ގުޅީފަޅުގެ ލޭންޑް ޔޫސް ޕްލޭން ދެ ވަނަ ފަހަރަށް ބަދަލުކޮށް ދޫކުރާ ގޯތިތައް އެއް ސަރަހައްދަކަށް ޖަމާ ކުރީ ގުޅީފަޅު ސިޓިޒެންސް އެސޯސިއޭޝަނާ މަޝްވަރާކޮށްފައި ކަމަށް ކޮންސްޓްރަކްޝަން މިނިސްޓަރު އަބްދުﷲ މުއްތަލިބު ވިދާޅުވި ނަމަވެސް އެއީ ދޮގެއް ކަމަށް އެ ޖަމިއްޔާއިން ބުނެފި އެވެ.

ސަރުކާރުން ބުނީ މިފަހަރު ބަދަލު ގެނައުމުގެ ބޭނުމަކީ ގުޅީފަޅުގެ ނުހިއްކާ ތަނުން ގޯތި ދީފައި ހުރުމުން ގޯތީގެ ރަޖިސްޓްރީ ދޫކުރަން ދަތިވާތީ، މިހާރު ވެސް ހިއްކާފައި ހުރި ސަރަހައްދަށް ގޯތިތައް ޖަމާ ކުރަން ކަމަށެވެ. ކޮންސްޓްރަކްޝަން މިނިސްޓަރު މުއްތަލިބު ވިދާޅުވީ އެ ބަދަލު ގެނައީ ގުޅީފަޅު ރައްޔިތުންގެ ޖަމިއްޔާއާ މަޝްވަރާ ކުރުމަށްފަހު ކަމަށެވެ.

"މި ބަދަލު ގުޅީފަޅުގެ ގޯތި ލިބުނު ފަރާތްތައް ތަމްސީލުކުރައްވާ ޖަމިއްޔާއާ ހިއްސާކުރެވި ބިންތައް ދޭނެ ގޮތަކާމެދު ވަނީ މަޝްވަރާކުރެވިފަ،" އެކްސްގައި ކުރެއްވި ޕޯސްޓެއްގައި މުއްތަލިބު އިއްޔެ ވިދާޅުވި އެވެ.

އެކަމަކު، ގުޅީފަޅު ރައްޔިތުންގެ ޖަމިއްޔާއިން ބުނީ އެ ޖަމިއްޔާއާ މުއްތަލިބު ބައްދަލު ކުރީ ސަރުކާރުގެ ނިންމުން ދައްކާލުމަށް އެކަނި ކަމަށެވެ. މިނިސްޓަރާ ބައްދަލުވިއިރު ސަރުކާރުން އޮތީ ހުރިހާ ކަމެއް ނިންމާފައި ކަމަށް ވެސް ޖަމިއްޔާއިން ބުންޏެވެ.

"މުއްތަލިބު އަޅުގަޑުމެންނާ މަޝްވަރާއެއް ނޫން ކުރީ. ލޭންޑް ޔޫސް ޕްލޭން ގެޒެޓް ކޮށްފަ މިކަން މިހެންނޭ މިއޮތީ ނިމިފަ، މިކަހަލަ ބީދާ އަކުން ކުރިޔަށް ދިޔަ ކަމެއް މިއީ. މިނިސްޓަރު އަޅުގަޑުމެން ބޮލުގަ އިލްޒާމް ނާޅުވައި އަޅުގަޑުމެން ގުޅުއްވީމާ ފޯނު ނަންގަވާ، ވަގުތު ފާއިތެއްނުވޭ،" އެ ޖަމިއްޔާއިން އެކްސްގައި ކުރި ޕޯސްޓެއްގައި ބުންޏެވެ.

ގުޅީފަޅުން ދޫކުރަން ނިންމާފައި ވަނީ 3670 ގޯއްޗެވެ. އެއީ ގިރާވަރުފަޅުން ގުޅީފަޅަށް ބަދަލު ކުރި 1337 ގޯތި ވެސް ހިމަނައިގެންނެވެ. އެންމެ ފަހުން ގުޅީފަޅުގެ ލޭންޑް ޔޫސް ޕްލޭނަށް ބަދަލު ގެނައިރު 90 ގޯތި އޮތީ އިތުރުކޮށްފަ އެވެ. އެއީ ކޮން ބޭނުމެއްގައި އިތުރު ކުރި ގޯތިތަކެއް ކަމެއް ނޭނގެ އެވެ.

ގުޅީފަޅު ލޭންޑް ޔޫސް ޕްލޭން މިދިޔަ ސަރުކާރުން ޝާއިއު ކުރީ އޯގަސްޓު 24، 2023، ގަ އެވެ. އެ ޕްލޭނަށް މި ސަރުކާރުން އެންމެ ފުރަތަމަ ބަދަލުތަކެއް ގެނައީ އޮކްޓޯބަރު 27، 2024، ގަ އެވެ. އެ ބަދަލު ގެނައީ އެ ރަށުގައި މުހިންމު އިންފްރާސްޗަކްތާތައް ގާއިމްކޮށްފައި ނެތުމުން ކަމަށް ސަރުކާރުން ބުންޏެވެ.

ލޭންޑް ޔޫސް ޕްލޭނަށް ބަދަލު ގެނައުމުން ގޯތިތައް ހުރި ތަން ވަނީ ބަދަލުވެފަ އެވެ. އެކަމަކު، ގުޅީފަޅުން ގޯތި ލިބުނު މީހުންނަށް އާ ރަޖިސްޓްރީއެއް ސަރުކާރުން ނުދެ އެވެ. އޭގެ ފަހުން އަނެއްކާ ލޭންޑް ޔޫސް ޕްލޭނަށް ބަދަލު ގެނައީ މިދިޔަ ހުކުރު ދުވަހެވެ. އޭގެ ބޭނުމަކީ މިހާރު ވެސް ހިއްކާފައި އޮތް ތަނުން ގޯތި ދިނުމަށްފަހު އަވަހަށް ރަޖިސްޓްރީ ދޫކުރުން ކަމަށް މުއްތަލިބު ވިދާޅުވި އެވެ.

"ގޯތި ރެޖިސްޓްރީ ހެދުމަށް ދަތިވެގެން ގޮސްފައިވަނީ ކުރިން ރަޖިސްޓްރީ ދެވިފައިވާ ފަރާތްތަކަށް އަދި ނުހިއްކާ ސަރަޙައްދުން ގޯތި ލިބޭގޮތަށް ގުރުއަތު ނެގިފައިވާތީ،" މިނިސްޓަރު ވިދާޅުވި އެވެ.

މުއްތަލިބު އެހެން ވިދާޅުވި ނަމަވެސް ނުހިއްކާ ސަރަހައްދުން ގޯތީގެ ރަޖިސްޓްރީ ދޫކުރުމަށް އެއްވެސް ހުރަހެއް ނެތެވެ. ބިންވެރިޔާ ސްކީމް ހިންގުމަށްޓަކައި، ބަންޑާރަ ގޯތި ރަޖިސްޓްރީކޮށްދިނުމުގެ ގަވާއިދަށް ބަދަލު ގެނެސް، ނުހިއްކާ ސަރަހައްދަކުން ވެސް ގޯތި ދެވޭނެ މަގު ވަނީ ފަހިކޮށްފަ އެވެ.