ސީއެމްބިއުލާންސް އާއި ސީޕްލޭންގެ ދަތުރުތައް ފެށުމަކީ ވެލިދޫ ބޭނުންވާ އަސާސީ ތަރައްގީގެ ބަދަލުގައި ފުއްދާލެވޭނެ މިންވަރެއް ނޫން ކަމަށާއި ރަށުގެ ތަރައްގީއަށްޓަކައި ފަށާފައިވާ މުހިންމު ބޮޑެތި މަޝްރޫއުތައް ކުރިއަށް ނުގޮސް ހުއްޓިފައިވާ ކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.

ވެލިދޫގައި ސީއެމްބިއުލާންސް އާއި މޭލެއިން ސީޕްލޭންގެ ދަތުރުތައް ފެށުމާއެކު ސަރުކާރުގެ ވެރިންނާއި އެކްޓިވިސްޓުން އެކަމަށް ސަނާ ކިޔަމުންދާ ދާއިރު އައްބާސް އެކްސްގައި ރޭ ކުރެއްވި ޕޯސްޓެއްގައި ވިދާޅުވީ ރިޔާސީ އިންތިހާބާއި މަޖިލިސް އިންތިހާބާ ދިމާކޮށް ރަށުގެ ރައްޔިތުންނަށް ވެފައިވާ ގިނަ ވައުދުތަކެއް މިއަދާ ހަމައަށް އޮތީ ފުއްދައިނުދެވި ކަމަށެވެ.

"ސިޔާސީ އެދުމަށް ރަށުވަންތަ ވަތަނީ ރޫހު ނެތް އަމިއްލަ އެދުމައިގެން އުޅޭ ނ. ވެލިދޫގެ މަދު ބަޔަކު މިއަދު ސޯސަލް މީޑިއާގައި އުޅެމުންދާ ގޮތުން ހިނި އަންނަނީ!،" އޭނާ ވިދާޅުވި އެވެ.

"ރިޔާސީ އިންތިހާބު އާ މަޖުލިސް އިންތިހާބު އާ ދިމާކޮށް ތިމާ އުފަން ފަސްގަނޑަށް އެތަކެއް ވައުދުތަކެއް ވެގެން ވެރިކަމަށް ވަޑައިގެންނެވި ބޭފުޅަކު ފެށި އެއްވެސް ކަމެއް މިއަދާ ހަމައަށް ނުކުރެވި ފިނިހަކަ ދުވެލީގައި ކުރިއަށްދާ މަންޒަރު ފެންނަ ހިނދު ތިމާމެން ތި ގަބޫލު ކުރަނީ ސީއެމްބިއުލާންސް އާއި ސީޕްލޭން ދަތުރުތައް އެއީ ތިމާމެންނަށް ހައްގު މިންވަރު ކަމަށްތޯ؟"

ވެލިދޫގެ ތަރައްގީއަށް ހުރަސް އެޅިފައިވާ ބައެއް ދާއިރާތަކަށް އައްބާސް ފާހަގަ ކުރެއްވި އެވެ. އޭގެ ތެރޭގައި ވެލިދޫ މަގު ހެދުމާއި ހޮސްޕިޓަލުގެ މަސައްކަތް ކުރިއަށް ނުދިއުމާއި، ޑިޓޮކްސް ސެންޓަރުގެ ހިދުމަތް ނުލިބި ލަސްވަމުންދާކަން ފާހަގަކޮށް، ހުއްޓިފައިވާ މަޝްރޫއުތައް އޭނާ ވިދާޅުވި އެވެ.

"ވެލިދޫގެ އެންމެ މަގެެއްވެސް ހަދާ ނިމުނުތޯ؟ ވެލިދޫ ހޮސްޕިޓަލް މަސައްކަތް ކުރިއަށް ދޭތޯ؟ ވެލިދޫ ޑިޓޮކްސް ސެންޓަރާއި ޕޮލިސް ޕޯސްޓު ނިމި ހިދުމަތް ލިބޭތޯ؟ ވެލިދޫ ޖޫނިއަ ކޮލެޖު ނިމި ކިޔަވާދޭތޯ؟ ވެލިދޫ ކުޑަކުދިންގެ ޕާކް ނިމި ކުދިން ކުޅެން ތިބޭތޯ؟ ވެލިދޫ އައުޓުޑޯ ޖިމް ރިނޮވޭޓުކޮށް ނިމުނީތޯ؟ނިމިދިޔަ ސަރުކާރުން ފަށާފައި ނުނިމި ހުރި 4 ކުލާސްރޫމް ނިމުނީމައި ރަށު ތަރައްގީ ނިމުނީތޯ؟،" އެނާ ވިދާޅުވި އެވެ.

ސީއެމްބިއުލާންސެއް ނުވަތަ ސީޕްލޭން ދަތުރުތަކެއް ފެށުމަކީ ރަށަށް ބޭނުންވާ އަސާސީ ތަރައްގީގެ ބަދަލުގައި ފުއްދާލެވޭނެ ކަންކަން ނޫން ކަމަށާއި ސޯޝަލް މީޑިއާގައި ބައެއް ފަރާތްތަކުން ތަރައްގީގެ ހަގީގީ މަންޒަރު އޮޅުވާލުމަށް މަސައްކަތް ކުރި ނަމަވެސް، ރަށުގެ ހަގީގީ ހާލަތު އޮތީ "މަޑުޖެހިފައި" ކަމަށް އޭނާ ވިދާޅުވިއެވެ.

"ރަށުގެ ވީރާނާވެ، ނެތިދިޔަ ތަރައްޤީއާ މެދު ކުޑަކޮށްވެސް ވިސްނާލުމެއް ނެތި ނެގިނެގިފައި ޖެހުމަކުން ނުފުދޭނެކަން ދަންނާތި. ސިޔާސީ ވެރިންގެ ސިޔާސީ މަސައްކަތާއި ރަށު ތަރައްގީ ނޭނގޭ ބަޔަކަށް ކޮޅުކެހި ލިބޭލެއް އަވަސްވާނެކަން ދަންނާތި،" އައްބާސް ވިދާޅުވިއެވެ.