ޓެރަރިޒަމް ހަމަލާއެއް ކުރިމަތިވާ ހާލަތުގައި ހުޝިޔާރު ކަމާއެކު ހަމަލާއަކާ ދެކޮޅަށް މަސައްކަތް ކުރާނެ ގޮތް ފުލުހުންނަށް ދަސްކޮށްދިނުމަށް އިނގިރޭސިވިލާތުގެ ސަރުކާރާ ގުޅިގެން ރާއްޖޭގައި ތަމްރީނު ޕްރޮގުރާމްތަކެއް ހިންގަން ފަށައިފި އެވެ.

އިންޓަނޭޝަނަލް ޕްރޮޓެކްޓު އެންޑް ޕްރިޕެއާގެ ނަމުގައި ތަމްރީނު ޕްރޮގުރާމުތަކެއް ހިންގަނީ ފިޔަވަހިތަކަކަށް ބަހާލައިގެންނެވެ. އެގޮތުން މިދިޔަ ހަފުތާގައި ވަނީ ރާއްޖޭގެ އުތުރުގެ އަތޮޅުތަކުގައި ހަރަކާތްތެރިވާ ފުލުހުންނަށް ހާއްސަކޮށް ދެ ޕްރޮގުރާމެއް ކުރިއަށް ގެންގޮސްފަ އެވެ.

Advertisement

ފުލުހުން ބުނީ ކުރީ ސަފުގައި ހަރަކާތްތެރިވާ ފުލުހުންނަށް އަމާޒުކޮށްގެން މިދިޔަ ހޯމަ ދުވަހު ކުޅުއްދުއްފުށި ސިޓީގައި ކުރިއަށް ގެންދިޔަ ޓެރަރިޒަމް އިންސިޑެންޓް ފަސްޓް ރެސްޕޮންޑާސް ޕްރޮގުރާމުގައި ހއ.، ހދ.، ށ. އަދި ކުޅުދުއްފުށީގައި މަސައްކަތް ކުރާ 45 ފުލުހުން ބައިވެރިވި ކަމަށެވެ.

އޭގެ ފަހުން މިދިޔަ އަންގާރަ ދުވަހުން ބުރާސްފަތި ދުވަހުގެ ނިިޔަލަށް ހއ. ހޯރަފުށީގައި ކުރިއަށް ގެންދިޔަ ޓެރަރިސްޓު އިންސިޑެންޓު ކޮމާންޑު ރެސްޕޯސްންސް އެވެއާނެސް ޕްރޮގުރާމުގައި ހަމަ އެ އަތޮޅުތަކުގެ ފުލުހުންގެ އިންޗާޖުން ޔުނިތުތަކުގެ އިސްވެރިން ހިމެނޭހެން ފުލުހުންގެ ރެސްޕޯންސް ސުޕަވައިޒަރީ ލެވެލްގައި މަސައްކަތް ކުރާ 27 ފުލުހަކު ބައިވެރިވި ކަމަށް ފުލުހުން ބުންޏެވެ.

މި ޕްރޮގުރާމުތަކުގެ ސަބަބުން ދިވެހި ފުލުހުންގެ ގާބިލުކަން އިތުރުވެ، ރާއްޖެއަށް ޓެރަރިސްޓު ހަމަލާއެއް ކުރިމަތިވާ ހާލަތްތަކުގައި ރާއްޖޭގެ މީހުން ދިރިއުޅޭ ރަށްތަށާއި ރިސޯޓުތަކާއި ސިނާއީ މަސައްކަތް ކުރާ ރަށްރަށާ އެންމެ ގާތުން އެކަމަށް އިޖާބަދޭ ފަސްޓް ރެސްޕޯންޑާސް އާއި ސުޕަވައިޒަރީ ލެވެލްތަކުގެ ފުލުހުން އަމަލު ކުރާނެ ގޮތް ދަސްވެވެގެންދާނެ ކަމަށް ފުލުހުން ބުންޏެވެ.