ރައީސް މުހައްމަދު މުއިއްޒު ހައުސިން މިނިސްޓަރުކަމުގައި ހޭދަކުރެއްވި ފަހު 30 މަސް ދުވަހުގެ ތެރޭގައި އެމަނިކުފާނުގެ އެކައުންޓަށް ނަގުދު ފައިސާގެ ގޮތުގައިފަސް މިލިއަނަށް ވުރެ ގިނަ ރުފިޔާ ޖަމާކުރިކަން ހާމަވެއްޖެ އެވެ.

އެމްޑީޕީގެ ފުރަތަމަ ސަރުކާރު ވައްޓާލުމަށް ފަހު 2012 ގައި އުފެދިގެން އައި ސަރުކާރާއި 2013 ވަނަ އަހަރު ބޭއްވި ރިޔާސީ އިންތިހާބު ކާމިޔާބުކުރި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ސަރުކާރުގައި މުއިއްޒު ހުންނެވީ ހައުސިން މިނިސްޓަރުގެ މަގާމުގަ އެވެ.

ސަރުކާރެއްގެ ވަޒީރަކަށް މުސާރަ އާއި އިނާޔަތްތަކުގެ ގޮތުގައި މަހަކު ލިބެނީ 66،000ރ. އެވެ. އެ ފައިސާ މުއިއްޒުގެ އެކައުންޓަށް ޖަމާކުރާނީ ފިނޭންސް މިނިސްޓްރީންނެވެ. ނަގުދު ފައިސާއިން ސަރުކާރުގެ އެއްވެސް މުވައްޒަފަކަށް މުސާރަ ނުދެ އެވެ.

ނަމަވެސް، އަދަދު ނޫހަށް ލިބިފައިވާ ލިޔެކިޔުންތަކުން އެނގޭ ގޮތުގައި މާޗު 2016، އިން ފެށިގެން ސެޕްޓެމްބަރު 2018، ގެ ނިޔަލަށް މުއިއްޒުގެ އެކައުންޓަށް ޑޮލަރާއި ދިވެހި ރުފިޔާ ހިމެނޭހެން ފަސް މިލިއަނަށްވުރެ ގިނަ ފައިސާ ވަނީ ޖަމާކޮށްފަ އެވެ.

މި މުއްދަތުގެ ތެރޭގައި ބޭންކް އޮފް މޯލްޑިވްސް ގައި ހުޅުވާފައި ހުރި މުއިއްޒުގެ ރުފިޔާ އަދި ޑޮލަރު އެކައުންޓުތަކަށް 85 ފަހަރަކު ނަގުދު ފައިސާ ޖަމާކޮށްފައިވެ އެވެ. އެއީ 5،254،252ރ. އާއި 15،600 ޑޮލަރެވެ. ބޭންކު ރޭޓުން ޑޮލަރު މާރުކޮށްފިނަމަ ޖުމްލަ ފައިސާގެ އަދަދު 5،494804ރ. އަށް އަރަ އެވެ.

މިދިޔަ އަހަރު ކުރީކޮޅު އާންމުވި އެމްއެމްއޭގެ ފައިނޭންޝަލް އިންޓެލިޖެންސް ރިޕޯޓެއްގައި ވެސް މި ފައިސާތަކުގެ ވާހަކަ އޮތެވެ. ނަމަވެސް، އޭރު ހާމަވީ 2015 އިން ފެށިގެން މުއިއްޒުގެ އެކައުންޓަށް ޖަމާވި ފައިސާގެ އަދަދުތަކާއި ބޭންކުތަކަށް އޮޅުވާލަން އެމަނިކުފާނު ކުރެއްވި ބައެއް ކަންކަމެވެ.

މީގެ ތެރޭގައި، އެމަނިކުފާނުގެ ބައްޕަ ދުނިޔޭގައި ހުންނެވިއިރު އެއްވެސް ބޭންކު އެކައުންޓެއް ނުގެންގުޅޭ ކަމަށް ވިދާޅުވެ މުއިއްޒު ވަނީ މޯލްޑިވްސް އިސްލާމިކް ބޭންކް (އެމްއައިބީ) އަށް މައުލޫމާތު ދީފަ އެވެ.

ނަގުދު ފައިސާތަކުގެ އިތުރުން، މުއިއްޒުގެ މިނިސްޓަރު ކަމުގައި ރާއްޖޭގައި ބޮޑެތި މަޝްރޫއު ތަކެއް ހަވާލުކުރި ބޭރުގެ ކުންފުނިތަކަކުން އެމަނިކުފާނުގެ އަމިއްލަ އެކައުންޓަށް އެތައް ހާސް ޑޮލަރެއް ޖަމާކޮށްފައިވެ އެވެ. އެ ވާހަކަތައް ރިޔާސީ ކެމްޕޭނުގެ ދުވަސްވަރު މި ނޫހުންގެ ގެނެސްދީފައިވެ އެވެ.

