ފުރަތަމަ ޑިވިޝަންގެ ކްލަބް ޔުނައިޓެޑް ވިކްޓަރީ (ޔޫވީ) އިން ހަތް ދުވަހުގެ ތެރޭގައި އިމިގްރޭޝަން އަށް 30،000 ރުފިޔާ ދެއްކުމަށް ސިވިލް ކޯޓުން ހުކުމްކޮށްފި އެވެ.

ސިވިލް ކޯޓުން މި މަހު ނުވަ ވަނަ ދުވަހު، ޔުނައިޓެޑް ވިކްޓަރީގެ މައްޗަށް މި ފައިސާ ދެއްކުމަށް ހުކުމްކޮށްފައިވަނީ، ޔުނައިޓެޑް ވިކްޓަރީން ބިދޭސީ ކުޅުންތެރިން ބިޒްނަސް ވިސާގައި ރާއްޖެ އަށް ގެނައުމަށް ފަހު، ވިސާގެ މުއްދަތު ހަމަވުމުގެ ކުރިން، އެ އާ ކުރަން ހުށަހަޅާފައިނުވާތީ އެވެ. އަދި މި ދައުވާގައި، އެ ބިދޭސީ ކުޅުންތެރިން، ފުރުވާލުމުގައި ވެސް އެންމެ ރަނގަޅަށް ޔުނައިޓެޑް ވިކްޓަރީން އަމަލުކޮށްފައިނުވާކަން ހުށަހަޅާފައި އޮތް ލިޔުންތަކުން އެނގޭ ކަމަށް ކޯޓުން ވަނީ ބުނެފަ އެވެ.

އެ ގޮތުން، ކޯޓުން ޔުނައިޓެޑް ވިކްޓަރީގެ ގައިރުހާޒިރުގައި ހުކުމްކޮށްފައިވަނީ، މި މަހު ނުވަ ވަނަ ދުވަހުން ފެށިގެން ހަތް ދުވަސް ތެރޭ އިމިގްރޭޝަނަށް 30،000 ރުފިޔާ ދެެއްކުމަށެވެ.

ޔުނައިޓެޑް ވިކްޓަރީ (ޔޫވީ) އަށް ކުޅުނު ސާބިއާގެ މިލޯސް ކޮވަސިޗް އާއި ބެލަރޫސްގެ އިވާން ވެރާސް އަށް އެ ކްލަބުން ދޭން ޖެހޭ މުސާރަ އާއި ފައިސާގެ އެހެނިހެން ކަންކަން ހަމަޖައްސައިނުދޭތީ 2022 ވަނަ އަހަރުގެ އޮކްޓޫބަރު މަހު ގަލޮޅު ދަނޑުގެ ރޮސްޓްރަމްގައި ހަޅުތާލެއްކޮށްފަ އެވެ. އެކަމާ ގުޅޭގޮތުން ފަހުން، މިލޯސް ބުނީ ހަޅުތާލު ހުއްޓާލީ އެފްއޭއެމް އިން ޔުނައިޓެޑް ވިކްޓަރީއާ ވާހަކަދައްކައިގެން ކަންކަން ހައްލުކުރާނެ ކަމުގެ ޔަގީންކަން ދިނުމުން ކަމަށެވެ.

މުސާރައިގެ ކަންކަން ހަމަނުޖެހޭތީ، ކްލަބް ލައިސަންސިން ކަންކަން ފުުރިހަމަ ނުވެ އޮތް ކްލަބްތަކުގެ ތެރޭގައި ޔުނައިޓެޑް ވިކްޓަރީ (ޔޫވީ) ހިމެނެ އެވެ.