ހުޅުމާލޭގެ ދެވަނަ ފިޔަވަހީގެ ޗެނެލް ޕާކް ސަރަހައްދުގައި ހިންގުމަށް ހަމަޖެހިފައިވާ ބިޔަ ލަގްޒަރީ ހައުސިން މަޝްރޫއު ހިންގާނެ ބަޔަކު ހޯދަން އުސިން ޑިވެލޮޕްމަންޓް ކޯޕަރޭޝަނުން ހުޅުވާލީ އެފަދަ މަޝްރޫއެއް ހިންގަން ބޭނުންވާ ކަމަށް ބުނެ މަޝްރޫއު ހަވާލުކުރި ޗައިނާގެ ނަންޓޮންގް ޒިންހުއާ ކޮންސްޓްރަކްޝަން ގްރޫޕުން މެއިލް އެއް ފޮނުވުމުން ކަން އެނގިއްޖެ އެވެ.

މި މަޝްރޫއު ހިންގުމަށް ޝައުގުވެރިވާ ފަރާތްތަކަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމަށް އެޗްޑީސީއިން ހުޅުވާލީ 18 ޑިސެމްބަރުގަ އެވެ. އެ އިއުލާނުގައި އީއައިއޭ ހުށަހެޅުމަން އޮތް ސުންގަޑިއަކީ ޑިސެމްބަރު 24، ގެ 12:00 އެވެ. ހަ ދުވަހުގެ މުއްދަތެކެވެ.

އިއުލާން ކުރުމާއި ހަމައިން ފެށިގެން މަޝްރޫއު އެވޯޑުކުރުމާއި ހަމައަށް ޝައްކުކުރެވޭ އެތައް ކަމެއް ހިނގާފައިވާތީ މި ނޫހުން ވާނީ މި މަޝްރޫއާއި ގުޅޭ އެޗްޑީސީގެ އެތެރޭގެ ރަސްމީ ބައެއް ލިޔެކިޔުންތަކާއި އިތުރު ބައެއް މައުލޫމާތު ހޯދާފަ އެވެ.

މި ނޫހަށް ލިބިފައިވާ ލިޔެކިޔުންތަކުން އެނގޭ ގޮތުގައި އެޗްޑީސީ އިން މި މަޝްރޫއު އިއުލާން ކުރުމުގެ ކުރިން ހުޅުމާލެ ދެވަނަ ފިޔަވަހީގައި ލަގްޒަރީ އެޕާޓްމަންޓް ބިލްޑިންއެއް ތަރައްގީކުރަން ބޭނުންވާ ކަމަށް ބުނެ ނަންޓޮންގް ކުންފުނިން އެޗްޑީސީއަށް ވަނީ މެއިލް އެއް ފޮނުވާފަ އެވެ.

ޗައިނާ ކުންފުނިން އެޗްޑީސީއަށް އެ މެއިލް ފޮނުވީ މި މަޝްރޫއަށް އީއޯއައި ހުށަޅަން ހުޅުވާލުމުގެ ދެ ދުވަސް ކުރިން ޑިސެމްބަރު 16، ގަ އެވެ.

އޭރު ނަންޓޮންގް ކުންފުނިން ވަނީ މި މަޝްރޫއަށް ބޭނުންވާ ހުރިހާ ލިޔެކިޔުމެއް ތައްޔާރުކޮށްފަ އެވެ. މިކަމަށް ހެކިދެނީ އެ ކުންފުނިން ހުށަހެޅި ލިޔެކިޔުންތަކުގައި ޕަބްލިކް ނޮޓަރީ ޑިސެމްބަރު 7، ގައި ސޮއިކޮށްފައި އޮތުމުންނެވެ.

އެޗްޑީސީއިން ހުޅުވާލި ފުރުސަތުގައި ޖުމްލަ ނުވަ ކުންފުންޏަކުން މި މަޝްރޫއު ހިންގަން ޝައުގުވެރިކަން ފާޅުކުރި އެވެ. އޭގެތެރެއިން ޝަރުތުހަމަވާ ކަމަށް އެޗްޑީސީއިން ކަނޑައެޅީ ތިން ކުންފުންޏެއްގެ އެވެ. ގިނަ ކުންފުނިތައް ޝަރުތު ހަމަނުވާ ކަމަށް ނިންމާފައިވަނީ ދިން ކުރު މުއްދަތުގައި ބޭނުންވާ ހުރިހާ ޑޮކިއުމެންޓެއް ހުށަޅާފައި ނެތް ކަމަށް ބުނެ އެވެ.

