ބޭސް ނުލިބުމުގެ ޝަކުވާ ކިތަންމެ ބޮޑަސް، އެ މައްސަލަ ހައްލުވަމުންދާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެ އެވެ.

ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ނާޒިމް ވިދާޅުވީ ބޭސް ލިބުމުގެ ދަތި ހައްލުކުރުމަށް އެޅި ގިނަ ފިޔަވަޅުތަކުން ލުއިތަކެއް ލިބެމުންދާ ކަމަށެވެ.

ނަމަވެސް ބޭހުގެ މައްސަލައަށް ހިތްހަމަޖެހުމެއް ލިބޭނީ ހުރިހާ މައްސަލައެއް 100 ޕަސަންޓު ހައްލުވީމަ ކަމަށާއި އެ އަމާޒަށް ވާސިލުވާން މަސައްކަތް ކުރަމުންދާ ކަމަށް ނާޒިމް ވިދާޅުވި އެވެ.

"އަޅުގަނޑު ހަމަ ތަކުރާރުކޮށް ދަންނަވަމުން މިދަނީ ބޭސް ލިބުމުގެ މި މައްސަލަަތައް ހައްލުކުރުމަށްޓަކައި ވަރަށް ގިނަ ފިޔަވަޅުތައް އެޅި، އަޅުގަނޑުމެން ވަރަށް ކަށަވަރުކަމާއެކީ ދަންނަވާލަން ކެރޭ މިއަށް ވަރަށް ބޮޑު ލުއިތަކެއް ލިބި ހައްލުތަކެއް ލިބެމުންދާ ކަމަށް،" ނާޒިމް ވިދާޅުވި އެވެ.

"އެހެންނަމަވެސް އަޅުގަނޑުމެންނަށް އެންމެ ހިތްހަމަޖެހުން ލިބޭނީ ހަމަ ހުރިހާ މައްސަލަތަކެއް 100 ޕަސަންޓަށް ހައްލުވީމަ. އެހެންނޫންތޯ. އެ ދިމާއަށް ދިޔުމަށްޓަކައި މި މަސައްކަތް ކުރަން ޖެހޭނީ."

ނާޒިމް ވިދާޅުވީ ބޭހުގެ މައްސަލަ ހައްލު ކުރުމަށް ސަޕްލައިގެ އިތުރުން އާސަންދަ ނިޒާމާއި އެޑްމިނިސްޓްރޭޓިވް ޕްރޮސެސްގެ ތެރެއިން ރަނގަޅު ކުރަން ޖެހޭ ކަންކަން ކުރާމުންދާ ކަމަށެވެ.

"މީގައި ގަވަނަންސް ނިޒާމުގެ ތެރެއިން ކުރަންޖެހޭ ކަންތައްތަކާއި ބައެއް ސަޕްލައިގައި ކުރަންޖެހޭ މަސައްކަތްތަކާއި އާސަންދައިން ލިބެން މިއިންނަ ނިޒާމުގައި އެއިންނަ އެޑްމިނިސްޓްރޭޓިވް ޕްރޮސެސްގެ ތެރޭގައި ރަނގަޅު ކުރަން ޖެހޭ ކަންތައްތަކާއި މި ހުރިހާ ކަންތައްތަކަށް ރިޔާޔަތްކުރެވިގެން މި މަސައްކަތް މިކުރެވެމުންދަނީ،" ނާޒިމް ވިދާޅުވި އެވެ.

ބޭސް ސަޕްލައި ވަރުގަދަ ކުރުމަށް އެސްޓީއޯއަށް ބޭސް ސަޕްލައި ބޮޑުތަނުން އިތުރު ކުރެވި އެސްއޯޕީތައް ވަރުގަދަކޮށް 40 ޓްރީޓްމަންޓް ގައިޑްލައިން ވެސް އެކުލަވާލެވިއްޖެކަން ނާޒިމް ފާހަގަކުރެއްވި އެވެ.

ނަމަވެސް ނާޒިމް ވިދާޅުވީ އެންމެ ބޮޑު ގޮންޖެހުމަކީ ވަކި ބްރޭންޑެއް ޕޭޝަންޓަކު ހޯދަން އުޅުން ކަމަށެވެ. އެގޮތުން ނާޒިމް ވިދާޅުވީ އެ ޖެނެރިކަކުން ޓްރީޓްމަންޓް ލިބެން އޮތް ހާލަތެއްގައި އެކަން ހައްލު ކުރެވޭނީ ބޭސް ޕްރިސްކްރައިބްކުރާ ޑޮކްޓަރު އުހުލުވެރި ކުރުވައި ސިޔާސަތު ތަންފީޒު ކުރެވިގެން ކަމަށެވެ.

ރާއްޖެއަށް ދިމާވެފައިވާ ބޭހުގެ ދަތިކަމުން އަރައިގަތުމަށް ސަރުކާރުން ވަނީ "ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް" ގެ ނަމުގައި ރާއްޖެއަށް ބޭސް އެތެރެ ކުރަން ހާއްސަ ކުންފުންޏެއް ވެސް އުފައްދާފަ އެވެ.

މި ކުންފުނި އުފެދުމާއެކު ބޭސް އެތެރެކުރުމުގެ މަސައްކަތް ކުރަމުން އަންނަ ސަރުކާރުގެ ކުންފުނި، އެސްޓީއޯ އިން ކުރަމުން އަންނަ ހުރިހާ މަސައްކަތެއް އެ ކުންފުނީގެ ދަށަށް ވަނީ ބަދަލުވެފަ އެވެ.

މި ސަރުކާރު ވެރިކަމާ ހަވާލުވި ފަހުން ރާއްޖެއިން ބޭސް ލިބުމުގައި ބޮޑެތި ދަތިތަކެއް ކުރިމަތިވި އެވެ. ސަރުކާރުން ފުރަތަމަ އެކަން ދޮގުކުރި އެވެ. އޭގެ ފަހުން މުހައްމަދު މުއިއްޒު ބޭހުގެ ދަތިކަމުގެ ސަބަބެއް ކަމުގައި ދެއްކެވީ، "މެޑިކަލް މާފިއާ" ނުވަތަ ސިއްހީ ހިދުމަތްތަކުގެ ވިޔަފާރި ކުރާ ފަރާތްތަކުން ގަސްތުގައި ބޭސް ނުގެނެއުމެވެ.

އެ ވާހަކަތަކަށްފަހު ބޭސް ލިބުމުގައި ދަތިތަކެއް ހުރިކަމަށް ރައީސް މުއިއްޒު އެއްބަސްވެވަޑައިގެންނެވީ މެއި، 3، 2025، ގައި ބޭއްވި ނޫސްވެރިންގެ ބައްދަލުވުމުގަ އެވެ. އެ ދުވަހު ވެސް ރައީސް ވަނީ އެކަމުގެ ޒިންމާ ސަރުކާރުން ނެގުމުގެ ބަދަލުގައި ވިޔަފާރިވެރިން ކުށްވެރިކުރައްވައި ވާހަކަދައްކަވައިފަ އެވެ

ރާއްޖެއަށް ދިމާވެފައިވާ ބޭހުގެ ދަތިކަން އެއްކޮށް ހައްލުވާނެ ކަމަށް މުއިއްޒު ދެއްވި ތާރީހުގައި ވެސް އެކަން ހައްލުވެފައެއް ނުވެ އެވެ. ގިނަ ބަޔަކު އަންނަނީ ޒަރޫރީ އެތަކެއް ބޭހެއް ނުލިބުމުގެ ޝަކުވާ ކުރަމުންނެވެ.