އިސްކަންދަރު ސްކޫލުގެ ގްރެޖުއޭޝަނަށް ދިޔަ ދަރިވަރުންތަކެއްގެ ބެލެނިވެރިންނަށް ނާންގައި ސްކޫލްގެ މެނޭޖުމެންޓުން މަޖުބޫރުކުރުވައިގެން އެ ކުދިންގެ ބޮލާއި ތުނބުޅި މަތިމަސް ގަދަކަމުން ކޮށުވި މައްސަލައެއް ފެންމަތިވެއްޖެ އެވެ.
ސްކޫލުގެ މެނޭޖުމެންޓުން ގަދަކަމުން ބޮލާއި ތުނބުޅި މަތިމަސް ކޮށުވި ދަރިވަރެެއްގެ މަންމަ އަދަދު އާ ވާހަކަދައްކަމުން ބުނީ އޭނާގެ ދަރިފުޅުގެ ބޯ ކޮށުވީ ގްރެޖުއޭޝަން ޖަލްސާ ފެށެން ބައި ގަޑިއެއްހާއިރަށް ވެފައި ހުއްޓައި ސްކޫލުގެ ފާހާނާ ތެރެއަށް ވައްދައި މަޖުބޫރު ކުރުވައިގެން ދަރިފުޅު ލައްވައި ކަމަށެވެ.
"ފުރަތަމަ ގެންދިޔައީ ޝޭޑީކެބިން ކައިރީގައި ހުރި ވީ ސެލޫންއަށް، ގެންގޮސް އެތަނުން ތުނބުޅި މަތިމަސް ކޮށުވަން އުޅުނީ ސްކޫލުގެ ލީޑިން ޓީޗަރެެއް، އެ މީހުންނަށް އެތަނުން ކޮށުނީ ހަމައެކަނި ދަރިފުޅުގެ މަތިމަސް، ދެން ދަރިފުޅު ބުނީ ބޮލެއް ނުކޮށާނަމޭ އެތަނަކުން، ކިޔާފައި ދެކޮޅު ހަދާފައި ސްކޫލަށް ދިޔައީ،" މި ނޫހާ ވާހަކަދެއްކި ބެލެނިވެރިޔާ ބުންޏެވެ.
އޭނާ ބުނީ ބޯކޮށަން ދެކޮޅު ހެދުމަށްފަހު އޭނާގެ ދަރިފުޅު ސްކޫލަށް ގޮސް ގެއަށް ފޮނުވައިދޭން ލީޑިން ޓީޗަރުންގެ ގާތުގައި އެދުނު ކަމަށެވެ.
ނަމަވެސް އެވަގުތު އެތަނުގައި ހާޒިރުވެ ތިބި ލީޑިން ޓީޗަރުން އެކަމަށް ދެކޮޅު ހަދައި ގެއަށް ވެސް ނުދެވޭނެ ކަމަށް ދަރިވަރު ގާތުގައި ބުނި ކަމަށެވެ. އަދި ގްރެޖުއޭޝަންގައި ވެސް ބައިވެރިވާން ޖެހޭނެކަމަށް ބުނެ އެ ކުއްޖާއަށް ބޯ ކޮށަން މަޖުބޫރު ކުރިވި ކަމަށް ބެލެނިވެރިޔާ ބުންޏެވެ.
"ދެން ދަރިފުޅު ކައިރީގައި ބުނީ އަމިއްލައަށް އެހެންވިއްޔާ ބޯ ކޮށާށޭ ކަތުރެއް ދީފައި، ދެން ވެސް ދަރިފުޅު ދެކޮޅު ހެދީމަ އެތަނުގައި ހުރި ޓީޗަރެއް ބުނީ ދަރިފުޅު ގާތުގައި ބޯ ކޮށާށޭ، ލީޑިން ޓީޗަރުން އެތިބީ ދޫކުރާ ގޮތަކަށް ނޫނޭ، ބުނީމަ ފާހާނާއަށް ވަދެ އަމިއްލައަށް ދަރިފުޅު ބޯކޮށީ،" ބެލެނިވެރިޔާ ބުންޏެވެ.