މިހާތަނަށް ރާއްޖޭގައި ހިންގާ އެންމެ ބޮޑު އެއް ލަގްޒަރީ ހައުސިން މަޝްރޫއު ނަންޓޮންގް ކުންފުންޏަށް ދޭން ނިންމީ ހުށަހެޅުންތައް ލިބުނުތާ 24 ގަޑިއިރު ވެސް ނުވަނީސް ޑިސެމްބަރު 25، ގައި ބޭއްވި އެޗްޑީސީގެ ބޯޑު ބައްދަލުވުމުގަ އެވެ.

15 ބުރިއަށް އިމާރާތް ކުރުމުގެ ހުއްދަ ލިބޭ އެ ސަރަހައްދުން އެ މަޝްރޫއުއަށް ދޫކުރަން ނިންމާފައި ވަނީ 125,387.81 އަކަފޫޓުގެ ބިމެކެވެ. އެ ބިމާއެކު އެ މަޝްރޫއު ހިންގާ ބަޔަކަށް ބޭނުންކުރެވޭ ޖުމުލަ ބިމުގެ ބޮޑުމިނަކީ 1.3 މިލިއަން އަކަފޫޓެވެ. އިއުލާނާއެކު އާންމުކުރި ކުރެހުންތަކުން އެނގޭ ގޮތުގައި އެއީ ޗެނެލް ޕާކް ސަރަހައްދު ވެސް ހިމެނޭ ގޮތަށެވެ.

މި ނޫހަށް ލިބިފައިވާ ލިޔެކިޔުންތަކުން އެނގޭ ގޮތުގައި ނަންޓޮންގް ކުންފުނިން މި މަޝްރޫއު ހިންގާނީ އެ ކުންފުނިން ފައިނޭންސް ކުރާ ގޮތަށެވެ. މަޝްރޫއުގެ ވެލިއުގެ ގޮތުގައި ލިޔެކިޔުންތަކުގައި ޖަހާފައިވަނީ 76 މިލިއަން ޑޮލަރެވެ. އެއީ 1.1 ބިލިއަނެއްހާ ރުފިޔާ އެވެ.

މަޝްރޫއު ހިންގުމަށް ނަންޓޮންގް އިން އެޗްޑީސީ އާއެކު ޖޮއިންޓް ވެންޗާއެއް އުފައްދާނެ އެވެ. ޖޭވީގެ 70 ޕަސެންޓު ހިއްސާ އޮންނާނީ ޗައިނާ ކުންފުނީގެ ނަން މަތީގަ އެވެ.

މިދިޔަ ހަފުތާ އެެޗްޑީސީގެ ބޯޑުން މި މަޝްރޫއު ނަންޓޮންގް އާ ހަވާލުކުރުމުގެ އިތުރުން ތިން މަސްދުވަހުގެ ފްރޭމްވޯކް އެގްރީމެންޓެއް ހެދުމަށް ފާސްކުރި އެވެ. މި މުއްދަތުގެ ތެރޭގައި މަޝްރޫއުގެ ދަށުން ދެވޭ ބިމާއި މުގާބިލުގައި ކުރާ ސީއެސްއާރު ހަރަދުގެ އިތުރުން މަޝްރޫއުގެ ޑިޒައިނާއި އެހެން ތަފުސީލުތައް ނިންމަން ޖެހެ އެވެ.

މި މަޝްރޫއު އިއުލާނު ކުރުމާއެކު އަދަދު ނޫހާ ވާހަކަ ދެއްކި ބައެއް ވިޔަފާރިވެރިން ފާހަގަކުރި ގޮތުގައި، މީގެ ކުރިން މިއަށްވުރެ މާ ކުދި މަޝްރޫއުތަކަށް ވެސް މިއަށްވުރެ ދިގު މުއްދަތު ދީފައި އެބަހުއްޓެވެ. 6 ދުވަހުގެ ތެރޭގައި ފަންނީ ދިރާސާތައް ހަދައި، ފައިނޭންޝަލް މޮޑެލްތައް ތައްޔާރުކޮށް ބިޑު ހުށަހެޅުމަކީ އާންމު އިންވެސްޓަރަކަށް ކުރެވޭނެ ކަމެއް ނޫނެވެ.

މިއީ މިކަމުގެ މައުލޫމާތު ކުރިން ލިބި، ހުރިހާ ލިޔެކިޔުމެއް ތައްޔާރުކޮށްގެން ތިބި "ވަކި ބަޔަކަށް" މަގުފަހިކޮށްދިނުމަށް ކޮށްފައިވާ ކަމެއް ކަމަށް ބެލުމުގެ ޖާގަ ބޮޑު ކަމަށް އޭރު އެ މީހުން ބުންޏެވެ. މިހާރު މި ނޫހަށް ލިބިފައިވާ ލިޔެކިޔުންތަކުން އެކަން ކަށަވަރުވެ އެވެ.