ލަގްޒަރީ ރިސޯޓު، އަމިއްލަ ފުށި ވިއްކާލުމަށް ޓަކައި އެ ރިސޯޓު ހިންގާ ބ. ފިނޮޅަސްއާ ގުޅޭ ދަރަންޏެއް ނުވަތަ މައްސަލައެއް އޮތްތޯ ބެލުމަށް ޓޫރިޒަމް މިނިސްޓްރީން އިއުލާނުކޮށްފި އެވެ.

ކޯސްޓްލައިން ހޮޓެލްސް އެންޑް ރިސޯޓްސްގެ ޕްރޮޕަޓީއެއްގެ ގޮތުގައި އޮޕަރޭޓު ކުރަމުންދާ ރިސޯޓު ވިއްކައިލުމަށް އިއުލާނުކުރީ އޮގަސްޓު 2024 ގަ އެވެ. މިހާރު އެ ކުންފުނިން ވަނީ ފިނޮޅަސް ކުއްޔަށް ހިފި އެގްރީމެންޓުގެ ދަށުން ލިބޭ ހައްގުތައް އެހެން ފަރާތަކަށް ބަދަލު ކުރުމަށް ޓޫރިޒަމަށް ހުށަހަޅާފަ އެވެ.

އަމިއްލަ ފުށި ރިސޯޓު ގަންނަނީ ކޮން ކުންފުންޏަކުން ކަމެއް މިހާތަނަށް އެނގިފައި ނުވެ އެވެ.

ވެލާނާ އިންޓަނޭޝަނަލް އެއާޕޯޓުން 30 މިނެޓުގެ ސީޕްލޭން ދަތުރަކުން ދެވޭ މި ރިސޯޓުގައި 68 ވިލާ ހުރެ އެވެ. ރާއްޖޭގެ ނިސްބަތުން އެންމެ ބޮޑު ޓޫރިސްޓު އެކޮމޮޑޭޝަން ހުންނަ އެއް ރިސޯޓަކީ މިއީ އެވެ.

އަމިއްލަ ފުއްޓަކީ އެ ރިސޯޓުގައި ހުރި ވިލާތައް ދިގު މުއްދަތަކަށް ވިއްކާ ރިސޯޓުތަކުގެ ތެރެއިން ރިސޯޓެކެވެ. އެގޮތުން، 50 އަހަރާ ހަމައަށް އެ ރިސޯޓުގެ ވިލާތައް ގަތުމުގެ ފުރުސަތު 2020 ގައި ހުޅުވާލި އެވެ.