ބައިނަލްއަގްވާމީ ޔޯގާ ދުވަސް ފާހަގަ ކުރަން ގަލޮޅު ދަނޑުގައި ޖޫން 21، 2022، ގައި ބޭއްވި ހަފްލާއަށް ވަދެގަނެ ހަމަނުޖެހުމާއި މާރާމާރީ ހިންގި މައްސަލައިގައި ދައުލަތުން ދައުވާ އުފުލާފައިވާ ޝެއިހް ފަޒްލޫން މުހައްމަދާއި ޝެއިހް އާދަމް ނިޝާންގެ މައްސަލަ އެ ދެ ބޭފުޅުން އެދިގެން ރިވިއު ކުރަން ފަށައިފި އެވެ.

ޕީޖީގެ ޕަބްލިކް ޕްރޮސެކިއުޓާ އަދި ތަރުޖަމާން އަހުމަދު ޝަފީއު ވިދާޅުވީ ފަޒްލޫން އާއި ނިޝާންގެ މައްސަލަ ރިވިއުކޮށްދޭން މިދިޔަ އަހަރުގެ އޮކްޓޯބަރު މަހުގެ ތެރޭގައި ހުށަހަޅާފައިވާ ކަމަށެވެ.

އެގޮތުން އެ މައްސަލަ ރިވިއުކޮށް ނިމެންދެން ކްރިމިނަލް ކޯޓުގައި ކުރިއަށްދާ ޝަރީއަތްތައް މަޑުޖައްސާލަން ފަޒްލޫން އަދި ނިޝާން އެދިފައިވާތީ އެގޮތަށް ޕީޖީ އޮފީހުން އެއްބަސްވެފައިވާ ކަމަށް ޝަފީއު ވިދާޅުވި އެވެ.

"އެމީހުންގެ ދައުވާތައް ރިވިއު ކުރަން ލާފައި އޮތީ އޮކްޓޯބަރުގައި. ގޮތެއް ނުނިމި އޮތީމަ އިއްޔެ ކޯޓުގައި އެމީހުން އެދުނީ ރިވިއު ނިމެންދެން އަޑުއެހުންތައް މަޑު ޖައްސާލަން. އެގޮތަށް އޮފީހުން އެއްބަސްވީ. މައްސަލަ ކުރިއަށް ގެންދިޔުމާ މެދު ޕީޖީ ގޮތެއް ނިންމަވާނެ،" ޝަފީއު ވިދާޅުވި އެވެ.

ދައުވާއެއް ރިވިއު ކުރަން ހުށަހެޅުމުން، އެ ޕްރޮސެެސް އޮންނަ ގޮތުން މައްސަލަ ހަވާލުކޮށްފައި އޮތް ވަކީލު ނޫން އެހެން ވަކީލަކާ އެ މައްސަލަ ހަވާލުކުރާނެ އެވެ. އެއަށްފަހު ރިވިއުއަށް ހުށަހަޅާފައިވާ ކަންކަމަށް ރިއާޔަތް ކުރުމަށްފަހު މައްސަލަ ކުރިއަށް ގެންދިޔުމާ މެދު ޕީޖީ ގޮތެއް ނިންމާނެ އެވެ.

ޔޯގާ ހަރަކާތް ހުއްޓުވުމުގައި އިސްކޮށް ހަރަކާތްތެރިވި ކަމުގެ ތުހުމަތުކުރާ ފަޒްލޫން އާއި ނިޝާން، ހަމަނުޖެހުން ހިންގުމަށާއި ދީނީ ހަރުކަށި ފިކުރަށް ހިތްވަރުދީ ވާހަކަ ދައްކާ މަންޒަރު ފެންނަ ވީޑިއޯ އެބަހުރި ކަމަށް ޕީޖީން މީގެ ކުރިން ބުނެފައިވެ އެވެ.

ސަރުކާރުގެ ބައެއް އިސް ބޭފުޅުންނާއި ބޭރު ގައުމުތަކުގެ ޑިޕްލޮމެޓުން ބައިވެރިވެވަޑައިގެންނެވި ޔޯގާ ހަރަކާތް ހުއްޓުވަން، ގަދަކަމުން ގަލޮޅު ދަނޑަށް ވަދެ ބައެއް މީހުންނަށް ހަމަލާދީ، ހަމަނުޖެހުން ހިންގި މައްސަލައިގައި އެ ދެ އިލްމުވެރިންގެ މައްޗަށް އުފުލާފައި ވަނީ ޓެރަރިޒަމްގެ އަމަލެއް ކުރަން ހިތްވަރު ދިނުމުގެ ދައުވާ އެވެ.

ގަލޮޅު ދަނޑުގެ ގޭޓްތަކުން މީހުންތައް ވަދެގަނެ, ދިދަތަކުން ބައެއް މީހުންނަށް ހަމަލާދޭން މަސައްކަތްކޮށްފައިވެ އެވެ. އެ މީހުންގެ ހަމަލާ އަމާޒުވި މީހުންގެ ތެރޭގައި އިންޑިއާ ހައިކޮމިޝަނުގެ މުވައްޒަފަކު ވެސް ހިމެނެ އެވެ. ނަމަވެސް، އެއްވެސް ޑިޕްލޮމެޓަކަށް އަނިޔާ ވެފައެއް ނުވެ އެވެ.

އެ މީހުން ދަނޑަށް ވަދެގަތީ ދަނޑުގެ ބޭރުގައި ޖަހާފައި ހުރި ފެންސް ވެސް ހަލާކުކޮށްލުމަށް ފަހު ވެ. އެ ތަނުގައި ޖަހާފައި ހުރި ބައެއް ބޯޑުތަކަށް ވެސް ގެއްލުން ދިނެވެ. ފުލުހުންނަށް އެ މީހުން ބޭރުކޮށްލެވުނީ 40 ވަރަކަށް މިނެޓު ފަހުންނެވެ. އެއްވި މީހުން ފޮނުވާލަން ފުލުހުން ކަރުނަ ގޭސް ވެސް ޖެހި އެވެ.

އެ މައްސަލައިގައި ފަޒްލޫން އާއި ނިޝާންގެ އިތުރުން ގިނަ ބަޔަކު ހައްޔަރު ކުރުމަށްފަހު ފަހުން ދޫކޮށްލި އެވެ. އެގޮތުން ގިނަ ބަޔަކަށް ވަނީ އެ މައްސަލައިގައި ދައުވާ ވެސް އުފުލައިފަ އެވެ.