ރައީސް ޑރ. މުހައްމަދު މުއިއްޒު އެސްޓޯނިއާށް ކުރައްވަމުން ގެންދަވާ ދަތުރުގައި ރަޝިއާ-ޔޫކްރެއިން ހަނގުރާމައިގައި ޔޫކްރެއިނަށް ތާއީދުކުރާނެ ކަމަށް ވިދާޅުވުމާ ގުޅިގެން ރަޝިއާއިން ފިޔަވަޅެއް އަޅައިފިނަމަ އިގުތިސޯދަށް ގެއްލުން ވާނެ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

ރައީސްގެ ވާހަކަތަކާ ގުޅިގެން ނުރުހުން ފާޅުކުރައްވަމުން އަމީރު އެކްސްގައި ކުރެއްވި ޕޯސްޓެއްގައި ވިދާޅުވީ ގައުމުގެ މަސްލަހަތު އޮތީ ކޮންކަންތައްތަކެއްގައިތޯ ރަނގަޅަށް ދަންނަން ވާނެ ކަމަށެވެ. އަދި ރައީސްއަކީ ނާގާބިލު ވެރިޔެއްގެ ގޮތުގައި ސިފަކުރައްވަމުން އޭނާ ވިދާޅުވީ ރައީސްގެ ނުވިސްނުންތެރި އަމަލުތަކުގެ ސަބަބުން މުޅީ ގައުމަށް ބޮޑެތި ގެއްލުންތަކާ ކުރިމަތިލާން ޖެހިދާނެ ކަމަށެވެ.

އަމީރުގެ މި ވާހަކައަށް ބާރުދެއްވީ ކުރިން ރައީސް ދެއްކެވި ބައެއް ވާހަކަތަކާއި ސަރުކާރުގެ ނައިބު ވަޒީރުންތަކެއް ދެއްކިި ވާހަކަތަކުން އިގުތިސޯދަށް ލިބުނު ގެއްލުންތަކުން މިސާލު ނަންގަވަމުންނެވެ.

އެއް މިސާލެއްގެ ގޮތުގައި އަމީރު ނެންގެވީ ރައީސް ވެރިކަމާ ހަވާލުވެވަޑައިގެންނެވުމަށް ފަހު ބޭރުގެ ގައުމަކަށް ކުރެއްވި ފުރަތަމަ ރަސްމީ ދަތުރުގައި، ތުރުކީއަށް ވަޑައިގެން އިސްލާމި އުއްމަތުގެ ވެރިޔަކީ ތުރުކީގެ ރައީސް ރަޖަބް ތައްޔިބު އުރުދުގާނަކީ އިސްލާމީ އުއްމަތުގެ އިސް ލީޑަރު ކަމަށް ވިދާޅުވުމެވެ. ރައީސް މިހެން ވިދާޅުވެ ސައުދީ އަރަބިއާއާ ޖެހުނީ ކަމަށް އޭނާ ވިދާޅުވި އެވެ.

ދެން މިސާލެއްގެ ގޮތުގައި ނެންގެވީ ޔޫތު މިނިސްޓްރީގެ އޭރުގެ ނައިބު ވަޒީރުންތަކެއް އިންޑިއާގެ ބޮޑުވަޒީރު ނަރެންދުރަ މޯދީއަށް ބޭއަދަބީ ބަހުން މުހާތަބުކޮށް، ފުރައްސާރަކުރި މައްސަލަ އެވެ. މިކަމާ ގުޅިގެން އިންޑިއާގެ ޓޫރިސްޓު މާކެޓަށް އަސަރުކޮށް ޓޫރިޒަމް ސިނާއަތުން ބޮޑެތި ގެއްލުންތަކަކާ ކުރިމަތިލާން ޖެހުނު ކަމަށް އޭނާ ފާހަގަކުރެއްވި އެވެ.

އަމީރު ވިދާޅުވީ ޔޫކްރެއިނަށް ތާއީދުކުރާ ކަމަށް ރައީސް ވިދާޅުވުމުން ރާއްޖެއަށް ލިބޭނެ ފައިދާއެއް ނުވިސްނޭ ކަމަށެވެ. ނަމަވެސް މީގެ ސަބަބުން ޓޫރިޒަމް މާކެޓަށް އަސަރުކުރާނެ ކަން ފާހަގަކުރައްވައި، ރަޝިއާ މާކެޓަކީ ރާއްޖެއަށް މުހިންމު ޓޫރިސްޓު މާކެޓެއް ކަން މިދިޔަ އަހަރާއި މި އަހަރުގެ މިހާތަނަށް އެ ގައުމުން އައި ޓޫރިސްޓުންގެ އަދަދުތަކާ އެކީ އޭނާ ވިދާޅުވި އެވެ.

“މި ދިޔަ އަހަރު ރާއްޖެއަށް 2 ވަނައަށް އެންމެ ގިނަ ފަތުރުވެރިން ޒިޔާރަތްކުރީ ރަޝިޔާއިން. 225،000 ފަތުރުވެރިން. މި އަހަރުގެ މިހާތަނަށް ރާއްޖެއަށް ރަޝިޔާގެ 13،000 އަށް ވުރެ ގިނަ ފަތުރުވެރިން ޒިޔާރަތްކޮށްފި.” އަމީރު ލިޔުއްވާފައިވެ އެވެ.

ޔޫކްރެއިނަށް ތާއީދުކުރަން ނުޖެހޭ އަނެއް ސަަބަބެއް ކަމަށް އަމީރު ފާހަގަކުރެއްވީ ފަލަސްތީނުގައި އިޒްރޭލުން ހިންގަމުންދާ ނަސްލުހޭދައިގައި ޔޫކްރެއިނުގެ ތާއީދު އިޒްރޭލަށް އޮތް މައްސަލަ އެވެ. މިކަންކަމަށް ރިއާޔަތްކުރާއިރު ރާއްޖެއިން ޔޫކްރެއިނަށް ތާއީދުކުރަން ޖެހޭ އެއްވެސް ސަބަބެއް ނުވިސްނޭ ކަމަށް އޭނާގެ ޕޯސްޓުގައި ލިޔުއްވާފައިވެ އެވެ.

ޔޫކްރެއިނަށް ތާއީދު ކުރާ ކަމަށް ރައީސް ވިދާޅުވި މައްސަލައިގައި އާންމުންނާއި ސިޔާސީ މީހުންގެ ފާޑުކިޔުން އަމާޒުވާން ފެށިފަހުން ފޮރިން މިނިސްޓަރު އަބްދުﷲ ހަލީލު ވަނީ ރަޝިޔާ-ޔޫކްރެއިން ހަނގުރާމައިގައި ވަކި ކޮޅެއް ނުނަގާ ސިޔާސަތު ބަދަލުނުވާ ކަމަށް ވިދާޅުވެފަ އެވެ.