ފެނަކަ ކޯޕަރޭޝަން ލިމިޓެޑުގެ ޑެޕިއުޓީ މެނޭޖިން ޑިރެކްޓަރުގެ މަގާމުގައި ހުންނެވި ހުސެއިން ޒުހުރީ އެ މަގާމުން މިއަދު އިސްތިއުފާ ދީފި އެވެ.

ޒުހުރީ އިސްތިއުފާ ދީފައިވާކަން ފެނަކަ ކޯޕަރޭޝަނުން ވަނީ "އަދަދު" ނޫހަށް ކަށަވަރު ކޮށްދެއްވައިފަ އެވެ. ނަމަވެސް އޭނާ އިސްތިއުފާ ދިން ސަބަބެއް ސާފެއް ނުވެ އެވެ.

އޭނާ ހުރިއިރު، ކޮށްދެއްވި ހިދުމަތަށް ފެނަކަ ކޯޕަރޭޝަނުން ވަނީ ޝުކުރު އަދާކޮށް ސޯޝަލްމީޑިއާގައި ޕޯސްޓެއް ވެސް ހިއްސާ ކޮށްފަ އެވެ.

ފެނަކައިގެ ޑެޕިއުޓީ މެނޭޖިން ޑިރެކްޓަރުކަމުން ޒުހުރީ މިއަދު އިސްތިއުފާ ދެއްވިއިރު، އެ ކުންފުނީގެ މެނޭޖިން ޑިރެކްޓަރުގެ މަގާމުގައި ހުންނެވި، މުއާޒް މުހައްމަދު ރަޝީދު ވަނީ މިދިޔަ ޑިސެމްބަރު 23، ގައި އެ މަގާމުން އިސްތިއުފާ ދީފަ އެވެ.

މެނޭޖިން ޑިރެކްޓަރުގެ މަގާމުން މުއާޒް އިސްތިއުފާ ދެއްވީ ފެނަކަ ކޯޕަރޭޝަނަށް ދިމާވެފައިވާ މާލީ ގޮންޖެހުންތަކުން އަރައިގަތުމަށް ކުންފުނިން ތައްޔާރު ކޮށްފައިވާ ޕްލޭން ކަމާ ގުޅުންހުރި އިދާރާތަކާ ހިއްސާ ކުރި ނަމަވެސް، އެ ކަމަށް އއަލިމަގެއް ނުފެންނަ ކަމަށް ވިދާޅުވުމަށްފަހު އެވެ.