މިއަދު ފަތިހުގެ ވަގުތެއްގައި ސަބްމެރިންއަކުން ދިން ހަމަލާއެއް އަމާޒުވެ އިރާނުގެ އަސްކަރީ މަނަވަރެއް ސްރީ ލަންކާ ބޭރުން ފެތިއްޖެ އެވެ.

ޖުމުލަ 180 ފަޅުވެރިން ދަތުރުކުރަމުންދިޔަ މި މަނަވަރުން އެހީއަށް އެދުނީ މިއަދު ފަތިހުގެ ވަގުތެއްގައި ކަމަށް ލަންކާގެ އިދާރާތަކުން ބުނެ އެވެ. އޭގެ ތެރެއިން ވަރަށް ބޮޑަށް ޒަހަމްވެފައި ތިބި 32 ސިފައިން ވަނީ ސަލާމަތްކޮށްފަ އެވެ.

މަނަވަރު އަޑިއަށް ދިޔައީ ލަންކާގެ ދެކުނުން 40 ކިލޯމީޓަރު ބޭރުންނެވެ. ބާކީ ތިބި ފަޅުވެރިން ހޯދުމުގެ މަސައްކަތް ލަންކާގެ އަސްކަރިއްޔާއިން އަންނަނީ ކުރަމުންނެވެ.

މި މަނަވަރު ފައްތާލާފައި މިވަނީ އެމެރިކާގެ ސަބްމެރިންއަކުން ދިން ހަމަލާއެއްގައި ކަމަށް ބައެއް ރިޕޯޓުތައް ބުނެ އެވެ. އެއީ ކޮން ގައުމަކުން ދިން ހަމަލާއެއް ކަމެއް އަދި މިހާތަނަށް ކަށަވަރު ކުރެވިފައި ނުވެ އެވެ.

މި މަނަވަރަކީ 2021 ވަނަ އަހަރު އިރާނުން ހިދުމަތަށް ނެރުނު މަނަވަރެކެވެ.