މާފަންނު ދަނޑުގައި އަޅާފައިވާ ގުދަންތަކުގެ އެއްބަސްވުމަށް އަމަލުކުރުން ނިމުމަކަށް ގެނެސް އެ ބިން ހުސްކުރަން ފުޓްބޯލްް އެސޯސިއޭޝަން އޮފް މޯލްޑިވްސް (އެފްއޭއެމް) އިން ދިން 14 ދުވަހުގެ މުހުލަތު ހަމަވިއިރު އެކަން ނުކުރާތީ އިތުރު 7 ދުވަހުގެ މުހުލަތެއް ދޭން ނިންމައިފި އެވެ.

އެފްއޭއެމްގެ ހިންގާ ކޮމިޓީގެ އިއްޔެ ބައްދަލުވުމުގެ ނިންމުންތައް ހިއްސާކުރަން އެ އެސޯސިއޭޝަނުން ނެރުނު ބަޔާނުގައި ބުނެފައިވަނީ، މާފަންނު ސްޓޭޑިއަމް ސަރަހައްދުގައި ފީފާ އިން ހަރަދުކޮށްގެން ހަދަމުންދިޔަ އިމާރާތާ އިންވެގެން އެކި ކަންކަމަށް ދޫކޮށްފައިވާ ބިންތައް ހުސްކުރަން ދިން 14 ދުވަހުގެ މުއްދަތުގައި އެކަން ކޮށްފައިނުވާ ކަމަށެވެ.

"އެކިކަންކަމަށް ދޫކޮށްފައިވާ ބިންތައް ހުސްކުރަން ދިން 14 ދުވަހުގެ މުއްދަތުގައި އެތަންތަން ހުސްކޮށްފައި ނުވާތީވެ، އިތުރު 7 ދުވަހުގެ މުއްދަތު ދިނުމަށް ނިންމުމާއ،ި އެ މުއްދަތުގެފަހުން އެބިމުގައިވާ މުދަލަކަށ،ް ނުވަތަ އުޅަދަކަށް ނުވަތަ ވަގުތީގޮތުން ހަދާފައިވާ އިމާރާތަކަށް ލިބޭ ގެއްލުމުގެ ޒިންމާ ފުޓްބޯޅަ އެސޯސިއޭޝަނުން ނުވާނެކަން އަންގާ ދިވެހިސަރުކާރުގެ ގެޒެޓްގައި އިޢުލާންކުރަން ނިންމުން،" އެފްއޭއެމްގެ ބަޔާނުގައިވެ އެވެ.

އެފްއޭއެމުން މީގެ ކުރިން ވެސް ގެޒެޓްކުރި އިއުލާނެއްގައި ބުނެފައިވަނީ، އެފްއޭއެމްގެ ބެލުމުގެ ދަށުގައިވާ މާލޭގެ މާފަންނު ސްޓޭޑިއަމް ސަރަހައްދު (ކޮށީ ނަމްބަރު 387) ގައި ފީފާއިން ޚަރަދުކޮށްގެން ހަދަމުންދިޔަ ސްޕޯޓްސް އެރީނާ އާއި އޮފީސް ބިލްޑިން ހިމެނޭ ބިމުގައި، އެ އިމާރާތް ހިމެނޭ ބިން ފިޔަވައި އިތުރު ބިން އެކިކަން ކަމަށް ދޫކޮށްފައިވާކަމުގެ ލިޔުން، މި އެސޯސިއޭޝަނުން 10 އޮގަސްޓް 2025 ވަނަ ދުވަހުކުރި އިޢުލާން ނަންބަރު (FAM/IUL/2025/027)އާ ގުޅިގެން ލިބިފައިވާ ކަމަށެވެ.

އެ ގޮތުން، 2017 އިން ފެށިގެން އެފްއޭއެމަށް މާފަންނު ސްޓޭޑިއަމް ސަރަހައްދުގެ ބިން 50 އަހަރަށް ދޫކޮށްފައިވާ މަޤްސަދާއި ޚިލާފަށް، މި އެސޯސިއޭޝަންގެ އެގްޒެކެޓިވް ކޮމިޓީގެ ނިންމުމެއް ނެތި، އެކި ފަރާތްތަކަށް ގުދަން ހެދުމަށާއި އެކި ކަންކަންކަމަށް ބިން ދޫކޮށްފައިވާ އެއްބަސްވުންތަކަށް އަމަލު ނުކުރުމަށް މިއެސޯސިއޭޝަންގެ އެކްޒެކެޓިވް ކޮމިޓީގެ ނުވަ ވަނަ ބައްދަލުވުމުގައި ނިންމާފައިވާ ކަމަށެވެ. އަދި އެ ބައްދަލުވުމުގައި، އެފްއޭއެމް ހިންގާ ކޮމިޓީން ވަނީ، މާފަންނު ސްޓޭޑިއަމް ސަރަހައްދު (ކޮށީ ނަމްބަރު 387) ގައި ފީފާއިން ޚަރަދުކޮށްގެން ހަދަމުންދިޔަ ސްޕޯޓްސް އެރީނާ އާއި އޮފީސް ބިލްޑިންގއާއި އިންވެގެން، ފުޓްބޯޅަ ދަނޑުގެ ބޮޑު ދެ ދަނޑުހެދުމަށް ނިންމައިފަ އެވެ.