މޮބައިލް ގޭމްތައް ތައްޔާރުކުރުމުގައި ދުނިޔޭގެ ސަމާލުކަން ހޯދާފައިވާ ފިންލޭންޑުގެ ކުންފުންޏެއް ކަމުގައިވާ ސުޕަސެލްގެ މަޝްހޫރު މޮބައިލް ގޭމްތަކުގެ ތެރެއިން ކްލޭޝް އޮފް ކްލޭންސް އަދި ކްލޭޝް ރޯޔަލް ނެޓްފްލިކްސްގެ އެނިމޭޓެޑް ސީރީސްއަކަށް ހެދުމަށް ނިންމައިފި އެވެ.

މި ސީރީސްއަކީ މިހާރު ޕްރީ-ޕްރޮޑަކްޝަންގައިވާ ސީރީސްއެކެވެ. މިކަމުގެ އިއުލާން ޓްރެއިލާއެއް ސުޕަސެލްގެ ޔޫޓިއުބް ޗެނަލްގައި މޭ 20، 2025 ގައި ޝާއިޢުކޮށްފައިވެއެވެ.

ސުޕަސެލްއިން އެކްސް ޕްލެޓްފޯމްގައި ޝާއިޢުކުރި ޕޯސްޓެއްގައި ބުނެފައިވަނީ ނެޓްފްލިކްސްއާއެކު ގުޅިގެން ކްލޭޝްގެ ހަނގުރާމަވެރި ދުނިޔެ މިހާތަނަށް ދެކިފައިނުވާ ގޮތަކަށް ދައްކާލަން މަސައްކަތްކުރަމުން ދާކަމަށެވެ. އެގޮތުން މުޅިން އައު އެނިމޭޓެޑް ސީރީސްއެއް ގްރީންލައިޓް ކުރެވި، މިހާރު ޕްރީ-ޕްރޮޑަކްޝަންގައި ވާ ކަމަށް ބުނެފައިވެ އެވެ.

މި ސީރީސްގެ ޝޯރަނަރަކީ ފްލެޗާ މޯލްސް އެވެ. އޭނާއަކީ ކުރިން ސުޕަސެލްއަށް ކްލޭޝް އޮފް ކްލޭންސްގެ އެނިމޭޓެޑް ވީޑިއޯތައް ތައްޔާރުކޮށްފައިވާ ފަރާތެކެވެ. ހެޑް ރައިޓަރަކީ ރޮން ވެއިނާ އެވެ. އޭނާއަކީ ފިއުޗަރާމާ ފަދަ މަޝްހޫރު ޝޯތަކުގައި މަސައްކަތްކޮށްފައިވާ ފަރާތެކެވެ. އެނިމޭޝަން ލީޑްކުރާނީ ވެންކޫވާ ރަށުގެ އައިކޮން ކްރިއޭޓިވް ސްޓޫޑިއޯއިންނެވެ.

ނެޓްފްލިކްސްގެ އެނިމޭޝަން ސީރީސް ވައިސް ޕްރެޒިޑެންޓް ޖޮން ޑަރޑެރިއަން ވިދާޅުވެފައިވަނީ ކްލޭޝްއަކީ ދިހަ އަހަރަށްވުރެ ގިނަ ދުވަހު ދުނިޔޭގެ ގޭމިން ދާއިރާގައި ފެނޯމިނަންއެއްގެ ގޮތުގައި ދެމިހުރި، ހިނިތުންވުމާއި، އެކްޝަނާއި، ހަނދާންނައްތާނުލެވޭ ކެރެކްޓަރުތަކުން ފުރިގެންވާ ގޭމެކެވެ. މިއީ އެނިމޭޓެޑް ސީރީސްއަކަށް ހެދުމަށް އެންމެ އެކަށީގެންވާ ގޭމެއް ކަމުގައި އޭނާ ފާހަގަކުރެއްވި އެވެ.

