ރާއްޖޭގައި ވެސް ޓެރަރިޒަމްގެ ހަމަލާއެއް ދީފާނެ ކަމުގެ ބިރު އޮތް ކަމަށް ބުނެ އިނގިރޭސިވިލާތުން މިއަދު އެ ގައުމުގެ ރައްޔިތުންނަށް ޓްރެވަލް އެޑްވައިޒަރީއެއް ނެރެފި އެވެ.

އިނގިރޭސިވިލާތުގެ ފޮރިން އޮފީހުން މިއަދު އާންމު ކުރި ޓްރެވަލް އެޑްވައިޒަރީގައި ބުނެފައި ވަނީ އެ ގައުމުގެ ރައްޔިތުންނާ ދެކޮޅަށް ހަމަލާ ދިނުމަށް ބައެއް ޓެރަރިސްޓު ޖަމާއަތްތަކުން ގޮވާލާފައިވާ ކަމަށެވެ.

އެހެންކަމުން، އިނގިރޭސިވިލާތުގެ ރައްޔިތުންނާ ދެކޮޅަށް ރާއްޖޭގައި ވެސް ހަމަލާއެއް ދީފާނެ ކަމަށް ފޮރިން އޮފީހުން ބުނެ އެވެ. ފޮރިން އޮފީހުން ބުނީ އެ ގައުމުގެ ރައްޔިތުންނާ ދެކޮޅަށް ރާއްޖޭގައި ޓެރަރިޒަމްގެ ހަމަލާއެއް ނުދޭނެ ކަމަށް ޔަގީންކަން ނުދެވޭނެ ކަމަށެވެ.

އިނގިރޭސިވިލާތުގެ ރައްޔިތުންނަށް ހަމަލާދޭން ގޮވާލީ އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގާ ނަސްލުހޭދު ކުރުމަށް އިނގިރޭސިވިލާތުން ތާއީދުކޮށް، އިޒްރޭލަށް ހަތިޔާރު ވިއްކާތީ އެވެ.

ރާއްޖޭގައި ޓެރަރިޒަމްގެ ހަމަލާއެއް ދީފާނެ ކަމަށް ބުނިއިރު، ނިމިދިޔަ ރޯދަ މަހުގެ ތެރޭގައި ފުލުހުންނާއި ސިފައިން ގުޅިގެން ވެރި ރަށް މާލޭގައި ވަނީ ޓެރަރިޒަމްގެ އޮޕަރޭޝަނެއް ހިންގައިފަ އެވެ. އެ އޮޕަރޭޝަނުގައި ފުލުހުން ވަނީ ތިން މީހަކު ހައްޔަރުކޮށްފަ އެވެ.

އިނގިރޭސިވިލާތުގެ ރައްޔިތުންނާ ދެކޮޅަށް ރާއްޖޭގައި ވެސް ޓެރަރިޒަމްގެ ހަމަލާއެއް ދީފާނެ ކަމަށް ބުނެ ޓްރެވަލް އެޑްވައިޒަރީއެއް ނެރުނުއިރު، ރައީސް މުހައްމަދު މުއިއްޒު މިވަގުތު ހުންނެވީ އެ ގައުމުގަ އެވެ. އެމަނިކުފާނު އިނގިރޭސިވިލާތަށް ވަޑައިގެންނެވީ ދިވެހި ޓުއަރިޒަމް އިސްތިހާރު ކުރަން ލިވަޕޫލް ފުޓުބޯޅަ ކްލަބާއެކު ހެދި އެއްބަސްވުން ލޯންޗު ކުރުމަށެވެ.