ރާއްޖެއަށް ވައިގެ މަގުން ދެ ކިލޯއަށްވުރެ ގިނަ ޑްރަގް އެތެރެކުރަން އުޅުނު ތިން މީހަކު މިދިޔަ ހުކުރު ދުވަހު ހައްޔަރުކޮށްފި އެވެ.

ފުލުހުން ބުނީ މި މައްސަލައާ ގުޅިގެން ހައްޔަރުކުރީ މެލޭޝިއާއަށް ނިސްބަތްވާ ރަންޖިނި ޖީވަނަންތަން، 38، އާއި ގދ. ވާދޫ، ފުރުސަތު، ލޫތު އިބްރާހިމް، 29، އަދި ގއ. ދާންދޫ، ސަންލައިޓްވިލާ، އަހްމަދު ރިޝްމާހް، 21 ކަމަށެވެ.

މި އޮޕަރޭޝަންގެ ތެރެއިން ލޫތު އިބްރާހިމް އާއި އަހްމަދު ރިޝްމާހް ހައްޔަރުކުރީ މާލެއިންނެވެ. މެލޭޝިއާއަށް ނިސްބަތްވާ މީހާ ހައްޔަރުކުރީ ވެލާނާ އިންޓަނޭޝަނަލް އެއާޕޯޓުންނެވެ.

މައްސަލައާ ގުޅިގެން ތިން މީހުން ކޯޓަށް ހާޒިރުކުރުމުން ރަންޖިނި ޖިވަނަންތަން އާއި ލޫތު އިބްރާހިމްގެ ބަންދަށް 15 ދުވަސް ޖަހާފައިވާއިރު، އަހްމަދު ރިޝްމާހްގެ ބަންދަށް ޖެހީ ފަސް ދުވަހެެވެ.

މުއްދަތު ޖެހި އަމުރުން އެނގޭ ގޮތުގައި ލޫތު އިބްރާހިމް އާއި އަހްމަދު ރިޝްމާހް ހައްޔަރުކުރީ ޑްރަގް ހުރި ލަގެޖާ ހަވާލުވާން ގެސްޓްހައުސްއަށް ދިޔުމުންނެވެ. އެތަނުން އެ ދެ މީހުން ފިލަން މަސައްކަތްކުރިއިރު، ކުޑަކަމުދާ ތަކެތި ދިނުމަށްވެސް ދެކޮޅު ހަދާފައިވާ ކަމަށް ވެސް ކޯޓު އަމުރުގައިވެ އެވެ.

މި އަހަރު ތެރޭގައި މިހާތަނަށް ފުލުހުން ހިންގި އޮޕަރޭޝަންތަކުގައި ގިނަ އަދަދެއްގެ ޑްރަގް އަތުލައިގަނެފައިވާކަން ފާހަގަކުރެވެ އެވެ.