ހިލަ އާއި ހިލަވެލީގެ އިތުރުން ސިމެންތި ލިބުން ދަތިވެ، ރާއްޖޭގެ ބާޒާރުގައި އެ ތަކެތި ވަރަށް ބޮޑަށް ތަދުވެއްޖެ އެވެ.

އެނގިފައިވާ ގޮތުގައި ހިލަ އާއި ހިލަވެލީގެ އިތުރުން ސިމެންތި ލިބުން ދަތިވީ އެ ތަކެތި އެންމެ ގިނައިން ރާއްޖެއަށް އެތެރެކުރާ ޑުބާއީ އިން އުސޫލަށް ގެނައި ބަދަލަކާ ގުޅިގެންނެވެ.

ސިމެންތި އާއި ހިލަވެލީގެ އިތުރުން ހިލަ ރާއްޖެއަށް އެތެރެކޮށް ވިއްކާ ކުންފުންޏެއްގެ އިސް ބޭފުޅަކު އަދަދު އަށް ވިދާޅުވީ ސިމެންތި އާއި ވެލި މިހާރު ހުރީ ކުރިއަށް އޮތް ހަފުތާއެއްހާ ދުވަހަށްވާ ވަރަށް ކަމަށެވެ.

"މި ދޭތެރެއަކުން ސިމެންތިއާ ވެއްޔާ ހުސްވެފައި ހުރެފައި ވަރަށް މަދުން ލިބިފައި ހުރީ. ސަޕްލައި ކޮޅުން ނުލިބެނީ އަހަރުން ބޭނުންވާ ވަރަށް، ޑުބާއީ އިން އަހަރުމެން ގެންނަނީ، އެމީހުންނަށް ބޭނުންވާ ވަރަށް ނުދެވެނީހެން ހީވަނީ،" އޭނާ ބުންޏެވެ.

އެ ތަކެތި ލިބުން ދަތިވެފައި ވާތީ، ރާއްޖެއިން އެ ތަކެތި ގަންނަން ބޭނުންވާ މީހުންނަށް، އެ މީހުން ބޭނުންވާ ވަގުތުގައި އެ ތަކެތި ސަޕްލައި ވެސް ނުކޮށްދެވޭ ކަމަށް އޭނާ ބުންޏެވެ. މިހާރު ލިބޭ އޯޑަރުތައް ދެން ސަޕްލައި ކޮށްދެވޭނެ ކަމަށް ބެލެވެނީ ދެ ހަފުތާއެއްގެ ތެރޭގައި ކަމަށް އެނާ ބުންޏެވެ.

މައުލޫމާތު ލިބިފައިވާ ގޮތުގައި އެންމެ ފުޅާދާއިރާއެއްގައި މި ތަކެތި ވިއްކާ، އެސްޓީއޯއިން ވެސް މިހާރު ވަނީ ހިލަ އާއި ހިލަވެލީގެ އިތުރުން ސިމެންތި ވަރަށް ބޮޑަށް މަދުވެފަ އެވެ.

މި ނޫހަށް މައުލޫމާތު ދިން އިތުރު ވިޔަފާރިވެރިއަކު ބުނީ ޑުބާއީ އިން މިހާރު އެމް ސޭންޑު ނުވެސް ލިބޭ ކަމަށެވެ. އަދި، މިހާރު ރާއްޖޭގައި ހުރި ސްޓޮކު ކުރިއަށް އޮތް ހަފުތާއެއްހާ ދުވަހުގެ ތެރޭގައި ހުސްވާނެ ކަމަށް އޭނާ ލަފާކުރި އެވެ.

"އެމް ސޭންޑު ނުލިބޭ މިހާރު، އޯޑަރު ދިނީމާ ލޯޑު ކުރަން ބުނީ މާޗު މަހުގެ ތެރެއަށް، މިހާރު އަހަރުމެން އަތުގައި ހުރި އެމް ސޭންޑު ހުސްވާނެ ފަސް ވަރަކަށް ދުވަހުގެ ތެރޭގައި،" އޭނާ ބުންޏެވެ.

ހިލަ، ހިލަވެލި އަދި ސިމެންތި ލިބުން ދަތިވުމާއެކު ރާއްޖޭގެ ބާޒާރުގައި މި ތަކެތީގެ އަގު ވެސް ވަނީ ހިސާބަކަށް އުފުލިފަ އެވެ. އެގޮތުން، މީގެ ކުރިން 39ރ. އަށް ވިއްކަމުންދިޔަ ވެއްޔާއި ހިލަ ބަސްތާއެއްގެ އަގު މިހާރު ހުރީ 42ރ. އަށެވެ. އަދި، މީގެ ކުރިން 100ރ. އަށް ވިއްކަމުންދިޔަ ސިމެންތީގެ އަގު ވަނީ 103ރ. އަށް ބޮޑުވެފަ އެވެ.