ރާއްޖޭގެ ޗެމްޕިއަންކަން މިދިޔަ ހަތަރު އަހަރު ހޯދި، މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗަކަށް ސްޕެއިނުގެ ތަޖުރިބާކާރު ލުއިސްމާ ހެނާންޑޭޒް ވަނީ ހަަމަޖައްސައިފި އެވެ.

މާޒިޔާ އިން އާ ކޯޗެއް ގެނައީ އެ ޓީމަށް ކުރިން ގެނައި ކޯޗު ސާބިއާގެ ޑްރަގަން ޑުކަނޯވިޗްގެ އެއްބަސްވުން ހަމަވުމުން ދޫކޮށްލައިފަަ އެވެ. މީގެ ފަސް މަސް ކުރިން ޑްރަގަން، މާޒިޔާ ކޯޗަކަށް ގެނައީ، ނޮވެމްބަރުގައި ކުޅުނު، އޭއެފްސީ ޗެލެންްޖް ލީގާ ދިމާކޮށެވެ.

ޖެނުއަރީ މަހު، ރާއްޖޭގެ ފުޓްބޯޅަ ސީޒަން ފަށާނެ ކަމަށް ފުރަތަމަ ޓެންޓޭޓިވް ކަލަންޑަރެއް އާންމުވުމުން، މާޒިޔާ އިން ޕްރީ ސީޒަން ޕްރެކްޓިސް ފެށީ ޑްރަގަންއާ އެކު އެވެ. އެކަމަކު، ސީޒަން ފަށާނެ ތާރީހެއް ކަށަވަރުނުވާތީ ޕްރެކްޓިސް މެދުކެނޑާލުމުން، ޑްރަގަން ވެސް އެނބުރި ގައުމަށް ޗުއްޓީ އަކަށް ގޮސް، ފަހުން އެއްބަސްވުން ހަމަވުމުން ޓީމާ ވަކިވީ އެވެ.

ގަލޮޅު ދަނޑުގައި މިއަދު ބޭއްވި އިވެންޓެއްގައި، މާޒިޔާގެ ކޯޗަކަށް، ހެނާންޑޭޒް، 52، ހަމަޖެއްސީ ކުރިއަށް އޮތް ސީޒަނަށެވެ. އެފްއޭއެމް އިން ކްލަބްތަކަށް ހިއްސާކޮށްފައިވާ ކަލަންޑަރުގައިވާ ގޮތުން، އަންނަ މަހުގެ 14 ގައި ސީޒަން ފަށާނެ އެވެ.

ހެނާންޑޭޒް ބުނީ، މާޒިޔާގެ ހުށަހެޅުން ގަބޫލުކުރީ ރަނގަޅު ފުރުސަތެއް ކަމަށް ގަބޫލުކުރެވޭތީ ކަމަށެވެ. އަދި ރާއްޖޭގެ ފުޓްބޯޅައިގެ ހާލަތު ވަރަށް ރަނގަޅަށް އޮޅުންފިލުވައިފައިވާނެ ކަމަށާއި މަސައްކަތްކުރާނީ މާޒިޔާގެ އިތުުރުން މުޅި ދިވެހި ފުޓްބޯޅައިގެ ހައްގުގައި ކަމަށެވެ.

"އަހަންނަށް އެނގޭ (ރާއްޖޭގެ) ގައުމީ ޓީމުގެ ގިނަ ކުޅުންތެރިންތަކެއް ތިބީ މާޒިޔާގައި ކަން. އަހަރެން ވަރަށް ބޮޑު ޒިންމާ އަކާ މި ހަވާލުވަނީ، ގައުމީ ޓީމުގެ ކުޅުންތެރިން ގިނަ ޓީމެއްގެ ޗެލެންޖު ނަގައި، އެ ކުޅުންތެރިން އިމްޕްރޫވްްކޮށް، އަހަރެން އަބަދުވެސް ޝައުގުވެރިވާ އެއް ކަންތައް އެއީ ޒުވާން ކުޅުންތެރިންނާ އެކު މަސައްކަތް ކުރުން، އެކަން ވެސް ކުރެވޭނެ ކަމަށް މި ބަލަނީ،" ހެނާންޑޭސް ބުންޏެވެ.

ސްޕެއިން، ލިތުއޭނިއާ، އުޒްބެކިސްތާން، ކުވެއިތު އަދި ދެކުނު ކޮރެއާގައި ފުޓްބޯޅައިގެ ގިނަ މަސައްކަތްތަކެއް ކޮށްފައިވާ ހެނާންޑޭޒް އަކީ ކޯޗިންގައި ޔުއެފާ ޕްރޯ ލައިސަންސް ހާސިލްކޮށްފައިވާ ފުޓްބޯޅައިގެ އެކިއެކި ކާމިޔާބު ޕްރޮޖެކްޓްތަކެއްގައި ބައިވެރިވި ކޯޗެކެވެ. އޭނާ އަކީ ރާއްޖޭގެ ޗެމްޕިއަން، މާޒިޔާ އަށް އިރުޝާދުދޭނެ ބިދޭސީ ހަތް ވަނަ ކޯޗެވެ.

މާޒިޔާ އަށް ކޯޗުކޮށްދިން ބިދޭސީ ކޯޗުންނަކީ، މި ސީޒަނުގައި ކުރިން ހުރި، ސާބިއާގެ ޑްރަގަންގެ އިތުރުން، މީގެ ކުރިން ހުރި، މެސެޑޯނިއާގެ މަރުޖާން ސެކުލޮސްކީ، ސާބިއާގެ މިއޮޑްރަގް ޖެސިކް އާއި ރިސްޓޯ ވިޑަކޮވިޗްގެ އިތުރުން މިދިޔަ ސީޒަނުގައި ކޯޗުކޮށްދިން ދެ ކޯޗުން ކަމަށްވާ ބަލްގޭރިއާގެ އިވާން ކޮލޭވް އާއި ބޮސްނިއާގެ މިލޮމީރް ސެސްލިޖާ (މިލޯ) އެވެ.

ބާސެލޯނާ އިން ޓެނެރީފް އަށް ކަނއަޅާފައިވާ ޓެކްނިކަލް އެކަޑަމީ އާއި ރެއާލް މެޑްރިޑްގެ އިންޓަނޭޝަނަލް ފައުންޑޭޝަން ޕްރޮޖެކްޓްގައި މަސައްކަތްކޮށްފައިވާ ހެނާންޑޭޒް ވަނީ ލިތުއޭނިއާ، އުޒްބެކިސްތާން އަދި ކުވެއިތުގެ ޕްރިިމިއާ ލީގުގެ ކްލަބްތަކުގައި ހެޑް ކޯޗުކަން ކޮށްފަ އެވެ.

އަދި ދެކުނު ކޮރެއާގެ ޕްރިމިއާ ލީގުގެ ޑައެގޫ އެފްސީއާ އެކު ރިސާވް ލީގުގައި ވެސް ލުއިސްމާ ވަނީ މަސައްކަތްކޮށްފަ އެވެ، އަދި ޑައެގޫގެ ފުރަތަމަ ޓީމުގެ ޓެކްޓިކަލް އެނަލިސްޓުގެ މަގާމުގެ އިތުރުން ސްކައުޓަކަށް ވެސް އޭނާ މަސައްކަތްކޮށްފައިވެ އެވެ.