ކްލޭޝް އޮފް ކްލޭންސްއަކީ އަމިއްލަ އީސްޕޯޓްސް މަޝްރަހެއް އުފައްދާފައިވާ ގޭމެކެވެ. މި އަހަރުގެ ފަހުކޮޅު ބޭއްވުމަށް ހަމަޖެހިފައިވާ ކްލޭޝް އޮފް ކްލޭންސް ވޯލްޑް ޗެމްޕިއަންޝިޕްގެ އިނާމުގެ ގޮތުގައި 700,000 ޑޮލަރު (546,000 ޕައުންޑް) ހިމެނެ އެވެ. އެންމެ ފަހުން ބޭއްވުނު އޭޕްރިލް މަހުގެ ކޮލިފައިން ޓޯނަމަންޓްގައި 39,000 ޑޮލަރު (29,000 ޕައުންޑް) ގެ އިނާމު ހިމެނުނެވެ. މި މުބާރާތުގައި ޑީޒީ އީސްޕޯޓްސް ޓީމް ވަނީ ނަޓުސް ވިންސެރެ (ނަވީ) އާ ދެކޮޅަށް ކުޑަ ތަފާތަކުން ކާމިޔާބު ހޯދައި، ވޯލްޑް ޗެމްޕިއަންޝިޕަށް ޓިކެޓް ހޯދާފަ އެވެ.

މި ކާމިޔާބީއާއެކު ޑީޒީ ޓީމަށް ވަނީ ވޯލްޑް ޗެމްޕިއަންޝިޕްގައި ބައިވެރިވުމުގެ ފުރުސަތު ލިބިފަ އެވެ. އީސްޕޯޓްސް ދާއިރާގައި ކްލޭޝް އޮފް ކްލޭންސްގެ މުބާރާތްތަކަކީ ދުނިޔޭގެ އެކި ކަންކޮޅުތަކުން ޕްރޮފެޝަނަލް ޓީމްތައް ބައިވެރިވާ މުހިންމު މުބާރާތްތަކެކެވެ.

ނެޓްފްލިކްސްއަކީ ކުރިންވެސް ގޭމިން ޓައިޓަލްތައް ޓީވީ ފޯމެޓަށް ބަދަލުކޮށްފައިވާ ޕްލެޓްފޯމެކެވެ. މީގެ ތެރޭގައި ރައިއޮޓް ގޭމްސްގެ ލީގް އޮފް ލެޖެންޑްސް ފްރެންޗައިޒްއަށް ބިނާކޮށް ހަދާފައިވާ އާކޭން ސީރީސް އަދި ޑޯޓާ 2 އަށް ބިނާކޮށް ހަދާފައިވާ ޑްރެގަންސް ބްލަޑް ހިމެނެ އެވެ. ކްލޭޝް އޮފް ކްލޭންސްގެ އެނިމޭޓެޑް ޝޯޓްތަކުގެ މަޤްބޫލުކަމާއެކު، ފޭންސްއިން ވަނީ އެތައް އަހަރެއް ވަންދެން ފުރިހަމަ އެނިމޭޓެޑް ޝޯއެއް ހެދުމަށް އެދެމުން ގޮސްފަ އެވެ. މި ސީރީސް ނިކުންނަ ހިނދު، އީސްޕޯޓްސް ދާއިރާގައި ކްލޭޝް އޮފް ކްލޭންސްގެ މަޤާމު އިތުރަށް ވަރުގަދަވެގެންދާނެކަމަށް ބެލެވެ އެވެ.

ސުޕަސެލްއަކީ ބްރޯލް ސްޓާސް ފަދަ އީސްޕޯޓްސް ޓައިޓަލްތައް އުފައްދާފައިވާ ކުންފުންޏެކެވެ. ކްލޭޝް އޮފް ކްލޭންސް އަދި ކްލޭޝް ރޯޔަލްއަކީ އެ ކުންފުނީގެ އެންމެ މަޝްހޫރު މޮބައިލް ގޭމްތަކުގެ ތެރެއިން ދެ ގޭމެވެ. މި ދެ ގޭމްގެ މަޤްބޫލުކަމާއި އީސްޕޯޓްސް ދާއިރާގައި ހޯދާފައިވާ ކާމިޔާބީތަކާއެކު، ނެޓްފްލިކްސްގެ އެނިމޭޓެޑް ސީރީސްއަކީ ގޭމިން އަދި އީސްޕޯޓްސް ދާއިރާގެ ފޭންސްއިން ބޮޑަށް އިންތިޒާރުކުރާ ޝޯއެކެވެ.