ރައްޔިތުންގެ މަޖިލީހުގެ މެޖޯރިޓީ ލިބުމުން ވެސް ޑޮލަރުގެ އަގު ތިރި ނުކުރެވުނު ސަބަބެއް އިގުތިސާދީ މިނިސްޓަރު މުހައްމަދު ސައީދަކަށް ވިދާޅެއްނުވެވުނެވެ.

ރައްޔިތުންގެ މަޖިލީހުގެ މެޖޯރިޓީ ލިބިއްޖެ ނަމަ ޑޮލަރުގެ އަގު 15 ރުފިޔާ 42 ލާރިއަށް ވުރެ ވެސް ތިރި ކުރާނެ ކަމަށް މަޖިލީސް އިންތިހާބުގެ ކެމްޕެއިނު ތެރޭގައި ސައީދު ކުރިން އޮތީ ވިދާޅުވެފަ އެވެ. މިއަދު އެކަމާ ގުޅޭ ގޮތުން ސުވާލު ކުރުމުން ސައީދު ދެއްކެވީ މުޅިން އެހެން ވާހަކައެކެވެ.

"ކިހާ ރަނގަޅުތޯ އަޅުގަނޑުމެންނަށް ސުޕަމެޖޯރިޓީ ލިބުނީމަ. އެއީ ކަންބޮޑުވުމެއް ނެތި ސުކޫކު ވެސް އަދާ ކުރެވެނީ. އަދި ރައްޔިތުންނަށް މީގެ ކުރިން ސަރުކާރުތަކުން ކޮށްދީފައި ހުރި ކަންތައްތަކަށް، އަޅުގަނޑު ފާޑެއް ނުކިޔަން އެއްވެސް ސަރުކާރަކުން ކުރި ކަމަކަށް، އެހެން ނަމަވެސް ކުރިއަރައިދާ އިތުރު ކަންތައްތަކެއް އެބަ އާދޭ. މިސާލަކަށް ވޭޕު މަނާވުން، މިސާލަކަށް ސިނގިރޭޓުގެ ޖެނެރޭޝަނަލް ބޭންއެއް އައުން، ހުރިހާ ރަށެއްގައި އޭޓީއެމް ބެހެއްޓުން، އާ ގިނަ އެއާޕޯޓުތަކެއް، ޓްރާންސްޕޯޓު ތެރޭގައި ކުރިން ގާއިމް ނުކުރެވިފައި ހުރި އަތޮޅުތަކުގެ ތެރޭގައި ވެސް ފެރީ ނެޓްވޯކް ގާއިމް ކުރެވިގެން ދިޔުން،" ސައީދު ވިދާޅުވި އެވެ.

މަޖިލީހުގެ މެޖޯރިޓީ ލިބިއްޖެ ނަމަ ޑޮަލަރުގެ އަގު ތިރި ކުރައްވާނެ ކަމަށް ސައީދު ވިދާޅުވީ، މަޖިލިސް އިންތިހާބުގެ ތެރޭގައި ރައީސް މުހައްމަދު މުއިއްޒާއެކު ލ. މާވަށުގައި ވާހަކަ ދައްކަވަމުންނެވެ.

"ހަމައެކަނި އަޅުގަނޑުމެންނަށް މަޖިލީހުގެ މެޖޯރިޓީ ލިބިގެން ވިޔަސް ދިވެހި ރުފިޔާ ޑޮލަރުގެ ކުރިމަތީގައި 30-40 ޕަސެންޓް ވަރުގަދަވެގެންދާނެ. ކޮބައިތޯ ނަތީޖާއަކަށް ވާނެ ކަމަކީ. 15.42 އަކަށްވުރެ ވެސް ޑޮލަރު ރޭޓް ދަށަށް ދިޔުމެއް ނޫންތޯ މުސްތަގުބަލުގައި،" ސައީދު އެއިރު ވިދާޅުވެފައިވެ އެވެ.

އެ އިންތިހާބުގައި ރައްޔިތުން ވަނީ ސަރުކާރު ހިންގާ ޕާޓީއަށް ސުޕަމެޖޯރިޓީ ދީފަ އެވެ. މަޖިލީހުގެ 93 ގޮނޑީގެ ތެރެއިން 75 ގޮނޑި ކާމިޔާބު ކުރީ ޕީއެންސީ އެވެ. އިދިކޮޅު އެމްޑީޕީއަށް ލިބުނީ އެންމެ 12 ގޮނޑި އެވެ.

ޑޮލަރުގެ އަގު ތިރި ކުރުމުގެ ބަދަލުގައި، ސަރުކާރުގެ ވިސްނުން ހުރީ ޑޮލަރުގެ އަގު ފްލޯޓު ކުރަން ކަމަށް މި ފަހުން ވަނީ ހާމަވެފަ އެވެ. އެއިރުން މިއަށްވުރެ ވެސް ޑޮލަރުގެ ރޭޓު މަތިވާނެ ކަމަށް ބެލެވެ އެވެ. އެކަމަކު، އެގޮތަށް ހެދުމުން ޑޮލަރުގެ އަސްލު އަގު ހާމަވެ، އިގްތިސާދުގެ ހަގީގީ ބުންވަރު ވެސް އެނގިގެންދާނެ ކަމަށް ތަޖުރިބާކާރުން ދެކެ އެވެ.

ޑޮލަރުގެ ތާށިކަމާ ހެދި، ކާބޯތަކެތި އަގުބޮޑުވަމުންދާ ކަމަށް ވެސް އިދާރާތަކުން ދަނީ ބުނަމުންނެވެ. މިދިޔަ އަހަރަކީ ވެއެތުވެދިޔަ 13 އަހަރު ތެރޭގައި ވެސް އިންފްލޭޝަން އެންމެ މައްޗަށް ދިޔަ އަހަރެވެ.

މި އަހަރަކީ ރާއްޖެއިން ރެކޯޑު އަދަދަކަށް އެއް ބިލިއަން ޑޮލަރުގެ ބޭރު ދަރަނި ދައްކަންޖެހޭ އަހަރެކެވެ. އޭގެ ތެރެއިން އެންމެ ބޮޑު ބަޔަކީ މީގެ ކުރިން ސަރުކާރުން ވިއްކާފައި އޮތް 500 މިލިއަން ޑޮލަރުގެ ސުކޫކެވެ. ބޮޑު ދަރަނި ދައްކަން ނިކަން އަގުބޮޑު ރޭޓެއްގައި އިތުރު ލޯނެއް ހޯދަން ވެސް ސަރުކާރުން އެބަ މަސައްކަތް ކުރެ އެވެ.