އެސްއީޒެޑްގެ ދަށުން ސަރުކާރުން އިއުލާނު ކުރި ސޯލާ ސިޓީ މަޝްރޫއު ހިންގަން ކެނެޑާގެ ކުންފުންޏަކާ މިއަދު ހަވާލުކޮށްފި އެވެ.

ސިންގަޕޫރުގައި ސަރުކާރުން ކުރިއަށްގެންދާ ބިޒްނަސް ފޯރަމުގައި އެ މަޝްރޫއު ހަވާލު ކުރީ އެބްރަކްސަސް ޕަވާއާ އެވެ. އެ ޕްރޮޖެކްޓު ހިންގުމުގެ އެއްބަސްވުމުގައި ވެސް މިއަދު ވަނީ ސޮއިކޮށްފަ އެވެ.

އެ މަޝްރޫއުގައި ދިވެހިރާއްޖޭގެ ފަރާތުން ސޮއި ކުރެއްވީ ޓުއަރިޒަމް މިނިސްޓަރު ތޯރިގު އިބްރާހިމް އެވެ. އެބްރަކްސަސްގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ ސޯލްޓާ އީޑީ އެވެ.

އެ ޕްރޮޖެކްޓުގެ ދަށުން ސޯލާ ސިޓީ ބިނާ ކުރާނީ ކުނޑަބަނޑޮސް އިރުމަތީ އޮންނަ ފަޅުގަ އެވެ. މިއަދު އެގްރިމެންޓުގައި ސޮއި ކުރި ނަމަވެސް މިދިޔަ އޭޕްރީލް މަހު އެ ކުންފުންޏާ ޕްރޮޖެކްޓު ވަނީ ހަވާލުކޮށްފަ އެވެ.

އެބްރަކްސަސް ޕަވާއަކީ އިއާދަކުރަނިވި ހަކަތަ އުފެއްދުމުގެ ޕްރޮޖެކްޓުތަކަށް ހާއްސަ ކުންފުންޏެކެވެ. މިއަދު ސޮއި ކުރި އެގްރިމެންޓުގެ ދަށުން އެ ކުންފުނިން ގާއިމް ކުރާނީ 100 މެގަވޮޓްގެ ހަކަތަ އުފެއްދޭނެ ސޯލާ އެވެ.

އެ ޕްރޮޖެކްޓުގެ ދަށުން އުފައްދާ ހަކަތަ ސްޓެލްކޯގެ ނެޝަނަލް ގްރިޑާ ގުޅައިލެވޭނެ އެވެ. އެއިރުން ރާއްޖެއިން މިހާރު ތެލަށް ކުރާ ހަރަދު ވަރަށް ބޮޑުތަނުން ކުޑަވާނެ ކަމަށް ބެލެވެ އެވެ. ސަރުކާރުން ލަފާ ކުރާ ގޮތުގައި، ޕްރޮޖެކްޓު ނިމުމުން، ތެލަށް މިހާރު ކުރާ ހަރަދުގެ ތެރެއިން 45 މިލިއަން ޑޮލަރު އަހަރަކު ސަލާމަތް ކުރެވޭނެ އެވެ.

އެބްރަކްސަސް އިން ބުނާ ގޮތުގައި އެ ޕްރޮޖެކްޓުގެ މާސްޓާ ޕްލޭން މިހާރު ވަނީ ނިމިފަ އެވެ. އަދި ސްޓެލްކޯގެ ނެޝަނަލް ގްރިޑާ ގުޅާލުމަށް ބޭނުންވާ ރޭވުންތައް ވެސް މިހާރު ވަނީ ނިމިފަ އެވެ. މިވަގުތު ކުރިއަށްދަނީ އީއައިއޭ ހެދުމުގެ މަސައްކަތް ކަމަށް ވެސް އެ ކުންފުނިން ބުނެ އެވެ.