ރާވައިގެން މުދާ ގެނެސްފައި ހުރި ބަޔަކަށް ނޫނީ ކުރަން ދަތި ކަމެއް ކަމަށެވެ.

"މިއީ ކުރިން ރާވައިގެން ކޮށްފައިވާ ކަމަކަށް ނުވާނަމަ ރާއްޖޭގެ އެއްވެސް ބަޔަކަށް މިހާރު ކުރު މުއްދަތެއްގެ ތެރޭގައި ކުރުން ދަތި ކަމެއް. އަދި އަގުވެސް ބޮޑުވާނެ ކަމެއް. މިއީ ދައުލަތަށް ލިބޭ ބޮޑު ގެއްލުމެއް،" މިކަމުގެ ކަންބޮޑުވުން ފާޅުކުރި ފަރާތަކުން ބުންޏެވެ.

އިންތިހާބަށް ބޭނުންވާ ތަކެތި ދުރާލައި އެނގި ތިބެ، މިހާ ކުރު މުއްދަތެއް ދިނުމަކީ ބީލަމުގެ ވާދަވެރިކަން ގެއްލި، ދައުލަތުން ކުރަންޖެހޭ ހަރަދު އިންތިހާއަށް ބޮޑުވާނެ ކަމެއް ކަމަށް މި ނޫހާ ވާހަކަ ދެއްކި އެކަކު ބުންޏެވެ.

ދުރާލައި އިއުލާނު ކުރި ނަމަ، ހެޔޮ އަގެއްގައި މި ތަކެތި އެތެރެކުރުމުގެ ފުރުސަތު އޮތީހެވެ.

ހިޔާނާތުގެ ތުހުމަތު ކުރެވޭ މި ބީލަމަށް ހުށަހެޅި ޕްރޮޕޯސަލްތައް އިއްޔެ ހުޅުވި ނަމަވެސް، ބީލަން ކާމިޔާބުކުރި ފަރާތް އިލެކްޝަން ކޮމިޝަނުން އަދި އާންމުކޮށް އިއުލާނެއް ނުކުރެ އެވެ.