ބާލިން (އޭޕްރީލް 2) - ޖަރުމަނު ކަޕުގެ ސެމީ ފައިނަލުގައި، އެންމެ ފަހުގެ ޗެމްޕިއަން، ބަޔާ ލެވަކޫސަން 2-1 ގެ ނަތީޖާ އަކުން ބަލިކޮށް، އެ ޓީމު ކަޓުވާލުމަށް ފަހު، ތިން ވަނަ ޑިވިޝަނުގެ އާމިނިއާ ބީލަފެލްޑް އިން ފައިނަލަށް ދަތުރުކޮށްފި އެވެ.

ރޭ ކުޅުނު ސެމީ ފައިނަލް މެޗުގައި 17 ވަނަ މިނިޓްގައި ލެވަކޫސަންގެ ޖޮނަތަން ޓާ ވަނީ ގޯލު ޖަހައި އެ ޓީމަށް ލީޑު ނަގައިދީފަ އެވެ.

އެކަމަކު، އޭގެ ތިން މިނިޓް ފަހުން މާރިއަސް ވޯލް ވަނީ ގޯލު ޖަހައި ބީލަފެލްޑް އަށް ނަތީޖާ ހަމަހަމަ ކޮށްދީފަ އެވެ. އަދި ފުރަތަމަ ހާފު ނިމުމުގެ ކުރިން ބީލަފެލްޑްގެ މެކްސިމިލިއަން ގްރޯސާ ވަނީ ގޯލު ޖަހައި އެ ޓީމަށް ލީޑު ނަގައިދިނެވެ. މިއީ، ލުއި އޮޕީގެ އެހީތެރިކަމާއެކު އޭނާ ޖެހި ގޯލެކެވެ.

ގިނަ ކާޑުތަކެއް ފެނިގެންދިޔަ މި މެޗުގެ ދެ ވަނަ ހާފުގައި ލެވަކޫސަން އިން ގޯލް ޖަހަން ގިނަ ހަމަލާތަކެއް ފޮނުވާލި ނަމަވެސް ބީލަފެލްޑްގެ ކުޅުންތެރިން ވަނީ ވަރުގަދަ ޑިފެންސް އެއް ކޮށް ލެވަކޫސަންގެ ހަމަލާތައް ހުއްޓުވައިފަ އެވެ.

މި މަހުގެ 24 ވަނަ ދުވަހު ކުޅޭ މި މުބާރާތުގެ ފައިނަލް މެޗުގައި ބީލަފެލްޑް ވާދަކުރަން ޖެހޭނީ މިރޭ ކުޅޭ ސެމީ ފައިނަލުގައި އާރްބީ ލައިޕްޒިގް އާއި ސްޓުޓްގާޓް ބައްދަލުކުރާ މެޗުން މޮޅުވާ ޓީމަކާ އެވެ.