ރައީސް ޑރ. މުހައްމަދު މުއިއްޒު ވިސްނަވާފައިވާ ގޮތަށް، ވަކި އަހަރަކަށް ވުރެ ފަހުން ވިހެއި މީހުންނަށް ދުންފަތް މަނާކުރާ "ޖެނަރޭޝަން ބޭން" ފަށާ އަހަރު ކަނޑެޅުމާ ގުޅޭ ގޮތުން އާންމުންގެ ހިޔާލު ހޯދަން ޕޯލްއެއް މިއަދު ހުޅުވައިފި އެވެ.

ރައީސްގެ ރަސްމީ ސޯޝަލް މީޑިއާ އެކައުންޓުގައި ހުޅުވާފައިވާ ޕޯލްގައި ވަނީ، މި ވިސްނުން ގެންގުޅުއްވާ ކަން ހާމަކުރެއްވި "ރައްޔިތުންނާ އެކު" ޕޮޑްކާސްޓުގައި އެމަނިކުފާނު ހުށަހެޅުއްވި އަހަރުތަކެވެ.

އެ ދުވަހު ރައީސް ހުށަހެޅުއްވީ ތިން ގޮތެކެވެ. އެއީ 2000 ވަނަ އަހަރުގެ ފަހުން ވިހެއި އެންމެންނަށް، ނޫނީ 2004 ވަނަ އަހަރުގެ ފަހުން ވިހެއި އެންމެނަށް ނޫނީ 2007 ވަނަ އަހަރުން ފެށިގެން ވިހެއި އެންމެނަށް ދުންފަތުގެ ހުރިހާ އުފެއްދުމެއް މަނާކުރާށެވެ.

ވަކި އުމުރެއްގެ މީހުންނަށް ދުންފަތް އެއްކޮށް މަނާކުރަން ކަމާ ބެހޭ ފަރާތްތަކާއި ޑޮކްޓަރުންގެ ލަފަޔާ އެކު ޖެނެރޭޝަން ބޭން ގެނައުމަށް ކުރިއަށް އޮތް ދުވަސްތަކުގައި ކެބިނެޓް ކަރުދާހެއް ދިރާސާކޮށްގެން ތައްޔާރު ކުރަން ހެލްތު މިނިސްޓްރީއާ ހަވާލުކޮށްފައިވާ ރައީސް ވަނީ ވިދާޅުވެފަ އެވެ.

މިއީ ދުންފަތުގެ އިސްތިއުމާލުނުކުރާ މުޖުތަމައެއް ބިނާކުރަން ސަރުކާރުން ގެންގުޅޭ ވިސްނުމުގެ ތެރެއިން ކުރަން ނިންމާފައިވާ ކަމެކެވެ.

ރައީސް ވިދާޅުވެފައިވާ ގޮތުގައި، ޒުވާން ޖީލަށް އަމާޒުކޮށްގެން ދުންފަތް މަނާކުރުމުގެ ވިސްނުން ގެންގުޅުއްވަނީ ގިނަ ދުވަސްތަކެއް ވަންދެން ދުންފަތަށް ދެވިހިފާފައި ތިބި މީހުން އެ އަމަލުން ދުރުކުރުމަށް ވުރެ، އެކަމުން ޒުވާނުން ދުރުކުރަން ފަސޭހަ ވާނެތީ އެވެ.

ސަރުކާރުން ވަނީ މިދިޔަ އަހަރު، ދުންފަތުގެ މައްސަލަ ދާއިމީ ގޮތެއްގައި ހައްލުކުރަން ހަތަރު އަހަރުގެ ޕްލޭނެއް ހަދަން ވެސް ނިންމާފަ އެވެ. ނަމަވެސް އެ ޕްލޭން އަދި އިއުލާނެއް ނުކުރެ އެވެ.

މި ސަރުކާރުން އަންނަނީ ދުންފަތުގެ އިސްތިއުމާލުކުރުން ހުއްޓުވާށާއި މަދުކުރަން ގިނަ ފިޔަވަޅުތަކެއް އަޅަމުންނެވެ. އޭގެ ތެރޭގައި މިދިޔަ އަހަރުގެ ތެރޭގައި ވޭޕު މަނާކުރުމާއި، ދުންފަތުގެ ބާވަތްތަކުން ނަގާ ޑިއުޓީ ބޮޑުކުރުން ހިމެނެ އެވެ.