ސްރީ ލަންކާގެ ގައުމީ ފުޓްބޯޅަ ޓީމުގެ ކީޕަރު، ސުޖަން ޕެރޭރާ، ރާއްޖޭގެ ޓީސީ ސްޕޯޓްސް ކްލަބް ދޫކޮށް، ބަންގްލަދޭޝްގެ ފޯޓިސް ފުޓްބޯލް ކްލަބަށް ބަދަލުވެއްޖެ އެވެ.

ޓީސީން ވަނީ މިދިޔަ ތިން ވަރަކަށް އަހަރު ތެރޭ އެ ކްލަބަށް ސުޖަން، 33، ކޮށްދީފައިވާ ހިދުމަތަށް ޝުކުރު އަދާކޮށްފަ އެވެ. އަދި، ސުޖަން ވެސް ވަނީ އޭނާގެ ކެރިއަރުގެ މުހިންމު އަހަރުތަކެއްގައި ޓީސީން ދިން ފުރުސަތުގެ މުހިންމުކަން ފާހަގަކޮށްފަ އެވެ. ޓީސީގައި ސުޖަން އެންމެ ފަހުން ކުޅުނު މުބާރާތަކީ، މި އަހަރު ކުރިއަށްދިޔަ އެފްއޭއެމް ލީގު ކަޕް އެވެ.

ބަންގްލަދޭޝްގެ ފޯޓިސް އަކީ ސުޖަން އެ ގައުމުގައި ކުޅޭނެ ފުރަތަމަ ކްލަބެވެ.

ސުޖަން އެންމެ ފުރަތަމަ ރާއްޖެ އައީ 2015 ވަނަ އަހަރު ކްލަބް އީގަލްސް އަށެވެ. އެ ގޮތުން، އެ އަހަރު އެ ޓީމަށް ބަދަލުވެ، ސުޖަން ވަނީ ފުރަތަމަ ސީޒަނުގައި ވެސް ކުރިއެރުންތަކެއް ހޯދައިފަ އެވެ.

ޒުވާން އުމުރުގައި ކެރިއަރުގެ އެންމެ މުހިންމު އަހަރުތައް، އީގަލްސްގައި ހޭދަކުރިއިރު، ސުޖަން ރާއްޖޭގެ ލީގުގެ މޮޅު ކީޕަރުގެ މަގާމު 2016 ވަނަ އަހަރު ހޯދި އެވެ. އެ ފަހަރު ޕްރެޒިޑެންޓްސް ކަޕްގެ ޗެމްޕިއަންކަން، އީގަލްސް އިން ހޯދިއިރު، ސުޖަން މޮޅު ކުޅުމެއް ދެއްކި އެވެ.

އީގަލްސް ދޫކޮށް، 2020 ވަނަ އަހަރު ސުޖަން އެނބުރި ގައުމަށް، ސްރީ ލަންކާ ޓީމަކާ ގުޅެން ނިންމީ އާއިލާ އަށް ވަގުތު ދިނުމުގެ ގޮތުންނެވެ. އަދި އަމިއްލަ ގައުމުގެ ފުޓްބޯޅަ ކުރިއަރުވަން ކުރާ މަސައްކަތުގައި އޭނާގެ ހިއްސާ ވެސް އޮތުން މުހިންމު ކަމަށް ފެންނާތީ އެވެ. އެ ގޮތުން، ސްރީ ލަންކާގެ އަޕް ކަންޓްރީ ލަޔަންސް އަށް ކުޅުމަށް ފަހު، އެ ގައުމުގެ ޑޮމެސްޓިކް ފުޓްބޯޅަ ކުރިއަށްނުދާތީ، 2023 ވަނަ އަހަރު ޓީސީން ދިން ހުށަހެޅުން ގަބޫލުކޮށް، އެ ޓީމާ ގުޅެން ނިންމީ އެވެ.