ގާނޫނަށް ހުރުމަތްތެރިކޮށް ހިތުމުގައި ފުލުހުން ފުރަތަމަ ނަމޫނާ ދައްކަންޖެހޭ: ރައީސް

29 މާރިޗު 2025 - 15:37 1

ލީވާން އަލީ ނާސިރު

ލ

ރައީސް ޑރ. މުހައްމަދު މުއިއްޒު: ގާނޫނަށް ހުރުމަތްތެރިކޮށް ހިތުމުގައި ފުލުހުން ފުރަތަމަ ނަމޫނާ ދައްކަންޖެހޭ ކަމަށް ވިދާޅުވި -- ފޮޓޯ: ރައީސް އޮފީސް


ގާނޫނަށް ހުރުމަތްތެރިކޮށް ހިތުމުގައި ފުލުހުން ފުރަތަމަ ނަމޫނާ ދައްކަންޖެހޭ: ރައީސް

29 މާރިޗު 2025 - 15:37 1

ކޮންމެ ފުލުހެއްގެ އަޒުމަކަށް ވާން ޖެހެނީ ގާނޫނަށް ހުރުމަތްތެރިކޮށް ހިތުމުގައި ފުރަތަމަ ފުލުހުން ނަމޫނާ ދެއްކުން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ފުލުހުންގެ މުއައްސަސާއަށް 92 އަހަރު ފުރުމުގެ މުނާސަބަތުގައި އެމަނިކުފާނު ފޮނުއްވި ހިތާބުގައި ވިދާޅުވީ ކުށްކުރުން ހުއްޓުވުމުގެ އިތުރުން ކުށަށް އަރައިގަތުމާއި މުޖުތަމައު ދުރުހެލި ކުރުމަކީ ވެސް ފުލުހުންގެ ވާޖިބެއް ކަމަށެވެ.

އެގޮތުން ރައްޔިތުންގެ ހޭލުންތެރިކަން އިތުރުކޮށް ދިނުމާއި، ކަންކަން ކުރަން އޮންނަ ރަނގަޅު ގޮތް ވިސްނައިދީ ކިޔައިދިނުމާއި، ރީތި އުޅުމާއި އާދަ އަނެކުންނަށް ދަސްކޮށްދީ، އަނެކުންނަށް މަގުދައްކައިދޭ ބަޔެއްގެ ގޮތުގައި އަބަދުމެ ފުލުހުން ދެމިތިބުން މުހިންމުކަން ރައީސް މުއިއްޒު ފާހަގަކުރެއްވި އެވެ.

"ފުލުހުންގެ ވަޒީފާގެ މަސްއޫލިއްޔަތު އަބަދުވެސް އަދާކުރަމުންދަނީ ގާނޫނު ތަންފީޒުކުރުމަށް ޓަކައި. އެހެންކަމުން، ކޮންމެ ފުލުހެއްގެ އަޒުމަކަށް ވާންވާނީ، ގާނޫނަށް ހުރުމަތްތެރިކޮށް ހިތުމުގައި އެންމެ ފުރަތަމަ ފުލުހުން ނަމޫނާ ދެއްކުން. މުއާމަލާތު ކުރުމުގައި އަހްލާގީ ރީތި ހަމަތައް ހިފެހެއްޓުން،" އެމަނިކުފާނު ވިދާޅުވި އެވެ.

ރައީސް މުއިއްޒު ވިދާޅުވީ ވާޖިބު އަދާކުރުމުގައި ފުލުހުން އަބަދުމެ ދެމިތިބެނީ ގައުމާއި ރައްޔިތުންގެ މަސްލަހަތު އިސްކޮށް ކިތަންމެ ގިނަ ވަގުތެއް މަސައްކަތުގައި ހޭދަކުރަން ހާލަތު މެދުވެރި ކުރި ނަމަވެސް، ކިތަންމެ ބޮޑު ނުރައްކަލަކާ ކުރިމަތިލާން ޖެހުނު ކަމުގައި ވިޔަސް ފަސްޖެހުމެއް ނެތި ކަމަށެވެ.

އެ ގޮތުން ހިދުމަތުގައި ދެމި ތިބުމަށް ފުލުހުންގެ އާއިލާތަކުން ދެއްވާ އެއްބާރުލެއްވުމާއި ހިތްވަރުގެ މަތީން ހަނދާން ނައްތާލައިގެން ނުވާނެކަން ފާހަގަކުރައްވާ ރައީސް ވިދާޅުވީ ފުލުހުންގެ އާއިލާތަކަށް ހިތުގައި އެމަނިކުފާނުގެ ވަނީ ނުހަނު ފުން އިހްތިރާމަކާއި ލޯތްބެއް ކަމަށެވެ.

"ހިދުމަތުގެ ހަޔާތުގައި ދިވެހި ފުލުހުން މިހާތަނަށް ވޭތުކުރި ކޮންމެ ދުވަހަކުވެސް، ހަވާލުވެފައިވާ ޒިންމާއާއި މަސްއޫލިއްޔަތު އަދާކުރުމުގައި ބޮޑެތި ގުރުބާނީތަކެއް ވަނީ ވެފައި,"

"ހުތޫރަތްތެރި އެތައް ވަގުތަކާ ފުލުހުން ވަނީ ކުރިމަތިލައިފައި. ރައްޔިތުންގެ މުދަލާއި ފުރާނަ ސަލާމަތްކޮށްދިނުމުގައި، އަމާންކަން ގާއިމުކޮށްދިނުމުގައި، އަދި ކުށުގެ ވެށީން މުޖުތަމަޢު ސަލާމަތްކޮށްދިނުމުގައި، ލިބިފައިވާ ތަމްރީނުތަކާއި ތަޖުރިބާގެ ބޭނުން ހިފައިގެން ބޮޑެތި އެތައް ކާމިޔާބީއެއް ވަނީ ހޯދައިފައި،"

ރައީސްގެ ވާހަކައިގައި ފުލުހުންގެ ހިދުމަތުގެ މުހިންމުކަން ފާހަގަކުރައްވައި, މިހާރަށް ވުރެ ފުރިހަމައަށް ފުލުހުންގެ މަސައްކަތްތައް ބައްޓަންކުރުމަށް ބާރުއެޅުއްވި އެވެ.

0.00%

0.00%

0.00%

0.00%

މި ލިޔުން ކިޔާލުމުން


ޒުއާމު

4 days ago

ކުރި ހުރިހާ ހުވަޔަކާ ހިލާފުވެ ރައްޔިތުންގެ މުދަލަށް ހިޔާނާތްތެރިވެފަ ހުރި މީހަކު އެހެން މީހުންނަށް ކޮން ނަމޫނާއެއް ބުނެދޭން މި އުޅެނީ