ސައުދީ އަރަބިއްޔާގެ ވެރިރަށް ރިޔާދުގައި ހުންނަ އެމެރިކާ އެމްބަސީއަށް އަންގާރަ ދުވަހުގެ ފަތިހު ދިން ޑްރޯން ހަމަލާތަކަކާ ގުޅިގެން، އެމްބަސީ ހިމެނޭ ސަރަހައްދުގައި އަލިފާން ރޯވެ، ގެއްލުންތަކެއް ލިބިއްޖެއެވެ.

ސައުދީގެ ދިފާއީ ވުޒާރާއިން ނެރުނު ބަޔާނެއްގައި ބުނެފައިވަނީ، ދެ ޑްރޯނެއް ބޭނުންކޮށްގެން ދިން މި ހަމަލާގައި އެމްބަސީ އިމާރާތަށް ގެއްލުންތަކެއް ލިބިފައިވާ ކަމަށެވެ. ނަމަވެސް، ހަމަލާ ދިން ވަގުތަކީ އޮފީސް ބަންދު ގަޑިއަކަށް ވެފައި، އިމާރާތް ހުސްކޮށް އޮތުމުން އެއްވެސް މީހަކަށް އަނިޔާއެއް ލިބިފައެއް ނުވެއެވެ.

ސައުދީ އަސްކަރިއްޔާއާ ގާތް މަސްދަރަކުން އޭއެފްޕީއަށް މައުލޫމާތު ދިން ގޮތުގައި، ރިޔާދުގެ ޑިޕްލޮމެޓިކް ކުއާޓާއަށް އަމާޒުކުރި ހަތަރު ޑްރޯންއެއް އެ ގައުމުގެ ވައިގެ ދިފާއީ ނިޒާމުން ވަނީ ހުއްޓުވާފައެވެ.

އެމެރިކާ އާއި އިޒްރޭލުން ދެމުންދާ ހަމަލާތަކަށް ބަދަލުހިފުމުގެ ގޮތުން، ބަހްރޭންގައި ހުންނަ އެމެރިކާގެ އަސްކަރީ މަރުކަޒަކަށް ވެސް ހަމަލާދީފައިވާ ކަމަށް އިރާނުން ބުނެފައި ވެ އެވެ.

މި ހާދިސާއާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އެމްބަސީއަށް ދިން ހަމަލާ އާއި އެމެރިކާގެ ސިފައިން މަރާލި މައްސަލައިގެ ރައްދު ވަރަށް އަވަހަށް ފެނިގެންދާނެ ކަމަށެވެ.