މީގެ ތެރޭގައި ހިމެނެނީ، ވިންރަން އިންޓަނޭޝަނަލް ކިޔާ ބޭރުގެ ކުންފުންޏަކުން ތިން ފަަހަރެއްގެ މަތިން މުއިއްޒުގެ އެކައުންޓަށް ޖަމާކުރި 24,348.77 ޑޮލަރު (375,458.033ރ.) އާއި ސިނަމާލެ ބްރިޖާއި ގުޅިގެން ގާއިމުކުރި ހައިވޭ ތަރައްގީކުރި ހުނާން ކޮންސްޓްރަކްޝަން ކުންފުނިން ހަތަރު ފަހަރެއްގެ މަތިން މުއިއްޒުގެ އެކައުންޓަށް ޖަމާކުރި 70,499 ޑޮލަރު (1,087,094.58ރ.) އެވެ.

މުއިއްޒުގެ އެކައުންޓަށް ޑޮލަރު ވަނުމުގެ ކުރިން އޮކްޓޯބަރު 15, 2017 ގައި ދައުލަތުގެ ބަޖެޓުން ފިނޭންސް މިނިސްޓްރީން ވަނީ ހުނާން ކޮންސްޓްރަކްޝަނަށް 105,950 ޑޮލަރު (1,633,749 ރުފިޔާ) ޖަމާކޮށްފަ އެވެ. މިއީ މުއިއްޒުގެ މިނިސްޓަރު ކަމުގައި އެ ކުންފުންޏަށް ދިން މަޝްރޫއެއްގެ ފައިސާ އެވެ.

މި މުއާމަލާތްތަކާ ގުޅޭގޮތުން މި ނޫހުން ސުވާލުކުރުމުން ބުނެފައިވަނީ އެއީ މުއިއްޒުގެ އަމިއްލަ ރޯހައުސްއެއް އެ ކުންފުނިތަކަށް ކުއްޔަށް ދިނުމުން ދައްކާފައިވާ ފައިސާ ކަމަށެވެ. އެއް މުއްދަތެއްގައި ތިން ކުންފުންޏަކަށް އެއް ތަނެއް ކުއްޔަށް ދިން ގޮތެއް މިހާތަނަށް ވެސް މުއިއްޒު ސާފުކޮށްދީފައެއް ނުވެ އެވެ.

އެފްއައިޔޫ ރިޕޯޓު އާންމުވުމާއި ގުޅިގެން މިދިޔަ އަހަރު ބޭއްވި މަޖިލިސް އިންތިހާބުގެ ކެމްޕޭން ޖަލްސާއެއްގައި ވާހަކަދައްކަވަމުން މުއިއްޒު ވަނީ އިދިކޮޅު ފަރާތްތަކުން "އުޑުގަ ޖެހިފަ ބިމުގަ" ޖެހުނަސް އެމަނިކުފާނާ ދެކޮޅަށް ދެއްކޭނެ އެއްވެސް ކަމެއް ނޯންނާނެ ކަމަށް ވިދާޅުވެފަ އެވެ.

ތިބޭފުޅުން އަދި ތިގޮތަށް އަޅުގަނޑުގެ ބޮލުގަ ކަމެއް އަޅުވަން އުޅެގެން، ކުރީގަވެސް ނުވި ކަމެއް ދެނެއްވެސް ނުވާނެ، އުޑުގަ ޖެހިފަ ބިމުގަ ޖެހުނަސް އަޅުގަނޑާ ދެކޮޅަށް ދެއްކޭނެ އެއް ކަމެއް ވެސް ނޯންނާނެ،" އަޑުހަރުކޮށް ރައީސް ވިދާޅުވި އެވެ.

ރައީސް މިފަދައިން ވިދާޅުވީ އިދިކޮޅު އެމްޑީޕީ އަދި ޕީއެންއެފުން ވަނީ ރައީސްގެ މައްޗަށް ކުރެވޭ މި ބޮޑެތި ތުހުތަމުތައް ބެލުމަށް ދައުލަތުގެ ކަމާބެހޭ އިދާރާތަކަށް ގޮވާލަމުން ދަނިކޮށެވެ. ނަމަވެސް މިކަމާ ގުޅިގެން ސަރުކާރުގެ ތަހުގީގީ އެއްވެސް އިދާރާއަކުން މިހާތަނަށް ބަހެއް ބުނެފައެއް ނުވެ އެވެ.