‏އޮންލައިން ގޭމް، ގްރޭންޑް ތެފްޓް އޯޓޯ 6 (ޖީޓީއޭ 6 ) ނެރުން އަންނަ ‏‏އަހަރަށް ލަސްކޮށްފިއެވެ. ‏

‏ރޮކްސްޓާ ގޭމްސްއިން ހުކުރު ދުވަހު އިއުލާނުކުރި ގޮތުގައި، ގިނަ ‏‏ބަޔަކު އިންތިޒާރުކުރަމުންދާ ޖީޓީއޭ 6 ގެ ނެރުން ލަސްކޮށް، ‏‏2026 ގެ މެއި މަހުގެ 26 ވަނަ ދުވަހު ނެރުމަށް ވަނީ ‏‏ނިންމާފައެވެ. 2023 ގެ ޑިސެމްބަރު މަހު އިޢުލާނުކުރެވުނު މި ‏‏ގޭމް ކުރިން ނެރުމަށް ހަމަޖެހިފައިވަނީ 2025 ގެ ފަހު ކޮޅުގައެވެ. ‏‏މި ތާރީހަކީ ރޮކްސްޓާގެ މައި ކުންފުނި ކަމުގައިވާ ޓޭކް-ޓޫ ‏‏އިންޓަރެކްޓިވްއިން އެކި ފަހަރު މަތިން ކަށަވަރުކޮށްދީފައިވާ ‏‏ތާރީހެކެވެ‏‎.‎

‏ގޭމް ނެރުމުގެ ތާރީހު ލަސްކުރި ނަމަވެސް، ރޮކްސްޓާއިން އަދި ‏‏އިތުރު ޓްރެއިލަރެއް ނުވަތަ ސްކްރީންޝޮޓްތަކެއް ‏‏ހިއްސާކޮށްފައެއް ނުވެއެވެ. ނަމަވެސް، ގޭމާ ބެހޭ އިތުރު މަޢުލޫމާތު ‏‏ވަރަށް އަވަހަށް ހިއްސާކުރާނެ ކަމަށް ވަނީ ވަޢުދުވެފައެވެ‏‎.‎

‏ރޮކްސްޓާއިން ބުނި ގޮތުގައި، ގޭމް ނެރުން ލަސްކުރަން ޖެހުނީ ‏‏އެ ކުންފުނިން ނެރޭ ގޭމްތަކުގެ ފެންވަރާ އެއްގޮތަށް ގްރޭންޑް ‏‏ތެފްޓް އޯޓޯ 6 ނެރުމަށްޓަކައި އިތުރު ވަގުތު ބޭނުންވާތީއެވެ. މި ‏‏އިތުރު ވަގުތު ބޭނުންކުރާނީ ޕްލޭސްޓޭޝަން 5 އާއި ‏‏އެކްސްބޮކްސް ސީރީޒް އެސް/އެކްސްއަށް ގޭމް ނެރުމުގެ ކުރިން ‏‏އިތުރަށް ފުރިހަމަކުރުމަށެވެ‏‎.‎

‎"‎‏އަޅުގަނޑުމެން ނެރޭ ކޮންމެ ގޭމަކުންވެސް އަބަދުވެސް ‏‏މަސައްކަތްކުރަނީ ތިޔަ ބޭފުޅުންގެ އުންމީދުތަކަށްވުރެ ‏‏މަތިވެގެންދާނެ އެއްޗެއް ނެރެވޭތޯ، ގްރޭންޑް ތެފްޓް އޯޓޯ 6 ވެސް ‏‏މިއިން އިސްތިސްނާއެއް ނުވާނެ، ތިޔަ ބޭފުޅުން އުންމީދުކުރައްވާ ‏‏ފެންވަރަށް ގޭމް ނެރުމަށްޓަކައި އިތުރު ވަގުތު ބޭނުންވާކަން ތިޔަ ‏‏ބޭފުޅުން ގަބޫލުކުރައްވާނެ ކަމަށް އުންމީދުކުރަން، އިތުރު ‏‏މަޢުލޫމާތު ވަރަށް އަވަހަށް ހިއްސާކުރުމަށް އަޅުގަނޑުމެން މިދަނީ ‏‏މަސައްކަތް ކުރަމުން،" ރޮކްސްޓާއިން އިތުރަށް ބުންޏެވެ‏‎.

‏ގްރޭންޑް ތެފްޓް އޯޓޯ ސީރީޒްއަކީ ދުނިޔޭގެ އެންމެ މަގުބޫލު ‏‏ގޭމިންގ ފްރެންޗައިޒްތަކުގެ ތެރެއިން ގޭމެކެވެ. އެހެންކަމުން، މި ‏‏ގޭމްގެ އައު ވަރޝަނެއް ނެރުން ލަސްވުމަކީ ގިނަ ގޭމަރުންނަށް ‏‏ލިބޭ ބޮޑު ހިތްދަތިކަމެކެވެ‏‎.

‏ނަމަވެސް، ގޭމް ނެރުން ލަސްކުރުމުގެ ސަބަބުން ގޭމްގެ ފެންވަރު ‏‏ރަނގަޅުވެ، ބަގްތައް މަދުވެގެންދާނެ ކަމަށް ގިނަ ބަޔަކު ‏‏އުންމީދުކުރެއެވެ. މީގެ އިތުރުން، ގޭމް ނެރުމުގެ ކުރިން އިތުރު ‏‏ޓްރެއިލަރތަކާއި ގޭމްޕްލޭ ވީޑިއޯތައް ދައްކާނެ ކަމަށްވެސް ގިނަ ‏‏ބަޔަކު ލަފާކުރެއެވެ‏‎.

‏ގްރޭންޑް ތެފްޓް އޯޓޯ 6 އަކީ މި ސީރީޒްގެ އެންމެ ފަހުގެ ‏‏އިންސްޓޯލްމަންޓެވެ. މީގެ ކުރިން ނެރުނު ގްރޭންޑް ތެފްޓް އޯޓޯ ‏‏5 ވަނީ ވިއްކުމުގެ ރެކޯޑުތައް ގާއިމުކޮށް، ގޭމިންގ ‏‏އިންޑަސްޓްރީގައި އެންމެ ގިނައިން ވިއްކުނު ގޭމްތަކުގެ ތެރޭގައި ‏‏ހިމެނިފައެވެ. އެހެންކަމުން، އައު ވަރޝަނާ މެދު ގޭމަރުންގެ ‏‏އުންމީދުތައް ވަރަށް ބޮޑެވެ‏‎.