އެ ކުއްޖާއަކީ ދުވަހަކު ވެސް އަމިއްލަ ނަފުސަށް ގެއްލުމެއް ދިން ކުއްޖެއް ނޫންކަން ފާހަގަކޮށް ބެލެނިވެރިޔާ ބުނީ ބެލެނިވެރިޔާއަށް ނާންގައި މަޖުބޫރު ކުރުވައިގެން އަމިއްލަ އަތުން ދަރިފުޅުގެ ބޯ ކޮށަން މަޖުބޫރު ކުރުމަކީ ދިން އަނިޔާއެއް ކަމަށެވެ. އަދި ޖީސީއީ އޯލެވަލް ފެށެން ކުޑަ ދުވަސްކޮޅަކަށްވެފައި އޮއްވައި އެފަދަ އަނިޔާއެއް ދިނުމުން ކުއްޖާއަށް ވަރަށް ބޮޑަށް އަސަރު ކޮށްފައިވާ ކަމަށް ބެލެނިވެރިޔާ ބުންޏެވެ.
"އަޅުގަނޑު ޕްރިންސިޕަލް ގާތުގައި ބުނިން ކިހާ ބޮޑު އަނިޔާއެއްހެއްޔޭ ތިޔަ ދިނީ، މުޅި ހަޔާތުގައި ތައްޔާރު އެވީ ޖީސީއީ އޯލެވެލްއަށޭ، އެކަމަކު ޓެސްޓު ފެށެން މިހާ ކައިރިވެފައި އޮއްވައި ދަރިފުޅުގެ މުޅި ކިޔެވުން ހަލާކު ކޮށްލީނުންހެއްޔޭ ބޯ ކޮށުވަންށޭ ކިޔާފައި،" ބެލެނިވެރިޔާ ބުންޏެވެ.
އޭނާ ބުނީ އެ މައްސަލަ އިއްޔެ އެޑިއުކޭޝަން މިނިސްޓްރީއަށް ވެސް ސިޓީއަކުން ހުށަހެޅި ކަމަށެވެ. ނަމަވެސް އެޑިއުކޭޝަނުން އެ ސިޓީއަށް އަދިވެސް ޖަވާބެއް ދީފައި ނުވާ ކަމަށް ބެލެނިވެރިޔާ ބުންޏެވެ.
އެނގިފައިވާ ގޮތުގައި އެ ކުއްޖާގެ އިތުރުން ވެސް އެ ރޭގެ ގްރެޖުއޭޝަނަށް ދިޔަ ބައެއް އެހެން ކުދިންގެ ބޯ ސްކޫލުން ގަދަމުން ކޮށުވި އެވެ. އޭގެ ތެރެއިން ބައެއް ކުދިންގެ ބޯ ކޮށުވީ އެ ކުދިންގެ ބެލެނިވެރިންނަށް ގުޅައިގެން ކަމަށް މި ނޫހަށް މައުލޫމާތު ދިން މީހުން ބުންޏެވެ.
އެގޮތުން މި ނޫހަށް ވަނީ ކުދިންގެ ބޯ ކޮށުވަން ގެންދިޔަ ސެލޫންއަށް އިސްކަންދަރު ސްކޫލުގެ ޓީޗަރެއްގެ އެކައުންޓުން އެރޭ ފައިސާ ޓްރާންސްފާ ކޮށްފައި ހުރި ސްލިޕްތަކެއް ލިބިފަ އެވެ. އެ ސްލިޕްތަކުން އެނގޭ ގޮތުގައި މިދިޔަ ހޮނިހިރު ދުވަހުގެރޭ 7:50 ހާއިރުން ފެށިގެން ގޮސް 9:00 އާ ދޭތެރޭގައި އެ ސްކޫލުގެ ލީޑިން ޓީޗަރެއްގެ އެކައުންޓުން އެ ސެލޫންއަށް އެކު ޖުމުލަ 600ރ. އެކި ފަހަރު މަތިން ފޮނުވާފައިވެ އެވެ.
މި މައްސަލައާ ގުޅޭގޮތުން އެޑިއުކޭޝަނުން ވެސް އަދި އިސްކަންދަރު ސްކޫލުން ވެސް އަދި ބަހެއް ނުބުނެ އެވެ.
