‏ގޭމިން ހިދުމަތްތަކުގެ ސަބަބުން ޗައިނާގެ ޓެކްނޮލޮޖީ ބިޔަ ކުންފުނި‏ ޓެންސެންޓްގެ ފައިދާ 13 އިންސައްތަ އިތުރުވެއްޖެ‏ އެވެ.‏

‏ޓެންސެންޓުން ބުދަ ދުވަހު ހާމަކުރި ގޮތުގައި، މި ކުރިއެރުން ލިބިފައިވަނީ ކުންފުނީގެ ‏‏މައިގަނޑު ވިޔަފާރިއެއް ކަމުގައިވާ ގޭމިންގ ޔުނިޓުގެ ފާހަގަކޮށްލެވޭ ކުރިއެރުމުގެ ‏‏ސަބަބުންނެވެ‏‎.‎

‏ޓެންސެންޓުން ނެރުނު ބަޔާނެއްގައި ބުނެފައިވާ ގޮތުގައި، 2025 ވަނަ ‏‏އަހަރުގެ ފުރަތަމަ ކުއާޓަރގައި ކުންފުންޏަށް 180.02 ބިލިއަން ޔުއާން (25 ‏‏ބިލިއަން ޑޮލަރު) ގެ އާމްދަނީއެއް ލިބިފައިވެ‏ އެވެ.‏ މީގެ އިތުރުން، މި މުއްދަތުގައި ‏‏ކުންފުނީގެ ސާފު ފައިދާވެސް އަހަރުން އަހަރަށް 14 އިންސައްތަ އިތުރުވެ، 47.8 ‏‏ބިލިއަން ޔުއާން (6.63 ބިލިއަން ޑޮލަރު) އަށް އަރާފައިވެ‏ އެވެ.‏

‏ދުނިޔޭގެ އެންމެ ބޮޑެތި ގޭމިންގ ކުންފުނިތަކުގެ ތެރޭގައި ހިމެނޭ ޓެންސެންޓްގެ ‏‏މައިގަނޑު އާމްދަނީ ލިބެނީ މަގުބޫލު ގޭމްތަކުންނެވެ. "ހޮނަރ އޮފް ކިންގްސް" ‏‏އަދި "ޕީސްކީޕަރ އެލައިޓް" ފަދަ މަޝްހޫރު ގޭމްތަކާއި، "ޑީއެންއެފް މޮބައިލް" ‏‏ފަދަ އައު ގޭމްތަކުގެ ސަބަބުން، ޗައިނާގެ އެތެރޭގެ ގޭމިންގ އާމްދަނީ އަހަރުން ‏‏އަހަރަށް 24% އިތުރުވެ، 42.9 ބިލިއަން ޔުއާން (5.95 ބިލިއަން ޑޮލަރު) ‏‏އަށް އަރާފައިވެ‏ އެވެ.‏

‏ބައިނަލްއަގުވާމީ ގޭމިންގ ޑިވިޝަނުން ލިބުނު އާމްދަނީވެސް 23% އިތުރުވެ، ‏‏16.6 ބިލިއަން ޔުއާން (2.3 ބިލިއަން ޑޮލަރު) އަށް އަރާފައިވެ‏ އެވެ.‏ މި ‏‏ކުރިއެރުން ލިބިފައިވަނީ "ބްރޯލް ސްޓާރސް" އަދި "ޕަބްޖީ މޮބައިލް" ފަދަ ‏‏ގޭމްތަކުގެ ސަބަބުންނެވެ‏‎.‎

‏ޓެންސެންޓަކީ ޗައިނާގެ އެންމެ ބޮޑު މެސެޖިންގ އެޕް ކަމުގައިވާ ވީޗެޓްގެ ‏‏ވެރިފަރާތްވެސް މެ‏ އެވެ.‏ ވީޗެޓްގައި އިން-އެޕް މިނި ގޭމްތައް ހިމެނޭ އިރު، އެއީ ‏‏މަހަކު 1.4 ބިލިއަނަށްވުރެ ގިނަ އެކްޓިވް ޔޫޒަރުން ބޭނުންކުރާ އެޕެކެވެ‏‎.‎

‏ކުންފުނީގެ ބަޔާނުގައި ބުނެފައިވަނީ، "2025 ވަނަ އަހަރުގެ ފުރަތަމަ ‏‏ކުއާޓަރގައި، އެކުންފުނީގެ ފެންވަރު ރަނގަޅު އާމްދަނީ ލިބޭ ދާއިރާތަކުން ‏‏ހަރުދަނާ ކުރިއެރުމެއް ދަމަހައްޓާފައިވާކަމަށެވެ. އާޓިފިޝަލް އިންޓެލިޖެންސް ‏‏(އޭއައި) ގެ ގާބިލުކަން މިހާރުވެސް އެކުންފުނީގެ ވިޔަފާރިތަކަށް، ހާއްސަކޮށް ‏‏ޕަރފޯމަންސް އިޝްތިހާރުކުރުމާއި އެވަރގްރީން ގޭމްތަކަށް، ފާހަގަކުރެވޭ ‏‏މިންވަރަކަށް ހިއްސާކޮށްފައިވެ‏ އެވެ.‏